ايماقتار • 27 ماۋسىم، 2019

قاراعاندى ماڭىندا «سارىارقا-انتيتەررور-2019» وقۋ-جاتتىعۋى ءوتتى

185 رەت كورسەتىلدى

قاراعاندى وبلىسىنداعى سپاسسك وقۋ ورتالىعىنىڭ پوليگونىندا شانحاي ىنتىماقتىستىق ۇيىمىنا مۇشە مەملەكەتتەردىڭ «سارىارقا-انتيتەررور-2019» تەرروريزمگە قارسى بىرلەسكەن وقۋ-جاتتىعۋى ءوتتى.

شاراعا وزبەكستان، قىرعىزستان، تاجىكستان جانە قازاقستان قۇزىرەتتى   ورگاندارىنىڭ كۇشتەرى مەن قۇرالدارى جۇمىلدىرىلدى. سونداي-اق، شىۇ باقىلاۋشى مەملەكەتتەرىنىڭ، تمد تەرروريزمگە قارسى ورتالىعى جانە ۇجىمدىق قاۋىپسىزدىك تۋرالى شارت ۇيىمىنىڭ وكىلدەرى قوناق رەتىندە شاقىرىلدى.

وقۋ-جاتتىعۋ جيىنى بارىسىندا شىۇ-عا مۇشە-مەملەكەتتەردىڭ قاۋىپسىزدىگىنە قاتەر توندىرەتىن حالىقارالىق تەررورلىق ۇيىمدارعا قارسى ءىس-قيمىل بويىنشا بىرلەسكەن شارالار پىسىقتالدى. جاتتىعۋ مىندەتتەرى جوعارى دەڭگەيدە جانە تولىق كولمەدە ورىندالدى. تەرروريزمگە قارسى قۇرىلىمداردى باسقارۋ كەزىندە باسقارۋ ورگاندارىنىڭ ۇيلەسىمدى ءىس-ارەكەتتەرى قامتاماسىز ەتىلدى. لاڭكەستىك ارەكەتتەرگە قارسى بىرلەسكەن ءىس-شارالاردى وتكىزۋدىڭ جاڭا نىساندارى مەن ادىستەرى قولدانىلدى. تەرروريزمگە قارسى وپەراتسيانىڭ كۇشتىك فازاسىن وتكىزۋ كەزىندە شىۇ-عا مۇشە مەملەكەتتەردىڭ ارنايى بولىمشەلەرىنىڭ تاجىريبەلىك داعدىلارى جەتىلدىرىلدى. تەرروريزم اكتىلەرىنىڭ سالدارىن ازايتۋ جانە جويۋ بويىنشا ءوزارا ءىس-قيمىل سارالاندى. 

وقۋ-جاتتىعۋ جيىنىنىڭ سوڭعى كۇنىندە ستسەناري بويىنشا لاڭكەستەر ەلدى مەكەنگە جارىلعىش قۇرىلعى قويعان كورنەكى وقۋ-جاتتىعۋ كورسەتىلدى. اسكەريلەر الدىمەن تۇرعىنداردى قاۋىپسىز جەرگە كوشىرىپ، بومبانى زالالسىزداندىردى. سول ارادا پيعىلى تەرىس زالىمدار اۆتوبۋستى باسىپ الىپ، 15 ادامدى كەپىلدىككە العان بولاتىن. قىلمىسكەرلەردىڭ ءبىرازى قورشاۋدان قاشىپ شىعىپ، اكىمشىلىك عيماراتقا كىرىپ ۇلگەردى.  دەگەنمەن، اسكەريلەر ولاردى قورشاپ الىپ، تۇرعىنداردى امان-ەسەن قۇتقارىپ، العا قويىلعان مىندەتتى ابىرويمەن ورىنداپ شىقتى.

– وقۋ-جاتتىعۋدىڭ بەلسەندى كەزەڭىنە قازاقستان، وزبەكستان جانە تاجىكستان قاتىستى. وپەراتسيانىڭ تابىستى اياقتالعانىن ايتۋ كەرەك. مەنىڭ ويىمشا، بارلىق بولىمشەلەر ساۋاتتى تۇردە جانە ۇيىمشىلدىقپەن ارەكەت ەتتى. قورىتا ايتار بولساق، شىۇ اياسىنداعى ىنتىماقتاستىق مىندەتتى تۇردە وڭ ناتيجەگە جەتكىزەتىن بولادى، – دەدى رەسەي فقق باسشىسىنىڭ ءبىرىنشى ورىنباسارى سەرگەي سميرنوۆ.

ايتا كەتۋ كەرەك، پوليگوندا بولعان وقيعالار ستسەناريى شىناي جاعدايعا مەيلىنشە جاقىنداستىرىلىپ قۇرىلدى. ۇيىمداستىرۋشىلار وقۋ-جاتتىعۋ بارىسىندا جيناقتالعان تاجىريبە شىۇ كەڭىستىگىندەگى قاۋىپسىزدىكتى جانە قازىرگى كەزدەگى بولۋى مۇمكىن قاۋىپ-قاتەر جاعدايىندا جەدەل مىندەتتەردى ورىنداۋعا يگى ىقپالىن تيگىزەتىنىن اتاپ ءوتتى.

وقۋ-جاتتىعۋ اياسىندا اسكەري تەحنيكالار مەن قارۋ كورمەسى ۇيىمداستىرىلىپ، ارنايى ماقساتتاعى جانە باسقا دا اسكەري بولىمشەلەر كورنەكى ماشىقتارىن كورسەتتى.

سوڭعى جاڭالىقتار

دوللار ارزاندادى

قارجى • بۇگىن، 15:58

ۇقساس جاڭالىقتار