پرەمەر-ءمينيستردىڭ ءبىرىنشى ورىنباسارى – قارجى ءمينيسترى ءا. سمايىلوۆ اتاپ وتكەندەي, مەملەكەت باسشىسىنىڭ تاپسىرماسى بويىنشا قازاقستان ۇكىمەتى حالىقتىڭ ءال-اۋقاتىن ارتتىرۋدىڭ وزەكتى الەۋمەتتىك ماسەلەلەرىن شەشۋ ماقساتىندا الەۋمەتتىك سيپاتتاعى شۇعىل شارالار پاكەتىن ازىرلەدى.
وسى جىلدىڭ سوڭىنا دەيىن 300 مىڭنان استام جۇمىسسىز ءارى ءوزىن-ءوزى جۇمىسپەن قامتىعان ازاماتتار جۇمىسپەن قامتۋعا جاردەمدەسۋ شارالارىمەن قامتىلادى. سونىڭ ىشىندە «باستاۋ بيزنەس» جانە «جاس كاسىپكەر» باعدارلامالارى اياسىندا قىسقامەرزىمدى كاسىپتىك وقىتۋدان وتەدى.
ءوز ءىسىن اشۋعا مۇددەلى ازاماتتارعا جەڭىلدىكتى نەسيەلىك قاراجاتتار مەن گرانتتار بەرۋ ارقىلى كاسىپكەرلىك قىزمەتتى ىنتالاندىرۋعا ۇلكەن كوڭىل بولىنەدى. حالىقتىڭ اسا ءالجۋاز توپتارىنا اتاۋلى الەۋمەتتىك كومەك بەرۋ پروتسەسىنىڭ تيىمدىلىگىن ارتتىرۋ كوزدەلگەن. «ۇكىمەت پەن ۇلتتىق بانكتىڭ ماڭىزدى مىندەتى – باسپانا قولجەتىمدىلىگىن كەڭەيتۋ. وسى ماقساتتا حالىقتىڭ از قامتىلعان توپتارىنا ارەندالىق تۇرعىن ءۇي قۇرىلىسىنىڭ كولەمى ەكى ەسە ۇلعايتىلادى (جىلىنا 20 مىڭ پاتەرگە دەيىن) جانە جۇمىس ىستەيتىن جاستار ءۇشىن ءۇش ەسەگە ۇلعايتىلادى (جىلىنا 1 مىڭنان 3 مىڭعا دەيىن)», — دەدى ءا. سمايىلوۆ.
بارلىق وڭىردە ىستىق تاماق بەرۋ, تەگىن جول اقىسى, مەكتەپكە قاجەتتى زاتتارمەن قامتاماسىز ەتۋدى قوسا العاندا, از قامتىلعان وتباسىلاردىڭ بالالارى ءۇشىن الەۋمەتتىك قولداۋ شارالارى جۇيەلەندىرىلەدى.
جاستاردى وندىرىستىك جۇمىسقا بەلسەندى تارتۋ بويىنشا ناقتى شارالار قابىلدانادى. 1 قىركۇيەكتەن باستاپ 123 مىڭ ادامدى قامتي وتىرىپ, تجكبب-دە جۇمىسشى ماماندىقتارى بويىنشا وقيتىن جاستاردىڭ شاكىرتاقىلارى 30% ۇلعايتىلادى.
«اتالعان شارالاردى قابىلداۋ قازاقستاندىقتاردىڭ تۇرمىس ساپاسى مەن الەۋمەتتىك كوڭىل-كۇيىنىڭ جاقسارۋىنا جاڭا سەرپىن بەرەدى», —دەپ تۇيىندەدى ءا. سمايىلوۆ.
