«ەلىمىزدەگى الەۋمەتتىك وسال توپتاعى ازاماتتار - كوپبالالى وتباسىلار, مۇگەدەك بالالارى بار وتباسىلار, جالعىز اسىراۋشىسىنان ايىرىلعان وتباسىلار, اتاۋلى الەۋمەتتىك كومەك الاتىندار جانە جەتىم بالالار ءتۇرلى سەبەپتەرمەن قيىن جاعدايعا تاپ بولىپ, ءوز اتتارىنا العان نەسيەلىك مىندەتتەمەلەرىن ورىنداي الماي وتىر. بۇل ماسەلە 500 مىڭعا جۋىق نەسيە الۋشىنىڭ تۇرمىسىنا تىكەلەي اسەر ەتۋدە. سوندىقتان, پرەزيدەنت بۇرىن-سوڭدى بولماعان تەڭدەسسىز الەۋمەتتىك كومەك كورسەتۋ تۋرالى شەشىم قابىلدادى. ءتيىستى جارلىققا قول قويىلدى. باستى ماقسات - قيىن جاعدايعا تاپ بولعان ازاماتتارعا كومەكتەسۋ, ولارعا وزدەرىنىڭ وتباسىلارىنىڭ قارجىلىق احۋالىن ايتارلىقتاي جاقسارتۋعا مۇمكىندىك بەرۋ», - دەدى ءاليحان سمايىلوۆ بۇگىن ۇكىمەتتىڭ ءباسپاسوز ورتالىعىندا.
ونىڭ ايتۋىنشا, جارلىقتا ۇكىمەتكە جانە ۇلتتىق بانككە بىررەتتىك اكتسيا رەتىندە كەلەسى شارالاردى قابىلداۋ تاپسىرىلعان. «تىكەلەي جانە اتاۋلى قارجىلاي كومەك رەتىندە اتالعان ساناتتاعى ازاماتتار ءۇشىن مەملەكەت ەكىنشى دەڭگەيلى بانكتەر مەن شاعىن قارجى ۇيىمدارىنان الىنعان جالپى مولشەرى 300 مىڭ تەڭگەگە دەيىن نەگىزگى نەسيەنى جانە وعان ەسەپتەلگەن سىياقىنى وتەيدى. بۇدان بولەك, ولاردىڭ بيىلعى 1 ماۋسىمعا دەيىنگى قارىزدارىنىڭ جالپى كولەمى 3 ملن تەڭگەدەن اسپاۋى ءتيىس», - دەدى ول.
ء اليحان سمايىلوۆتىڭ ايتۋىنا قاراعاندا, 2019 جىلدىڭ 1 شىلدەسىندەگى مالىمەت بويىنشا, بانكتەردە جانە شاعىن قارجى ۇيىمدارىندا كەپىلسىز تۇتىنۋ قارىزدارى بار بارلىق ازاماتتار ءۇشىن ەسەپتەلگەن ايىپپۇلدار مەن تولەماقى وسىمدەرى ەسەپتەن شىعارىلادى. نەسيە الۋشىلاردىڭ اتالعان تولەمدەرىن ەسەپتەن شىعارۋ, ەڭ الدىمەن, ەكىنشى دەڭگەيدەگى بانكتەر مەن شاعىن قارجى ۇيىمدارىنىڭ ەسەبىنەن جۇرگىزىلەدى. سونىمەن قاتار, نەسيە بەرۋگە, نەسيەگە قاتىستى قىزمەت كورسەتۋگە جانە جەكە تۇلعالاردىڭ 90 كۇننەن استام مەرزىمى وتكەن بارلىق كەپىلسىز قارىزدارىنا بايلانىستى ءوسىمپۇل, كوميسسيا جانە وزگە دە تولەمدەر ەسەپتەۋگە تىيىم سالىنادى.
«تۇتىنۋشىلىق نەسيەلەرگە قاتىستى قالىپتاسىپ وتىرعان جاعداي قايتالانباۋى ءتيىس. بۇل - پرەزيدەنتتىڭ ۇستانىمى. مەملەكەت باسشىسىنىڭ تاپسىرماسى بويىنشا مۇنداي احۋالدىڭ الدىن الۋ ماقساتىندا ۇلتتىق بانك رەتتەۋ سيپاتىنداعى قاتاڭ شارالار قابىلداپ, شەكتەن تىس تاۋەكەلگە بارعانى ءۇشىن قارجى ۇيىمدارىنا جۇكتەلەتىن جاۋاپكەرشىلىكتى كۇشەيتۋى ءتيىس. قارجىلىق احۋالىن ودان ءارى ناشارلاتپاۋ ءۇشىن تابىسى ەڭ تومەنگى كۇنكورىس دەڭگەيىندەگى ازاماتتارعا زايمدار بەرۋگە تىيىم سالىناتىن بولادى. ۇلتتىق بانك كەپىلسىز تۇتىنۋ زايمدارىن بەرۋ كەزىندە قوسىمشا رەتتەۋ شارالارىن قابىلدايدى. ولاردىڭ ىشىندە - زايم الۋشىنىڭ جالپى قارىزدىق كوەففيتسيەنتى, بانكتەردىڭ جەكە كاپيتالىنا دەگەن قوسىمشا تالاپتار جانە باسقالارى», - دەدى ۇكىمەت باسشىسىنىڭ ءبىرىنشى ورىنباسارى.
ايتا كەتسەك, كەشە قر پرەزيدەنتى قاسىم-جومارت توقاەۆ «قازاقستان رەسپۋبليكاسى ازاماتتارىنىڭ قارىز جۇكتەمەسىن ازايتۋ تۋرالى» جارلىققا قول قويعان بولاتىن.
