ايماقتار • 27 ماۋسىم، 2019

الەۋمەتتىك نىسانداردىڭ قۇرىلىسى قارقىندى

261 رەت كورسەتىلدى

قىزىلوردا وبلىسىنىڭ اكىمى قىرىم­بەك كوشەرباەۆ حالىققا جانە مەملەكەت­تىك قىزمەتكە ىڭعايلى ءارى ءتيىمدى بولۋ ءۇشىن قازالى اۋدانىندا ءبىر-بىرىمەن قويىنداسىپ جاتقان ايتەكە بي كەنتى مەن قازالى قالاسىن ءبىر جەرگە شوعىرلاندىرۋ ماسەلەسىن كوتەرگەن ەدى.

بۇگىندە ايتەكە بي كەنتىندە ەكى قاباتتى 12 تۇرعىن ءۇي قۇرىلىسى، 250 ورىندىق اۋداندىق اۋرۋحانا، 600 ورىندىق مادەنيەت ءۇيى مەن باسقا دا الەۋمەتتىك نىسانداردى سالۋ جوسپارلانىپ وتىر. سونداي-اق بۇل اۋماقتا الداعى ۋاقىتتا 24 كاسىپكەرلىك نىسان بوي كوتەرىپ، اۆتوموبيل جولى قايتا جاڭارتىلادى. قازىردىڭ وزىندە كوپقاباتتى 6 تۇرعىن ءۇيدىڭ قۇرىلىسى جۇرگىزىلىپ جاتىر.

قازالى اۋدانىنىڭ ورتالىعى ايتەكە بي كەنتىندە جالپى قۇنى 889،7 ملن تەڭگە بولاتىن مەكەمەلەر ءۇيىنىڭ قۇرىلىسى باستالىپ كەتتى. اتالعان جوبانى ىسكە اسىرۋ ءبىر عي­ما­رات­تا اكىمدىك پەن اۋداندىق بولىمدەردى شو­عىر­­­لاندىرۋعا مۇمكىندىك بەرەدى. ولار قازىرگى ۋاقىت­تا ەلدى مەكەننىڭ ءار اۋماعىندا ورنالاسقان.

– قازىر اۋداندىق اكىمدىك پەن بولىمدەر بولەك عيماراتتاردا ورنالاسقان. بۇل تۇرعىندار ءۇشىن وتە قولايسىز. ونىڭ ۇستىنە، قازىرگى اۋدان اكىمدىگى عيماراتىنىڭ ىرگەتاسى 1963 جىلى قالانعان. ەلۋ جىلدان استام ۋاقىت تۇرعان نىسان ابدەن ەسكىرگەن. جاڭا اۋدان ورتالىعىنىڭ جوسپارىنا سايكەس، وبلىستىق مەكەمەلەر ءۇيىنىڭ، حالىققا قىزمەت كورسەتۋ ورتالىعىنىڭ، مەكتەپتەر مەن اۋرۋحانالاردىڭ، سونداي-اق سوت پەن مادەنيەت ۇيلەرىنىڭ عيماراتتارى حالىققا ىڭعايلى بولۋ ءۇشىن ءبىر-بىرىنە جاقىن ورنالاستىرىلادى. اۋداندا سوڭعى ەكى جىلدا ينفراقۇرىلىم­دىق جانە باسقا دا نىسانداردىڭ قۇرىلىسى قارقىندى جۇرگىزىلۋدە. سەبەبى قازالى اۋدانى ينفراقۇرىلىممەن از قامتىلعان اۋدانداردىڭ ءبىرى سانالادى، – دەيدى وبلىستىق قۇرىلىس، ساۋلەت جانە قالا قۇرىلىسى باسقارماسىنىڭ باسشىسى مۇحامەديسا السەرىكوۆ.

اۋداندا جول قۇرىلىسى مەن جوندەۋ جۇمىستارىنا باسىمدىق بەرىلگەن. سەبەبى بۇل قازالى اۋدانىنداعى ەڭ وزەكتى ماسەلەلەردىڭ ءبىرى سانالادى.

ايماقتا 2013 جىلدان باستاپ 200-دەن استام الەۋمەتتىك نىسان پايدالانۋعا بەرىلگەن ەكەن. ولاردىڭ قاتارىندا دەنساۋلىق ساقتاۋ، ءبىلىم بەرۋ، سپورت جانە مادەنيەت نىساندارى بار. اپاتتى جاعدايداعى 57 دەنساۋلىق ساقتاۋ نىسانىنىڭ ورنىنا جاڭادان 49 عيمارات بوي كوتەرگەن. قالعانى 2019 جىلى سالىناتىن بولادى. سول سياقتى، 2018 جىلى قىزىلوردا وبلىسى ءۇشىن رەكوردتىق كورسەتكىش ورناپ 700 مىڭ شارشى مەتر تۇرعىن ءۇي پايدالانۋعا بەرىلدى.

وڭىردە ءۇش اۋىسىمدا وقىتۋ ماسەلەسى مەن «بالاپان» باعدارلاماسى مەرزىمىنەن بۇرىن شەشىلىپ، 3-6 جاس ارا­لىعىنداعى بالالار مەكتەپكە دەيىنگى تاربيە جانە بىلىممەن 100% قامتىلدى. 2017 جىلى وبلىستا اپاتتى جاعدايداعى مەكتەپتەر ماسەلەسى شەشىمىن تاپتى. 2013 جىلى جارامسىز دەپ تانىلعان 37 ءبىلىم ۇياسى بولعان ەدى. 2013 جىلدان بەرى اپاتتى ۇيدە تۇرىپ كەلگەن 645 وتباسى جاڭا باسپاناعا يە بولدى. قازىرگى تاڭدا وبلىس اۋماعىندا 1747 پاتەرلىك 69 تۇرعىن ءۇيدىڭ قۇرىلىسى جۇرگىزىلىپ جاتىر.

ءسوز ىڭعايىندا ايتار بولساق، 2013-2016 جىلدارى قىزىلوردا وبلىسىندا 2008 جىلدان بەرى اياقتالماي، قۇرىلىسى ۇزاققا سوزىلىپ كەلگەن 34 نىساننىڭ ماسەلەسى شەشىلدى. ايماق الەۋمەتتىك ماسەلەلەردى شەشۋدە رەسپۋبليكادا الدىڭعى قاتاردا كەلەدى.

 

قىزىلوردا وبلىسى

 

سوڭعى جاڭالىقتار

ەلەنگەن ەرلىك

ايماقتار • بۇگىن، 13:22

قاراشادا كۇن سۋىتادى

اۋا رايى • بۇگىن، 11:59

پنەۆمونيادان تاعى 5 ادام كوز جۇمدى

كوروناۆيرۋس • بۇگىن، 09:35

قاۋىپتى ىندەتكە قارسى قامدانىس

كوروناۆيرۋس • بۇگىن، 07:40

ۇلتتىڭ جاڭا بولمىسى

پىكىر • بۇگىن، 07:35

پيك-ءتىڭ ورنىنا – جاڭا ۇيىم

ايماقتار • بۇگىن، 07:27

ۇقساس جاڭالىقتار