25 ماۋسىم، 2019

شىعىس قازاقستان ارىس تۇرعىندارىن قابىلداۋعا دايىن

307 رەت كورسەتىلدى

وبلىس اكىمدىگى قىزمەتكەرلەرىنىڭ ارىس قالاسىنا شىعۋى جوسپارلانۋدا، وندا جەرگىلىكتى تۇرعىندارعا 1 528 بوس ورىن ۇسىنىلادى.


شىعىس قازاقستاندا 2017 جىلدان باستاپ "ەڭبەك" ناتيجەلى جۇمىسپەن قامتۋ مەن جاپپاي كاسىپكەرلىكتى دامىتۋ باعدارلاماسى جۇزەگە اسىرىلۋدا. وبلىستىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسىنىڭ مالىمەتىنە سۇيەنسەك، بيىل قونىس اۋدارۋ باعدارلاماسى بويىنشا وڭىرگە 1566 ادامعا كۆوتا ءبولىنىپتى. بۇل ماقساتقا رەسپۋبليكالىق بيۋدجەتتەن 736 ملن.تەڭگە قارجى قاراستىرىلىپتى. «قاڭتار ايىنان بەرى شىعىس قازاقستانعا 560 استام ادام كەلدى. تۇركىستان وبلىسىنداعى قايعىلى وقيعالارعا بايلانىستى ءبىز ارىس قالاسىنان مىڭداعان ادامدى قابىلداۋعا دايىنبىز. وسى ماقساتتا وبلىس اكىمدىگى قىزمەتكەرلەرىنىڭ ارىس قالاسىنا شىعۋى جوسپارلانۋدا، وندا جەرگىلىكتى تۇرعىندارعا 1 528 بوس ورىن ۇسىنىلادى. بوس ورىندار جارمەڭكەلەرى، قاجەتتى اڭگىمەلەسۋلەر مەن كەڭەستەر وتكىزىلەدى. ەگەر قاجەتتىلىك بولسا، ءبىز ەڭبەك جانە الەۋمەتتىك قورعاۋ مينيسترلىگىنە كۆوتا جانە قارجىلاندىرۋدى ارتتىرۋ ماسەلەسىمەن جۇگىنە الامىز» دەيدى وبلىس اكىمىنىڭ ورىنباسارى اسەم ءنۇسىپوۆا.

بۇگىن وڭىرىمىزدە تۇركىستان وبلىسىنىڭ ارىس قالاسىنىڭ تۇرعىندارىنا كومەك كورسەتۋ ماقساتىندا ارنايى شتاب قۇرىلعان-دى. ايماق باسشىسىنىڭ ءوزى جەتەكشىلىك ەتەتىن شتابتىڭ قۇرامىنا وبلىس اكىمىنىڭ ورىنباسارلارى، «Nur Otan» پارتياسى وبلىستىق فيليالى توراعاسىنىڭ ءبىرىنشى ورىنباسارى، باق وكىلدەرى مەن قوعامدىق بىرلەستىك وكىلدەرى ەنىپ وتىر. وبلىس اكىمدىگىندە سەلەكتورلىق رەجيمدە وتكەن بريفينگتە دانيال احمەتوۆ ءوڭىر تۇرعىندارىن، ايماقتاعى ءىرى كاسىپورىن باسشىلارى مەن كاسىپكەرلەردى ارىس حالقىنا قولدان كەلگەنشە كومەك كورسەتۋگە شاقىرعان-دى. ءوڭىردىڭ «كازتسينك» جشس، «ءۇمز» اق، «تمك» اق، باقىرشىق تاۋ-كەن ءوندىرۋ كاسىپورنى سەكىلدى ءىرى ءوندىرىس ورىندارى باستامانى قولداپ، 107 ملن. تەڭگە قارجى اۋدارىپتى. ال وبلىستىڭ  ەتنومادەني بىرلەستىكتەرى ارىس قالاسىنىڭ تۇرعىندارىنا كومەك كورسەتۋ قورىنا 738 مىڭ تەڭگە جىبەرىپتى.

وسكەمەن

سوڭعى جاڭالىقتار

ۇرلانعان 28 كولىك تابىلدى

وقيعا • بۇگىن، 15:11

اتىراۋدا 23 ادامدى شايان شاققان

ايماقتار • بۇگىن، 13:35

ۇقساس جاڭالىقتار