كەلىسىمگە قازاقستان پرەمەر-ءمينيسترىنىڭ ورىنباسارى گۇلشارا ابدىقالىقوۆا مەن يۋنەسكو-نىڭ باس ديرەكتورى ودري ازۋلە قول قويدى.
اتالعان قۇرىلىمدى يۋنەسكو اياسىنداعى قازاقستان رەسپۋبليكاسى مادەنيەت جانە سپورت مينيسترلىگى جانىنداعى مادەنيەتتەر جاقىنداسۋى ورتالىعى نەگىزىندە قۇرۋ جوسپارلانۋدا. ءتيىستى وتاندىق باستاما 2017 ج. قاراشادا ۇيىمنىڭ 39-شى باس كونفەرەنتسياسىندا ماقۇلدانعان بولاتىن.
ورتالىقتىڭ ماقساتتارى ورتالىق ازيادا جانە باسقا دا وڭىرلەردە مادەنياتارالىق ىقپالداستىقتىڭ تاريحى مەن تاجىريبەسى بويىنشا عىلىمي زەرتتەۋلەر جۇرگىزۋ, باسىلىمدار دايىنداۋ, كونفەرەنتسيالار ۇيىمداستىرۋ جانە اعارتۋ جۇمىستارىن اتقارۋ بولىپ تابىلادى.
و. ازۋلە يۋنەسكو قىزمەتىنە قازاقستاننىڭ مازمۇندى ۇلەسىن اتاپ ءوتىپ, جاڭا ورتالىق مادەنيەتارالىق ديالوگتىڭ وڭىرلىك جانە الەمدىك دەڭگەيدە ىلگەرىلەۋىنە ءوزىنىڭ وڭ سەپتىگىن تيگىزەتىنىنە سەنىمدىلىگىن جەتكىزدى.
قول قويۋ راسىمىنەن كەيىن وتكەن كەزدەسۋ بارىسىندا ۆيتسە-پرەمەر گ. ابدىقالىقوۆا سۇحباتتاسىن قازاقستانداعى پرەزيدەنتتىك سايلاۋدىڭ ناتيجەلەرىن, جاڭا مەملەكەت باسشىسى قاسىم-جومارت توقاەۆتىڭ سىرتقى جانە ىشكى ساياساتىنداعى باسىمدىقتارى جانە ولاردىڭ ەلباسى ن. ءا. نازارباەۆتىڭ باعىتىمەن ساباقتاستىعى, ەلىمىزدەگى «رۋحاني جاڭعىرۋ» قوعامدىق سانانى جاڭعىرتۋ باعدارلاماسىن, « ۇلى دالانىڭ جەتى قىرى» ماقالاسىنىڭ باسىم باعىتتارىن جانە جاستار جىلى شەڭبەرىندەگى شارالاردىڭ جۇزەگە اسىرىلۋى تۋرالى حاباردار ەتتى.
سونداي-اق گ. ابدىقالىقوۆا و. ازۋلەنى تۇركىستان قالاسىنىڭ دامۋى تۋرالى جانە مەملەكەتىمىزدىڭ ءتيىستى جوبالاردى جۇزەگە اسىرۋدا ولاردىڭ قوجا احمەت ياساۋي كەسەنەسىنىڭ دۇنيەجۇزىلىك مۇرا مارتەبەسىن ەسكەرە وتىرىپ جانە تاريح پەن مادەنيەتتىڭ ايتۋلى ەسكەرتكىشتەرىن قورعاۋداعى حالىقارالىق ستاندارتتارعا سايكەس بولۋىنا بارىنشا مىندەتتىلىگىن سەندىردى.
سونىمەن قاتار پرەمەر-ءمينيستردىڭ ورىنباسارى يۋنەسكو-نىڭ باس ديرەكتورىن كەلەسى جىلى ۇيىمنىڭ شتاب-پاتەرىندە قازاقتىڭ ۇلى اقىنى مەن ويشىلى اباي قۇنانباي ۇلىنىڭ 175-جىلدىعىن تويلاۋ بويىنشا حالىقارالىق ءىس-شارالارعا قولداۋ كورسەتۋدى سۇرادى.
ءوز كەزەگىندە و.ازۋلە گ. ابدىقالىقوۆاعا مازمۇندى اڭگىمە ءۇشىن العىسىن ءبىلدىردى جانە جاھاندىق, وڭىرلىك دەڭگەيدەگى قازاقستاننىڭ ۇلەسىن اتاپ ءوتتى.
