ەلىمىزگە قايعى اكەلگەن وسى كۇندەردە جەكە ءوزىمنىڭ جانە سەنات دەپۋتاتتارىنىڭ اتىنان قازا تاپقان جانە زارداپ شەككەندەردىڭ وتباسىلارىنا قايعىرىپ كوڭىل ايتامىن. سىزدەر دۋشار بولعان قايعىعا ورتاقتاسىپ, بىرگە قايعىرامىز, ءبىز سىزدەرمەن بىرگەمىز.
ارىس تۇرعىندارىنا قول ۇشىن سوزعان قازاقستاندىقتارعا ەرەكشە العىس ايتامىز. جۇرەگى مەيىرىمگە تولى مىڭداعان جاندار ادامداردى كوشىرۋگە كومەكتەستى, تاماقپەن, كيىم-كەشەكپەن ءبولىسىپ, باسپاناسىز قالعانداردى ۇيلەرىنە ورنالاستىردى, جوعالعان بالالاردى ىزدەۋگە كومەك بەردى.
ەرجۇرەك اسكەري قىزمەتشىلەر تاۋەكەلگە بەل بۋىپ توتەنشە جاعداي ايماعىنان ادامداردى كوشىردى, وتپەن, ورتپەن كۇرەستى. ادامدار قاۋىپسىزدىگىن قامتاماسىز ەتۋ جانە ۋاقىتشا قيىندىقتاردى باستان وتكەرۋگە كومەكتەسۋ ءۇشىن دارىگەرلەر, پوليتسيا قىزمەتكەرلەرى, ءورت سوندىرۋشىلەر, ەرىكتىلەر, رەسپۋبليكالىق جانە جەرگىلىكتى بيلىك ورگاندارى قولدان كەلگەننىڭ ءبارىن جاساۋدا. زارداپ شەككەندەردىڭ ءبارى تەزىرەك ساۋىعۋىن تىلەيمىز.
ءبىزدىڭ كۇشىمىز بىرلىك پەن قايىرىمدىلىقتا جانە راقىمشىلىقتا ەكەنىن قازاقستاندىقتار تاعى دا پاش ەتتى. بۇكىل ەلىمىزدە ارىس تۇرعىندارى ءۇشىن كيىم-كەشەك, اقشا جانە ازىق-ت ۇلىك جيناقتالىپ جاتىر.
ءبىز تەك بىرىگە وتىرىپ بارلىق قيىندىقتاردى ەڭسەرەمىز, مۇقتاجداردى قولداۋ ارقىلى ارىستى قالپىنا كەلتىرە الامىز.
قازاقستان رەسپۋبليكاسى پارلامەنتى سەناتىنىڭ دەپۋتاتتارى مەن سەنات اپپاراتىنىڭ قىزمەتكەرلەرى ءبىر كۇندىك ەڭبەكاقىلارىن ارىس قالاسىندا توتەنشە وقيعا سالدارىنان زارداپ شەككەندەرگە اۋداردى.
قازاقستان رەسپۋبليكاسى
پارلامەنتى سەناتىنىڭ توراعاسى داريعا نازارباەۆا
