25 ماۋسىم، 2019

شىعىس قازاقستاندا ارنايى شتاب قۇرىلدى

274 رەت كورسەتىلدى

تۇركىستان وبلىسىنىڭ ارىس قالاسىنىڭ تۇرعىندارىنا كومەك كورسەتۋ ماقساتىندا شىعىس قازاقستاندا ارنايى شتاب قۇرىلدى


تۇركىستان وبلىسىنىڭ ارىس قالاسىنىڭ تۇرعىندارىنا كومەك كورسەتۋ ماقساتىندا شىعىس قازاقستاندا ارنايى شتاب قۇرىلدى. ايماق باسشىسىنىڭ ءوزى جەتەكشىلىك ەتەتىن شتابتىڭ قۇرامىنا وبلىس اكىمىنىڭ ورىنباسارلارى، «Nur Otan» پارتياسى وبلىستىق فيليالى توراعاسىنىڭ ءبىرىنشى ورىنباسارى، باق جانە قوعامدىق بىرلەستىك وكىلدەرى ەنىپ وتىر.

وبلىس اكىمدىگىندە سەلەكتورلىق رەجيمدە وتكەن بريفينگتە دانيال احمەتوۆ ءوڭىر تۇرعىندارىن، ايماقتاعى ءىرى كاسىپورىن باسشىلارى مەن كاسىپكەرلەردى ارىس حالقىنا قولدان كەلگەنشە كومەك كورسەتۋگە شاقىردى. «بۇگىنگى جيىنعا مەملەكەتتىك قىزمەتشىلەرمەن قاتار بيزنەس وكىلدەرى مەن جۋرناليستەردى دە شاقىردىم. جەرلەستەرىمىز ارىستىقتاردىڭ قايعىسىنا بەي-جاي قارامايدى دەپ سەنەمىن. كاسىپورىن باسشىلارى ءوز ۇجىمدارىمەن كەزدەسىپ، ارىپتەستەرىن قيىن جاعدايعا دۋشار بولعان اعايىنعا جاردەمدەسۋگە شاقىرۋى ءتيىس. تەك ماجبۇرلەۋ دەگەننەن اۋلاق بولىڭىزدار. بارلىق جۇمىس ەرىكتى تۇردە جۇرگىزىلۋى كەرەك. قازىر اپاتتان زارداپ شەككەن وتباسىلاردىڭ بالالارىن شىعىس قازاقستانداعى لاگەرلەردە دەمالتۋ ماسەلەسىن قاراستىرۋدامىز»، – دەدى وبلىس اكىمى.

قازىر شىعىس قازاقستاندا بىرنەشە جەردە گۋمانيتارلىق كومەك كورسەتۋ پۋنكتتەرى اشىلىپ، جۇمىس ىستەپ جاتىر. كەشە وسكەمەندە «Nur Otan» پارتياسى وبلىستىق فيليالىنىڭ عيماراتىندا (قاسىم قايسەنوۆ كوشەسى، 121) وسىنداي پۋنكت اشىلعان بولاتىن. مۇندا گيگيەنالىق زاتتار، كونسەرۆىلەر، ءداندى داقىلدار مەن ماكارون ونىمدەرى جانە جەمىس-جيدەكتەر، سۋ، بالالارعا ارنالعان كيىم-كەشەكتەر، كورپە جانە كورپەشىلەر قابىلدانادى. اتالعان فيليال توراعاسىنىڭ ورىنباسارى ولەگ چۋگۋنكوۆتىڭ ايتۋىنشا، ءدال قازىر پۋنكتكە قالا تۇرعىندارىنان كومەك قابىلدانىپ جاتىر. جينالعان زاتتار قىسقا مەرزىمدە ارىسقا جونەلتىلەدى. بۇگىن وبلىس ورتالىعىنداعى حاليفا التاي مەشىتى «شىعىس ارىسپەن بىرگە» قايىرىمدىلىق اكتسياسىن باستادى. «وبلىستىق مەشىت پەن اۋداندىق مەشىتتەر ءارتۇرلى كومەك تۇرلەرىن قابىلداپ، ارىس تۇرعىندارىنا جونەلتۋگە ءازىر» دەيدى قازاقستان مۇسىلماندارى ءدىني باسقارماسى وسكەمەن ءوڭىرى بويىنشا وكىل يمامى ەرمەك مۇقاتاي.

سونىمەن قاتار وبلىستاعى بارلىق جاستار رەسۋرستىق ورتالىقتارىندا (ولاردىڭ سانى – 20) ارىس تۇرعىندارىنا گۋمانيتارلىق كومەك قابىلدانىپ جاتىر. وسكەمەندەگى گۋمانيتارلىق كومەك كورسەتۋ شتابى پوتانين كوشەسى، 27/1 مەكەنجايىندا ورنالاسقان.


وسكەمەن

سۋرەتتەردى تۇسىرگەن تىلەۋبەك شاياحمەت


سوڭعى جاڭالىقتار

ۇرلانعان 28 كولىك تابىلدى

وقيعا • بۇگىن، 15:11

اتىراۋدا 23 ادامدى شايان شاققان

ايماقتار • بۇگىن، 13:35

سپورت جاڭالىقتارىنا شولۋ

سپورت • بۇگىن، 09:11

ۇقساس جاڭالىقتار