بۇل جايتقا ءبىز بەكەر نازار اۋدارىپ وتىرعان جوقپىز. ءتورت جىلدا ءبىر وتەتىن وليمپيا ويىندارىنا قاتىساتىن دزيۋدوشىلار ءدال وسى رەيتينگى ارقىلى انىقتالادى. تارقاتىپ ايتساق, ءار سالماقتىڭ 18 ۇزدىگى وليمپيادا جولداماسىنا بىردەن يەلىك ەتەدى. ودان كەيىن قۇرلىقتار اراسىنداعى تەپە-تەڭدىكتى ساقتاۋ ماقساتىندا قوسىمشا 100 جولداما تاراتىلادى. ولار دزيۋدو كۇرەسىنىڭ دامۋىنا كوڭىل ءبولىپ جاتقان جەر-جاھانداعى ءار مەملەكەتتىڭ وكىلدەرىنە بەرىلەدى. ەرلەر مەن ايەلدەردى قوسا العاندا عالامدىق دودادا بارلىعى 352 تاتامي شەبەرى باق سىنايدى. ال ەگەر ءبىر مەملەكەتتىڭ بىرنەشە وكىلى ۇزدىكتەر قاتارىنان كورىنگەن جاعدايدا, جولداما رەيتينگتە ەڭ جوعارى ورىندى يەلەنگەن بالۋانعا بۇيىرادى.
قازاقستاننىڭ ەرلەر قۇراماسى مۇشەلەرى اراسىنان ەڭ جوعارى ورىندا ەل ماقتانىشى ەلدوس سمەتوۆ تۇر. 60 كيلو سالماقتا كۇش سىناسىپ جۇرگەن ريو وليمپياداسىنىڭ كۇمىس جۇلدەگەرى, الەم جانە قۇرلىق چەمپيونى, ازيا ويىندارىنىڭ جەڭىمپازى قازىرگى كەزدە التىنشى ورىندى يەلەنۋدە. بىلتىر باكۋدە ءوتكەن دۇنيەجۇزىلىك دودادا 66 كيلو سالماق دارەجەسىندە بەلدەسىپ, كۇمىس مەدالدى موينىنا ىلگەن ەرلان سەرىكجانوۆ جەتىنشى ساتىعا جايعاستى. قۇرلىقتىق دەڭگەيدەگى رەسمي جارىستاردا سان مارتە جەڭىس تۇعىرىنا كوتەرىلگەن 90 كيلو سالماقتاعى يسلام بوزباەۆ 10-ورىنعا تابان ءتىرەدى. سونىمەن قاتار تاعى ءتورت قانداسىمىز «توپ-20» بالۋاننىڭ قاتارىندا. عۇسمان قىرعىزباەۆ (60 كيلو) پەن ەلدوس جۇماقانوۆ (66 كيلو) 12-ورىندى ەنشىلەسە, ديدار حامزا (81 كيلو) – 16 جانە جانساي سماعۇلوۆ (73 كيلو) 19-ساتىعا تۇراقتادى.
ءبىزدىڭ ەڭ ولقى سوعىپ تۇرعان تۇسىمىز – الىپتارىمىزدىڭ ءالسىزدىگى. ماسەلەن, +100 كيلو سالماق ءدارەجەلەرىندە ايقاساتىن ەراسىل قاجىباەۆ قازىرگى كەزدە نەبارى 33-ورىندى, ال 100 كيلو سالماقتاعى ايبەك سەرىكباەۆ پەن ۆيكتور دەميانەنكو 61 جانە 64-ورىنداردى قاناعات تۇتۋدا. ەگەر الداعى ۋاقىتتا ولار قارقىندارىن كۇرت كۇشەيتپەسە, وليمپيادا دۋىنان شەت قالۋلارى ابدەن مۇمكىن.
ايەلدەر اراسىندا جالعىز عانا وتگونتسەتسەگ گالبادراح «توپ-10» دزيۋدوشىنىڭ قاتارىنا ەنۋدە. 48 كيلو سالماقتاعى قايسار قىز توعىزىنشى ورىندى ولجالاۋدا. ال وزگە ارۋلارىمىزدىڭ قارقىنى تىم باياۋ.
بۇگىنگى تاڭدا ەرلەردىڭ الەمدىك رەيتينگىندە رەسەي مەن جاپونيا قۇراما كوماندالارى مۇشەلەرىنىڭ قاراسى مول. رەسەيلىكتەردىڭ – 9, جاپونداردىڭ 8 جىگىتى «توپ-10» دزيۋدوشى ساناتىندا. موڭعوليانىڭ – 6, گرۋزيا مەن ءيزرايلدىڭ – 5, برازيليا مەن وڭتۇستىك كورەيانىڭ – 4, قازاقستان, ازەربايجان جانە گوللانديانىڭ 3 ورەنى مىقتىلار تىزىمىنە قوسىلدى. ال ايەلدەر اراسىندا جاپونيانىڭ – 3, فرانتسيانىڭ – 2 جانە برازيليا مەن كۋبانىڭ 1 بالۋانى الەمدىك رەيتينگتە كوش باسىندا كەلەدى.
