وتكەن جۇمادا ۇكىمەتتىڭ ءباسپاسوز الاڭىندا وتكەن جيىندا سىرتقى ىستەر ءمينيسترىنىڭ ورىنباسارى ەرمەك كوشەرباەۆ وسى باعىتتا اتقارىلعان جۇمىستارمەن تانىستىردى.
− بۇگىندە قازاقستان تارتىلعان تىكەلەي شەتەلدىك ينۆەستيتسيا كولەمى بويىنشا ورتالىق ازيادا كوش باستاپ وتىر. تاۋەلسىزدىك جىلدارىندا ەل ەكونوميكاسىنا 320 ملرد اقش دوللارىنان استام تىكەلەي شەتەلدىك ينۆەستيتسيا تارتىلدى. 2018 جىلى ينۆەستيتسيانىڭ جالپى اعىنى وتكەن جىلمەن سالىستىرعاندا 15,8 پايىزعا ءوسىپ, 24,3 ملرد اقش دوللارىن قۇرادى, – دەدى ءمينيستردىڭ ورىنباسارى.
وسى رەتتە ول ينۆەستيتسيا تارتۋ جاڭا جۇمىس ورىندارىن قۇرىپ, قازاقستاندىق كادرلاردىڭ الەۋەتىن ارتتىراتىنىن, يننوۆاتسيالىق تەحنولوگيالاردىڭ ترانسفەرتىنە تۇرتكى بولاتىنىن, مەملەكەت بيۋدجەتىنە سالىق تۇسىمدەرىن ۇلعايتاتىنىن باسا ايتتى. سونىمەن قاتار ينۆەستيتسيا تارتۋدىڭ جاڭا جۇيەسىنىڭ بۇعان دەيىن قولدانىستا بولعان جۇيەدەن ايىرماشىلىعىنا كەڭىنەن توقتالدى.
− بىرىنشىدەن, ءبىز شەتەلدەگى مەكەمەلەرمەن ءوزارا ءىس-قيمىلدى كۇشەيتىپ, ينۆەستيتسيا تارتۋدىڭ نەگىزگى قۇرالدارىنىڭ ءبىرى رەتىندە اتالعان ينفراقۇرىلىمداردى پايدالانامىز. ياعني, ءبىزدىڭ تولىقتاي العاندا شەتەلدە 93 ميسسيامىز بار. ولاردىڭ بارلىعى دا جاڭا ينۆەستيتسيا تارتۋمەن جانە ەكسپورتتىق ساياساتتى ۇيلەستىرۋمەن بەلسەندى جۇمىس جۇرگىزىپ جاتىر. ءبىز شەتەلدىك مەكەمە-ورتالىق-ءوڭىر فورماتىندا ءۇش دەڭگەيلى جۇيە قۇردىق. بۇل بارلىق دەڭگەيدەگى ءاربىر ينۆەستورمەن جانە جوبامەن ناقتى جۇمىس ىستەۋگە مۇمكىندىك بەرەدى. مۇنداي تەتىك وڭىرلەردىڭ جوبالارى ءۇشىن شەتەلدىك مەكەمەلەرگە الەۋەتتى ينۆەستور ىزدەۋگە جانە كەرىسىنشە تىكەلەي تاسىمالداۋعا مۇمكىندىك بەرەدى, – دەدى ە.كوشەرباەۆ.
بەلگىلى بولعانداي, الەۋەتتى ينۆەستور ەلدەردى قامتۋ گەوگرافياسى كەڭەيەدى. بۇل رەتتە قازاقستان ەكونوميكاسىنىڭ باسىم سەكتورىنا ينۆەستيتسيا تارتۋ ءۇشىن 40-قا جۋىق ينۆەستيتسيا قۇيۋعا دايىن ەل ايقىندالعان. بۇل رەتتە الدىڭعى قاتارلى ەلدەرگە, اسىرەسە اقش, گەرمانيا جانە جاپونياعا باسا نازار اۋدارىلادى. ءۇشىنشىدەن, ينۆەستيتسيالىق شارالار ۇيىمداستىرىلماق. ماسەلەن, جىل باسىنان بەرى 17 ينۆەستيتسيالىق شارا ۇيىمداستىرىلىپ, بىرقاتار ماڭىزدى ستراتەگيالىق قۇجاتقا قول قويىلعان. بۇگىندە ەلىمىزدە اتقارىلىپ جاتقان جۇمىستاردىڭ باستى ماقساتى – ينۆەستورلاردى ەل ەكونوميكاسىنىڭ ماڭىزدى سەكتورلارىنا تارتۋ.
− ءىرى جوبالاردى ىسكە اسىرۋعا ەلەۋلى قورلارى بار باسىم سالالار انىقتالدى. بۇل – ازىق-ت ۇلىك ونەركاسىبى, اگروحيميا, اۋىل شارۋاشىلىعى ماشيناسىن جاساۋ, گاز حيمياسى, اقپاراتتىق-كوممۋنيكاتسيالىق تەحنولوگيالار, تاۋ-كەن مەتاللۋرگيا كەشەنى. قازىرگى تاڭدا «Kazakh Invest» ۇلتتىق كومپانياسىمەن بىرلەسىپ اتالعان سالالاردا جوبالاردى پىسىقتاپ جاتىر, – دەدى ە.كوشەرباەۆ.
