ەكونوميكا • 21 ماۋسىم، 2019

مۇناي-حيميا كەشەنى: وتاندىق ماماندار – باستى نازاردا

180 رەتكورسەتىلدى

ورتا ازياداعى بىرەگەي مۇناي-حيميا كەشەنىنىڭ ىسكە قوسىلاتىن ۋاقىتى دا الىس ەمەس. اتىراۋدا «Kazakhstan Petrochemical Industries Inc» جشس قولعا العان جوبانىڭ قۇرىلىس جۇمىستارىنا 36 مەردىگەر تارتىلعان، ونىڭ 33-ءى وتاندىق كومپانيالار.

«قازمۇنايگاز» ۇك» اق باسقارما توراعاسىنىڭ ورىنباسارى، «Kazakhstan Petrochemical Industries Inc» جشس باسقارما توراعاسى دانيار تيەسوۆتىڭ ايتۋىنشا، كەشەن جۇمىسى باستالعان العاشقى كەزەڭدە جىلىنا 500 مىڭ توننا پوليپروپيلەن وندىرىلەدى. قازىر قۇرىلىس جۇمىستارى قارقىندى ءجۇرىپ جاتىر. بۇعان دەيىن جوبانى جۇزەگە اسىرۋ كورسەتكىشى 6 پايىز عانا بولعان ەدى، جاڭا مەنەدجمەنت جۇيەسى ەنگىزىلگەننەن كەيىن 34 پايىزعا كوتەرىلدى. ايتا كەتۋ كەرەك، بۇل - «سامۇرىق قازىنانىڭ» وتاندىق كومپانيا كۇشىمەن جۇزەگە اسىرىپ جاتقان العاشقى جوباسى. 

قازىر نىساندا ەكى مىڭنان استام ادام جۇمىس ىستەيدى. جوبادا قازاقستاندىق قامتۋعا باسىمدىق بەرىلگەن. كرى اتقارۋشى ديرەكتورى دامير ءاشىموۆ: «جۇمىسشىلاردىڭ تۇگەلگە جۋىعى قازاقستاندىق ماماندار، - دەيدى. - وتاندىق كاسىپورىنداردىڭ جۇمىس ساپاسى شەتەلدىك كومپانيالاردان كەم تۇسپەيتىنىن ۋاقىت كورسەتىپ وتىر. مىسالى، قۇرىلىسقا قاجەت ەڭ ۇلكەن قۇرىلعى – كولوننانى «اتىراۋمۇنايماش» زاۋىتى دايىنداۋدا. مۇنداي ۇلكەن قۇرىلعى بۇرىن-سوڭدى ءبىزدىڭ ەلىمىزدە جاسالعان جوق».

جوسپار بويىنشا قۇرىلىس جۇمىستارى 2021 جىلى اياقتالادى. جوبا ءساتتى جۇزەگە اسسا، 50-دەن استام جاڭا ءونىم شىعارىلادى. ەلىمىزدەگى تۇڭعىش مۇناي-حيميا كەشەنى شاعىن جانە ورتا بيزنەستى دامىتۋعا دا تىڭ سەرپىن بەرمەك.

اتىراۋ


سوڭعى جاڭالىقتار

ۇقساس جاڭالىقتار