«مەديتسينالىق پويىزدار» جوباسى ءوز جۇمىسىن 29 ساۋىردە باستادى. الماتى, شىعىس قازاقستان جانە پاۆلودار وبلىستارىنىڭ شالعاي بەكەتتەرى تۇرعىندارىنا قىزمەت كورسەتكەن پويىز اقمولا وڭىرىنە تۇراقتادى.
كەڭ اۋقىمدى الەۋمەتتىك جوبا 2010 جىلدان باستاپ «قازاقستان تەمىر جولى» ۇلتتىق كومپانياسى» اق جانە دەنساۋلىق ساقتاۋ مينيسترلىگىمەن, 2016 جىلدان بەرى «Samruk-Kazyna Trust» قورىمەن جۇزەگە اسىرىلادى.
بيىل پويىز قازاقستاننىڭ 49 شالعاي بەكەتىنىڭ جەتى مىڭنان استام تۇرعىنىنا تەگىن مەديتسينالىق كومەك كورسەتتى. ونىڭ ىشىندە 1465 ءبۇلدىرشىن دارىگەر قابىلداۋىندا بولدى, 623 كىشى حيرۋرگيالىق وتا, 283 فيبروەزوفاگوگاسترودۋودەنوسكوپيا (فگدس) پروتسەدۋراسى مەن 2416 ۋلترادىبىستىق زەرتتەۋ (ۋدز) جاسالدى.
پويىز ساپالى ءارى جەدەل دياگنوستيكا جاساۋعا مۇمكىندىك بەرەتىن زاماناۋي مەديتسينالىق قۇرالدارمەن جابدىقتالعان. پويىزعا توعىز ۆاگون تىركەلگەن, ونىڭ تورتەۋى پاتسيەنتتەردى قابىلداۋعا ارنالعان.
الەۋمەتتىك جوبانىڭ اۋقىمى وسى جىلى كەڭەيگەن. بۇل جايىندا «Samruk-Kazyna Trust» الەۋمەتتىك جوبالاردى دامىتۋ قورى باس ديرەكتورىنىڭ ورىنباسارى اسەل شىلدەباەۆا:
– وتكەن جىلى 124 شالعاي بەكەتتە تۇراتىن 40 000-نان استام تۇرعىن تەكسەرىلدى. بيىلعى جىلى ءبىز باراتىن وبلىستاردىڭ سانىن ارتتىردىق. ەگەر ءبىر جىل بۇرىن پويىز 9 وبلىستىڭ عانا تۇرعىندارىن تەكسەرسە, وندا بيىلعى ماۋسىمدا دارىگەرلەر بريگاداسى 21 جەلتوقسانعا دەيىن جولدا بولىپ, قازاقستاننىڭ 14 وبلىسىنىڭ 195 بەكەتىن قامتيتىن بولادى. 60 000-نان استام ادامدى قامتۋ جوسپارلانعان, – دەدى.
جوبا ءۇشىن 14 مەديتسينالىق بريگادا جاساقتالعان. ءار وبلىسقا بارعان سايىن, دارىگەرلەر اۋىسىپ وتىرادى. بيىل ماماندار قۇرامىنا س.ج.اسفەندياروۆ اتىنداعى قازۇمۋ پروفەسسورلارى قوسىلعان. دارىگەرلەر ستانتسيا تۇرعىندارى اۋرۋلارىن ەرتەرەك انىقتاپ, ەمدەلۋگە باعىت-باعدار بەرەدى. الماتى, شىعىس قازاقستان جانە پاۆلودار وبلىستارى ەمدەلۋشىلەرىنىڭ اراسىنان ونكولوگيالىق اۋرۋلار, قانت ديابەتى مەن گەپاتيت كوپ انىقتالعان.
ەلتاي ستانتسياسىنىڭ تۇرعىنى, زەينەتتەگى كوپبالالى انا قۋانىش گۇلزات پويىزدىڭ اۋىلعا كەلىپ توقتاعانىنا ريزالىعىن ءبىلدىردى, اۋىلدا كەيبىر مامانداردىڭ جوقتىعى قيىندىق تۋعىزاتىنىن ايتتى.
«دەنساۋلىق» پويىزى 26 ماۋسىمعا دەيىن اقمولا وبلىسىندا بولادى. ودان ءارى سولتۇستىك قازاقستان, قوستاناي, قاراعاندى وبلىستارىنا جول تارتادى. قازاقستاننىڭ باتىس ايماقتارىنا دا تەگىن قىزمەت كورسەتىپ, ءوز جۇمىسىن جامبىل وبلىسىندا اياقتايدى. پويىزدىڭ ءجۇرىپ وتەتىن جالپى جولى 19 مىڭ شاقىرىمنان اسادى.
اسەم تاڭاتار,
ەۇۋ-دىڭ جۋرناليستيكا فاكۋلتەتى ستۋدەنتى
