تاڭعى ساعات 4-تە باستالىپ, تۇسكە دەيىن سوزىلعان قىل قۇيرىقتىلار سايىسىندا 1-ورىندى اقسۋاتتىڭ قىزكۇرەڭ ەسىمدى جارتىلاي اسىل تۇقىمدى جۇيرىگى يەلەنگەن-ءدى. ال 2-3-ورىنداردى كەزىندە قازاقتىڭ كورنەكتى جازۋشىسى عابيت مۇسىرەپوۆ «بوشايدىڭ ءۇش قاراسى» دەپ تامسانا اڭگىمە جازعان التايدىڭ ابىز اقساقالى بوشاي كىتاپباەۆتىڭ تۋعان جەرى – كاتونقاراعاي اۋدانىنىڭ اتبەگىلەرى ءوزارا ءبولىستى. ءبىر تاڭعالارلىعى, ەكى اي بۇرىن زايساندا تۇڭعىش رەت ۇيىمداستىرىلعان 130 شاقىرىمدىق بايگەدە 2-ورىن العان پىراق دەيتىن جۇيرىك بۇل جولى دا وسى جەتىستىگىن قايتالاپ, ەلدى ەلەڭ ەتكىزدى (ايتپاقشى, سول جارىستا 1-ورىندى وسى اۋداننىڭ اتى يەلەنگەن-ءدى). ءبىز سول اتقا شاپقان تاقىمى تاستاي شاباندوزبەن از-كەم اڭگىمەلەسكەن ەدىك.
– بۇل اتتىڭ تۇقىمى قانداي؟
– تازا قازاقى دەۋگە بولمايدى. بۇرىنعى دون جىلقىسىنان قالعان تۇقىم عوي. قانى قازاقى جىلقىلارمەن ارالاسقان. تازا, قازاقتىڭ جابى جىلقىسى ەمەس. بۇل – جەرگىلىكتى جىلقى تۇقىمى. قازانات دەۋگە دە بولاتىن شىعار. قازاناتتىڭ دا تۇبىندە تەكتىلىك بولعان عوي. ءبىزدىڭ كاتونقاراعاي اۋدانىنىڭ سولداتوۆا دەگەن اۋىلىندا ورىس ۇلتىنىڭ وكىلدەرى دون تۇقىمىن كوپ ۇستاعان. بۇل – التايدىڭ قىتىمىر قىسىنا دا ءتوزىمدى, جۇرىسكە دە شىدامدى جىلقى. وسىنداي جىلقىلار كاتونقاراعايدا كوپ تاراعان. ياعني, قازاقى جىلقى مەن دون جىلقىسىنىڭ قانى ارالاسقان.
– اتتى بايگەگە قانشا ۋاقىت باپتادىڭىز؟
– زايسانداعى 130 شاقىرىمدىق جارىسقا 25 كۇن باپتادىم. بۇل جولعى جارىسقا زايساننان كەيىن ءبىر ايداي تىنىقتىرىپ بارىپ باپتاي باستادىم.
– بۇل بايگەگە قوسىلىپ ءجۇرگەن ات پا؟ الدە ءمىنىستىڭ اتى ما؟
– ءمىنىستىڭ اتى. مالعا, شارۋاشىلىققا ءمىنىپ جۇرگەن ات. الامانعا قوسىلماعان.
– ءۇشىنشى ورىندى دا كاتونقاراعايدىڭ جۇيرىگى الدى عوي.
– ءيا, ول – ۇلكەن نارىن اۋىلىنىڭ اتى. اتتىڭ باپكەرى – اتاقتى بوشاي كىتاپباەۆ اقساقالدىڭ اۋىلىنان.
– 140 شاقىرىم اتقا دا, شاباندوزعا دا وڭاي بولمايتىنى انىق. جالپى, جارىس قالاي ءوتتى؟
– تاڭ قىلاڭ بەرە, ساعات ءتورتتەن 25 مينۋت كەتكەندە جارىس جولىنا شىقتىق قوي. 130 شاقىرىم بويى قاراعاندىدان كەلگەن ات الدىنا قارا سالمادى. مارەگە جاقىنداعاندا باسىپ وزدىق. ال 1-ورىن العان اتپەن 40 شاقىرىمنان بەرى قاراي قاتارلاسا شاۋىپ وتىردىق. مارەگە شامامەن ءبىر شاقىرىمداي جەر قالعاندا ەكەۋمىز دە ءتىزگىندى قويا بەردىك. ەكەۋمىز دە مارەدەن شاۋىپ وتتىك.
– 150 شاقىرىم بولعاندا وزىپ كەتەر مە ەدىڭىز؟
– ونى ايتۋ قيىن. بىراق اتىمنىڭ 150 شاقىرىمعا شىدايتىنىنا سەنىمدىمىن.
– گيننەستىڭ رەكوردتار كىتابىنا ەنگىزۋگە لايىق ات جارىسىنا ءبىر ەمەس, ەكى مارتە قاتىسىپ, جۇلدە الدىڭىز. ەكى جارىستى قوسساق, ەكى اي ءىشىندە 270 شاقىرىمدى باعىندىرىپسىز. العان اسەرىڭىز قانداي؟
– 140 شاقىرىمدىق بايگە قازاقستاندا العاش رەت ءوتتى عوي. مۇنداي جارىستا بايگە الۋ ۇلكەن قۋانىش, زور مارتەبە دەپ ويلايمىن.
– 140 شاقىرىم شاپقاندا جولدا قانشا رەت ايالدادىڭىزدار؟
– ءوزىم اتىمدى ءۇش رەت توقتاتىپ, ەكى-ءۇش مينۋتتان دەمالتىپ, ازداپ سۋ ۇرتتاتىپ وتىردىم. جارىسقا ۇزىن سانى 104 ات قاتىستى. مارەگە جەتكەنى – 12. ءبىز كەلگەننەن ءبىر ساعاتتان كەيىن كەلگەن اتتار دا بولدى.
