قايىرىمدىلىق شاراسىندا كاسىپكەر امانگەلدى مايتەكوۆ كوپبالالى, تولىق ەمەس وتباسى, جانە مۇگەدەك بالا اسىراپ وتىرعان 5 وتباسىعا 1 جانە 2 بولمەلى پاتەر كىلتىن تابىستادى. سونداي-اق, شىلدە ايىنان باستالاتىن «باقىتتى وتباسى» جوباسىنا العاشقى قاتىسۋشى 20 ازاماتقا 500 مىڭ تەڭگەنىڭ سەرتيفيكاتىن سىيلادى. بۇل وتباسىلار العان قاراجاتىن پاتەردىڭ العاشقى جارناسىنا جۇمسايتىن بولادى. يگى شاراعا وبلىس اكىمى وڭداسىن ورازالين قاتىسىپ, باسپانالى بولعان ازاماتتاردى قۇتتىقتادى. قايىرىمدىلىق جاساعان كاسىپكەر ازاماتقا العىسىن ءبىلدىردى.
«وبلىس بويىنشا 30 مىڭ ادام باسپانا كەزەگىندە تۇرسا, ولاردىڭ ىشىندە 23 500-ءى اقتوبە قالاسىندا. بۇل ماسەلە بىردەن شەشىلمەيدى, بىراق ءتيىستى جۇمىستار جۇرگىزىلىپ جاتىر. ءبىز ەڭ الدىمەن اسا مۇقتاج جانداردى باسپانامەن قامتاماسىز ەتۋ ءۇشىن بارلىق مۇمكىندىكتى جاسايمىز. وسى جىلدىڭ وزىندە وبلىستا 1 ملن شارشى مەتردەن اسا تۇرعىن ءۇي سالىنادى, بۇل دەگەنىڭىز 8 مىڭنان اسا پاتەر. ولاردىڭ جارتىسى مەملەكەتتىڭ قولداۋىنىڭ ارقاسىندا از قامتىلعان وتباسىلارعا ءتيىمدى شارتتارمەن بەرىلەتىن بولادى. دەمەۋشىلەردىڭ بەرگەن قارجىسىنا 2-3 ازاماتقا پاتەر الۋعا دا بولادى. الايدا, سول قارجىنى 20-30 ادامعا العاشقى جارنا رەتىندە بەرگەن ءتيىمدى بولىپ وتىر. ويتكەنى, ولار جالدامالى پاتەرگە تولەيتىن قاراجاتتى ەندى ءوز مەنشىگىندە قالاتىن باسپاناسى ءۇشىن تولەيدى. وتكىر ماسەلە وسىلاي جۇيەلى تۇردە شەشىلىپ كەلەدى», دەدى وبلىس باسشىسى.
