جيىن بارىسىندا مينيستر بىرنەشە كۇن بۇرىن قازاقستان دارىگەرلەرى وزدەرىنىڭ كاسىبي مەرەكەسى – مەديتسينا قىزمەتكەرلەرى كۇنىن اتاپ وتكەنىن تىلگە تيەك ەتتى.
«ەل پرەزيدەنتى قاسىم-جومارت توقاەۆ مەديتسينا قىزمەتكەرلەرىن قۇتتىقتاپ, ءدارىگەرلەردىڭ ەڭبەگى ادامدارعا بەلسەندى قىزمەتكە, كوبىنەسە ومىرگە ورالۋعا مۇمكىندىك بەرەتىنىن جەتكىزدى. سوڭعى 3 جىلدا ەلىمىزدە نەگىزگى مەديتسينالىق-دەموگرافيالىق كورسەتكىشتەردى جاقسارتۋدىڭ وڭ ديناميكاسى بايقالادى. ولاردىڭ ىشىندە ءومىر ءسۇرۋ ۇزاقتىعى 0, 85 جاسقا ۇلعايدى, جالپى ءولىم 3 %-دان اسا تومەندەدى, انا ءولىمى 9 %-عا تومەندەدى, نارەستە ءولىمى 6,5%-عا ازايدى, تۋبەركۋلەزدەن بولاتىن ءولىم 30 %-عا تومەندەدى. جالپى, ءبىزدىڭ 2018 جىلداعى جۇمىستارىمىز ەلباسى نۇرسۇلتان نازارباەۆتىڭ جولداۋلارىندا بەرىلگەن تاپسىرمالار نەگىزىندە جانە ۇكىمەت باسشىسىنىڭ تاپسىرمالارى بويىنشا اتقارىلدى. ونىڭ ءبىرىنشىسى, الەۋمەتتىك مەديتسينالىق ساقتاندىرۋدى ەنگىزۋ بويىنشا دايىندىق جۇمىستارى. سونىمەن قاتار ءبىزدىڭ سالاداعى مەديتسينالىق كومەكتىڭ قولجەتىمدىلىگى جانە ساپاسىن كوتەرۋ بويىنشا ءماسەلەلەردى شەشۋ قولعا الىندى. ارينە ءبىزدىڭ الدىمىزعا قويعان تاعى ءبىر ماقسات – ءدارى-دارمەكپەن قامتاماسىز ەتۋدى جاقسارتۋ جانە دەنساۋلىق ساقتاۋ سالاسىنداعى تسيفرلاندىرۋ جۇمىستارى. بۇل ەڭ ۇلكەن ستراتەگيالىق ماقساتتار دەپ ايتۋعا بولادى. ءبىرىنشى باعىت بويىنشا جالپى حالىقتىڭ دەنساۋلىعىن نىعايتۋعا باعىتتالعان ارنايى شارالار ەنگىزىلدى. ەلباسىنىڭ تاپسىرماسىنا سايكەس قوعامدىق دەنساۋلىقتى باسقارۋ بويىنشا شارالار جوسپارى قابىلدانىپ, مەكتەپ وقۋشىلارىنىڭ دەنساۋلىعىن قورعاۋ جونىندەگى جاڭا ستاندارتتار ەنگىزىلدى. تولىقتاي العاندا, 12 ميلليوننان استام ادام سالاماتتى ءومىر سالتىن قالىپتاستىرۋ شارالارىنا تارتىلدى. ۆاكتسيناتسيا حالىقتىڭ دەنساۋلىعىن نىعايتۋداعى ماڭىزدى شارالاردىڭ ءبىرى سانالادى. ەلىمىزدە ۆاكتسيناتسيا الۋعا ءتيىستى حالىقتىڭ 97%-ىنا ەكپە جۇرگىزىلدى. بۇل دۇنيەجۇزىلىك دەنساۋلىق ساقتاۋ ۇيىمىنىڭ ۇسىنىسىنا ساي كەلەدى», دەدى ە.ءبىرتانوۆ.
ونىڭ ايتۋىنشا, ەلىمىزدە حالىقتىڭ دەنساۋلىعىن نىعايتۋ ماقساتىندا ۇلتتىق سكرينينگتىك باعدارلاما جۇرگىزىلىپ جاتىر. ول ەرەسەك تۇرعىندار مەن بالالاردى جەدەل زەرتتەۋدىڭ 7 ءتۇرىن قامتيدى. بيىل 7 ميلليوننان استام ادامدى قامتيتىن 12 ميلليوننان استام تەكسەرۋ جۇرگىزىلدى. 304 مىڭعا جۋىق اۋرۋ انىقتالىپ, شامامەن 260 مىڭ ادام ەسەپكە الىنعان.
سونىمەن قاتار مينيستر مەديتسينالىق-سانيتاريالىق العاشقى كومەكتىڭ ساپاسىن جاقسارتۋ بويىنشا بىرقاتار جۇمىس جۇرگىزىلىپ جاتقانىن تىلگە تيەك ەتتى.
«مەديتسينالىق-سانيتاريالىق العاشقى كومەكتى دامىتۋ بويىنشا شارالار جوسپارى قابىلداندى. ەلىمىز بويىنشا جالپى پراكتيكالىق ءدارىگەردىڭ مىڭنان استام, پەدياتريالىق دارىگەرلەردىڭ 79 جاڭا ۋچاسكەسى اشىلدى. ءدارىگەرگە قارالۋعا جانە دارىگەردى شاقىرۋعا ونلاين جازىلۋ ەنگىزىلدى. وسىلايشا, 2018 جىلى جالپى پراكتيكاداعى دارىگەرلەرگە تۇسەتىن سالماق 5%-عا ازايىپ, ەمحانالاردا كەزەككە ءتۇسۋ ەكى ەسەگە ازايدى», دەدى ە.ءبىرتانوۆ.
بايانداما بارىسىندا مينيستر قازاقستاندا بۇرىن-سوڭدى الەم ەلدەرىندە بولماعان تولىقتاي جاساندى جۇرەك وتاسى 3 ادامعا جاسالعانىن جەتكىزدى.
«وسى رەتتە, وتكەن ءۇش جىلدىڭ ءىشىندە جوعارى تەحنولوگيالىق قىزمەتتەردىڭ سانى, سونىڭ ىشىندە بىرەگەي وپەراتسيالاردىڭ ۇلەسى ارتىپ كەلەدى», دەدى مينيستر.
ونىڭ ايتۋىنشا, ەلىمىزدىڭ ۇلتتىق كارديوحيرۋرگيالىق ورتالىقتا وتكەن جىلى جۇرەك ترانسپلانتاتسياسى بويىنشا 8 وتا جاسالعان.
دەنساۋلىق سالاسىنا قاتىستى وسى جانە وزگە دە ماڭىزدى ماسەلەلەردى قوزعاعان ۆەدومستۆو باسشىسى مينيسترلىكتىڭ قوعاممەن بارىنشا اشىق اقپارات الماسۋدى العا قويعانىن اتاپ ءوتتى.
«ءبىز بايلانىس ءۇشىن اشىقپىز, سىزدەر بىزگە بارلىق ءمۇمكىن بايلانىس ارنالارى, الەۋمەتتىك جەلى ارقىلى حابارلاسا الاسىزدار, مەنىڭ نەمەسە ورىنباسارلارىمنىڭ جەكە قابىلداۋىنا كەلۋگە مۇمكىندىكتەرىڭىز بار. ءبىزدىڭ كەزدەسۋ دەنساۋلىق ساقتاۋ سالاسىنىڭ بارلىق اسپەكتىلەرى بويىنشا اشىق جانە ءوزارا ماڭىزدى پىكىر الماسۋعا جاقسى مۇمكىندىك بەرەتىنىنە سەنىمدىمىن. وسى كەزدەسۋدى پايدالانا وتىرىپ, بارشاڭىزدىڭ دەندەرىڭىزگە ساۋلىق, وتباستارىڭىزعا اماندىق تىلەيمىن», دەدى ە.ءبىرتانوۆ.
راۋان قايدار,
«Egemen Qazaqstan»
