وتىرىستى اشقان ۇلتتىق كوميسسيانىڭ ءتورايىمى گ.ن.ابدىقالىقوۆا مەملەكەت باسشىسى قاسىم-جومارت توقاەۆتىڭ قازاقستان رەسپۋبليكاسىنىڭ پرەزيدەنتى قىزمەتىنە رەسمي كىرىسۋ سالتاناتتى ءراسىمىندە قويعان مىندەتتەمەلەرگە باسا نازار اۋداردى.
القالى جيىندا پرەزيدەنت بەلگىلەگەن 10 ماڭىزدى باعىتتاردىڭ قاتارىنا كىرەتىن – جاستاردى جۇمىسپەن قامتۋ, جاڭا جۇمىس ورىندارىن اشۋ, «رۋحاني جاڭعىرۋ» باعدارلاماسى اياسىندا وتباسىلىق قۇندىلىقتاردى ىلگەرىلەتۋ ماسەلەلەرى قارالدى. بۇگىنگى تاڭدا ەلىمىزدەگى 14-تەن 28 جاسقا دەيىنگى جاستاردىڭ جالپى سانى 3,9 ميلليوننان اسادى. جاستاردى جۇمىسپەن قامتۋ ماقساتىندا «جاسىل ەل», «ديپلوممەن – اۋىلعا!», «سەرپىن», «جاستار پراكتيكاسى» باعدارلامالارى جۇزەگە اسىرىلۋدا.
وسى باسقوسۋدا ايتىلعانداي, ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ باعدارلاماسىنىڭ اياسىندا 2018 جىلى 253 مىڭنان استام جاس ازاماتتى جۇمىسقا تۇرعىزۋعا مۇمكىندىك جاسالعانىن اتاپ ءوتۋ كەرەك, بۇل وسى باعدارلاماعا قاتىسۋشىلاردىڭ جالپى سانىنىڭ 37%-ىن قۇرايدى. سول سياقتى«باستاۋ-بيزنەس» جوباسى شەڭبەرىندە كاسىپكەرلىك نەگىزدەرى بويىنشا 8,5 مىڭ جاس وقىتىلىپ, ولاردىڭ 2 مىڭنان استامى شاعىن نەسيە الدى. كاسىبى بويىنشا العاشقى تاجىريبە الۋ ءۇشىن 28,4 مىڭنان استام ادام جاستار پراكتيكاسىنا جىبەرىلدى. الەۋمەتتىك جۇمىس ورىندارىنا جانە قوعامدىق جۇمىستارعا جاستار اراسىنان 34,8 مىڭ ادام تارتىلدى. جاستاردى قولداۋ بويىنشا «جاستار – ەل تىرەگى» ۇلتتىق جوباسى باستالدى, ونىمەن 1 ملن جاس ءۇش جىل ىشىندە قامتىلماق.
تۇڭعىش پرەزيدەنت – ەلباسى ن.نازارباەۆتىڭ تاپسىرماسى بويىنشا قابىلدانعان «رۋحاني جاڭعىرۋ» باعدارلاماسى جانە « ۇلى دالانىڭ جەتى قىرى» باسىمدىقتارى رۋحاني-ادامگەرشىلىك قۇندىلىقتاردى قايتا جاڭعىرتۋعا باعىتتالعان. وسى باعىتتاعى جۇمىستاردى جۇزەگە اسىرۋ ءۇشىن ۇكىمەتتىك ەمەس ۇيىمدارعا مەملەكەتتىك الەۋمەتتىك تاپسىرىس اياسىندا بيىل 607 ميلليون تەڭگە ءبولىنىپ, 167 الەۋمەتتىك ماڭىزى بار جوبا قولعا الىنۋى ءتيىس.
جاستار تاربيەسىنە قاتىستى اتقارىلىپ جاتقان جۇمىستار دا از ەمەس. ماسەلەن, جازعى كانيكۋل كەزىندە وقۋشىلاردىڭ رەسپۋبليكالىق مۋزەيلەرگە, تابيعات قورىعى-مۋزەيلەرىنە جانە تەاترلارعا تەگىن كىرۋ پراكتيكاسى ەنگىزىلدى. بالالار مەن جاستاردى شىعارماشىلىق جانە كرەاتيۆتى جوبالارعا بەلسەندى تارتۋ ءۇشىن وڭىرلەردە 208 كوۆوركينگ-ورتالىق قۇرىلعان, ولاردىڭ كوبى الماتى قالاسىندا, الماتى, شىعىس قازاقستان, پاۆلودار جانە قاراعاندى وبلىستارىندا ورنالاسقان.
وتىرىستا سونىمەن قاتار قازاقستان رەسپۋبليكاسىنداعى 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسىن ىسكە اسىرۋ بويىنشا 2017-2019 جىلدارعا ارنالعان ءىس-شارالار جوسپارىنىڭ ماڭعىستاۋ وبلىسىندا ورىندالۋ بارىسى قارالدى. تۇرعىنداردىڭ الەۋمەتتىك وسال توپتارىن قولداۋ ماقساتىندا وڭىردە ىسكە اسىرىلىپ وتىرعان «بيزنەس 3 كۇندە» جوباسىنىڭ وڭ تاجىريبەسى اتالدى. بۇل جوبانى قولعا الۋداعى باستى مىندەت – از كىرىستەرى بار وتباسىلارعا ءوز ءىسىن اشۋعا كومەك كورسەتۋ. بيىلعى ناۋرىزدان باستاپ جوباعا 120-دان استام ادام قاتىسۋدا. وسى قاتاردا 37 كوپ بالالى وتباسى, كوپ بالالى جالعىزباستى 2 اكە, 7 جالعىزباستى انا جانە مۇگەدەكتىگى بار ادامدارعا كۇتىم جاسايتىن 13 ادام ءوز بيزنەسىن اشتى. ناتيجەسىندە 37 تىگىن تسەحى, 11 قولونەر جانە 4 توقىما شەبەرحاناسى, 21 تاعام وندىرەتىن نىسان, 25 كونديتەرلىك, 12 ءسۇت تاعامدارى مەن سۋسىندار وندىرەتىن ميني تسەح, 2 قىزمەت كورسەتەتىن بيزنەس اشىلدى.
وتىرىس سوڭىندا پرەمەر-ءمينيستردىڭ ورىنباسارى, ۇلتتىق كوميسسيا ءتورايىمى گ.ن.ابدىقالىقوۆا مەملەكەتتىك ورگاندارعا بىرقاتار ناقتى تاپسىرما بەردى.
