«مەديتسينالىق-سانيتارلىق كومەك كورسەتەتىن جەتكىزۋشىلەر سانى 2017 جىلى 501 بولسا, 2019 جىلى بۇل كورسەتكىش 550-گە جەتتى. وسىدان ەكى جىل بۇرىن جەتكىزۋشىلەر اراسىندا 307 مەملەكەتتىك, 104 جەكە مەنشىك ۇيىم بولسا, بۇگىندە 372 مەملەكەتتىك, 178 جەكە مەنشىك كلينيكامەن جۇمىس ىستەپ جاتىرمىز», - دەدى قور باسشىسى الماتىدا سالاداعى تۇيتكىلدى ماسەلەلەردى تالقىلاۋعا ارنالعان جيىن بارىسىندا جۋرناليستەرگە.
ايتۋىنشا, بولاشاقتا كونسۋلتاتيۆتىك-دياگنوستيكالىق كومەك, وڭالتۋ مەن پالياتيۆتىك كومەككە بولىنەتىن قارجى دا كوبەيەدى. سوندىقتان بۇل سەكتورلاردى دا بيزنەسكە ءتيىمدى سالالار قاتارىنا جاتقىزۋعا بولادى.
«جەكە مەنشىك سالا مەملەكەتتىك تاپسىرىستى ورىنداۋعا ەمحانالارمەن سۋبمەردىگەرلىك كەلىسىمشارت بەكىتۋ ارقىلى دا قاتىسا الادى. ءسويتىپ, ولار قولدا بار رەسۋرستاردىڭ ارقاسىندا سالا مامانىنىڭ قىزمەتىن, دياگنوستيكا مەن زەرتتەۋدىڭ بەلگىلى ءبىر تۇرلەرىن كورسەتە الادى», دەدى ايباتىر جۇماعۇلوۆ.
دەنساۋلىق ساقتاۋ ءمينيسترى ەلجان ءبىرتانوۆتىڭ ايتۋىنشا, جىل باسىنان بەرى ەمحانا قىزمەتىن دامىتۋ ماقساتىندا بىرقاتار تاريفتەردى كوتەردى. ولار نەگىزىنەن دارىگەرلەر مەن مەديتسينا پەرسونالىنىڭ جالاقىسىن وسىرۋگە باعىتتالدى. جىل سوڭىنا دەيىن تاعى بىرقاتار تاريف تۇرلەرىن ءوسىرۋ جوسپاردا بار. جالپى, تاريفتەردى تەڭەستىرۋ كورسەتىلەتىن قىزمەت ساپاسى مەن قولجەتىمدىلىگىن ارتتىرىپ, جەكە مەنشىك سەكتوردى مەملەكەتتىك تاپسىرىستى ورىنداۋعا, مەديتسينالىق ساقتاندىرۋ جۇيەسىنە قاتىسۋعا ىنتالاندىرادى.
«بىلتىردان بەرى تاريفتەردى جەتىلدىرۋ, ايماقتار اراسىنداعى تاريف الشاقتىعىن جويۋ جۇمىستارى ءجۇرىپ جاتىر. اتاپ ايتقاندا, تاريفتەردى ەسەپتەۋ ادىستەمەسى دە تۇبەگەيلى وزگەرمەك. 2021 جىلدان باستاپ تاريفتەردى قالىپتاستىرۋ بارىسىندا امورتيزاتسيالىق شىعىنداردى ەسكەرۋ جوسپارلانىپ وتىر», - دەدى مينيستر.
«مەديتسينالىق قىزمەتتەردىڭ نارىقتاعى باعاسى مەن مەملەكەتتىك تاريفيكاتوردى سالىستىرساق تاريف قالىپتاستىرۋ تاسىلدەرىنىڭ اراسىنداعى الشاقتىقتى بايقاۋعا بولادى. مىسالى, كەپىلدەندىرىلگەن تەگىن مەديتسينالىق كومەك شەڭبەرىندە بۇيرەككە جاسالاتىن ۋدز ءۇشىن 804 تەڭگە تولەنەدى. ال, مەملەكەتتىك مەديتسينا ۇيىمدارىندا ۋدز اقىلى جاساتۋ ءۇشىن ورتا ەسەپپەن 2 230 تەڭگە تولەۋ قاجەت», - دەپ قورىتتى ەلجان ءبىرتانوۆ.
