سپورت • 19 ماۋسىم، 2019

يسلانديالىق ءرۋنيدىڭ قازاقستانداعى العاشقى سۇحباتى

154 رەتكورسەتىلدى

ەندى استانانىڭ دا ءوز ۆيكينگى بار. قازاقستاننىڭ ەڭ ۇزدىك كلۋبى چەمپيوندار ليگاسى باستالماس بۇرىن قۇرامىن 29-جاستاعى يسلانديا قۇراماسىنىڭ فۋتبولشىسى رۋنار مار سيگۋرونسسونمەن تولىقتىردى، دەپ جازادى "استانا" فۋتبول كلۋبىنىڭ رەسمي سايتى.

– رۋنار، قازاقستانعا قالاي ۇشىپ كەلدىڭ؟ جول اۋىر بولمادى ما؟

– بۇل ءبىر ۇزاق كۇن بولدى. يسلانديادان فرانكفۋرتقا، فرانكفۋرتتان نۇر-سۇلتانعا ۇشتىم. ۇشۋ ۇزاقتىعى 16-17 ساعاتىمدى الدى. وعان قوسا، قازاقستان ۋاقىتىنىڭ بىزدەن ءبىراز ايىرماشىلىعى بار. ۇشۋ قيىنعا تۇسپەدى. بىراق، جول الىس بولدى.

– بۇرىن، قازاقستان تۋرالى نە بىلەتىن ەدىڭىز؟

– اسا ءبىر كوپ نارسە ءبىلدىم دەپ ايتا المايمىن. بىلەتىنىم از. سىزدەردىڭ مەملەكەتتەرىڭىزدىڭ تاريحىن وقىدىم. شىنىمدى ايتسام، العاشىندا كارتادان قازاقستاننىڭ قاي جەردە ورنالاسقانىن دا بىلمەدىم. ارتىنشا قازاق جەرىن كورگەن سوڭ تاڭ قالدىم. ءدال مۇنداي ۇلكەن مەملەكەت دەپ ويلامادىم. سىزدەردىڭ استانالارىڭىز نۇر-سۇلتان قالاسى جاس، ءارى ادەمى قالا. ەندى، مەندە قازاقستانمەن جاقىنىراق تانىساتىن مۇمكىندىك تە، ۋاقىت تا پايدا بولدى.

– ءسىزدىڭ ەسىمىڭىزدى ايتۋ ادامدار ءۇشىن قيىنعا سوعادى. ءسىزدى ارىپتەستەرىڭىز قالاي اتايدى؟

– بۇل قيىندىقپەن كوپ جەردە كەزدەسەمىن. مەنى ارىپتەستەرىم كوبىنە رۋني دەپ اتايدى. نەمەسە، سيگي – سيگۋرونسسوننىڭ قىسقارتىلعان ءتۇرى. بىراق، باسىم كوپشىلىگى رۋني دەپ اتايدى.

– بۇل ۋەين رۋنيمەن ۇقساستىعىعىز بار دەگەندى بىلدىرە مە؟

– جوق، مەنىڭ ەسىمىم رۋنار. ونى قىسقارتىپ رۋني دەيدى. اعىلشىندىق شابۋىلشىمەن ەشقانداي ۇقساستىعىمىز جوق.

– قازاقستاندىق كوماندالاردىڭ ويىندارىن كورگەنسىز بە؟

– ءيا. قازاقستان ۇلتتىق قۇراماسىنىڭ بىرنەشە ويىنىن كورگەن بولاتىنمىن. «استانا» فۋتبول كلۋبىنان ۇسىنىس تۇسكەننەن كەيىن، ويىندارىن كورىپ شىقتىم. ءتىپتى، وسى ماۋسىمداعى جەتىستىكتەرىن باقىلاپ وتىردىم. كورگەندەرىمدى قورىتا مەن ۇزدىك كلۋبقا كەلدىم دەپ ايتا الامىن. ەۋرو-2016 ءتۋرنيرىنىڭ ىرىكتەۋ كەزەڭىندە مەن قازاقستان ۇلتتىق قۇراماسىنا قارسى ويناي المادىم. ويتكەنى، مەندە جاراقات بولاتىن. يسلانديادا وتكەن قارىمتا ويىندى دا جىبەرىپ الدىم.

– يسلانديا قۇراماسىنىڭ ويىنشىلارى قازاقستانمەن وتكەن ويىن تەڭ ناتيجەمەن اياقتالعانىنا قاراماستان قۋانعانى، ءبىزدى ءبىراز تاڭىرقاتتى.

– بىزگە سول ساتتە ءار ۇپاي ماڭىزدى بولاتىن. كوماندامىز قورعانىسقا كوپ كوڭىل ءبولدى. بارلىعى دا ەۋروپا چەمپيوناتىنا شىعۋ ءۇشىن جاسالعان ەڭبەك دەپ بىلەمىن.

– ءسىز ەۋروپا چەمپيوناتىندا عاجايىپقا سەندىرگەن يسلانديانىڭ قۇرامىندا بولدىڭىز. بۇل عاجايىپ قالاي ورىن الدى؟

– بۇل جەتىستىك قۇرامامىزدىڭ قاجىرلى ەڭبەگىنىڭ ارقاسىندا كەلدى. ءبىرىمىز ءبارىمىز ءۇشىن كۇرەستىك. ءبىز ءۇشىن وتە كەرەمەت تۋرنير بولدى. اسىرەسە، انگلياعا قارسى وتكەن ويىن ەرەكشە ەستە قالدى. ءبارى بىلەتىندەي يسلانديالىقتار اعىلشىن فۋتبولىن جاقسى كورەدى. سول سەبەپتى انگليا قۇراماسىن جەڭگەنىمىز عاجايىپ بولدى.

– يسلانديا قۇراماسىنىڭ ساپىندا اۋەسقوي فۋتبولشىلار بار دەگەن سىبىس كوپ تارادى. بىرەۋىنىڭ ماماندىعى ءتىس دارىگەرى، بىرەۋى رەجيسەر تاعىسىن تاعى... سول قانشالىقتى راس؟

– جوق، ءبىزدىڭ قۇراما ويىنشىلارىنىڭ بارلىعى كاسىپقوي فۋتبولشىلار. ءبىر قىزىعى ءبىزدىڭ قۇرامامىزدىڭ باس باپكەرىنىڭ كومەكشىسى ءتىس دارىگەرى بولىپ قىزمەت جاساپ ءجۇردى. الايدا، ونىڭ ءوز سەبەپتەرى بار. ۇلتتىق قۇرامامەن جۇمىس جاساعان كەزدە ويىنداردىڭ اراسىندا تىم كوپ بوس ۋاقىت بار. ول سول بوس ۋاقىتىندا ءتىس دارىگەرى بولىپ جۇمىس اتقاراتىن. ايتپاقشى، سول كومەكشى كوپ ۋاقىت وتپەي ۇلتتىق قۇرامانىڭ باس باپكەرى اتاندى. بۇل ونىڭ باستى جۇمىسى بولماعانمەن، دەمالعان كەزىندە جاسايتىن جۇمىسى، بىلايشا ايتقاندا ءحوببيى. بارلىق ادامدا حوببي بولۋى كەرەك دەپ ويلايمىن.

– ال، قاقپاشى شىنىمەن رەجيسسەر مە؟

– ءيا، ول بەينەكليپ، فيلم تۇسىرۋمەن اينالىسادى. يسلانديا – كىشكەنتاي ەل. مۇندا، فۋتبول ويناي ءجۇرىپ، تاعى باسقا دا ماماندىقتىڭ يەسى اتاناتىندار كوپ. ايتپاقشى، الەم چەمپيوناتى كەزىندە ءبىزدىڭ قۇرامامىزدا  يسلانديادا تۇز ءوندىرىس كومپانياسىندا جۇمىس جاسايتىن فۋتبولشى بولاتىن.

– ەگەر، فۋتبولشى بولماساڭىز، كىم بولار ەدىڭىز؟

– ءتىپتى بىلمەيمىن. اكەم قۇرىلىسشى. مۇمكىن، سول كىسىگە كومەكتەسەتىن شىعارمىن.

– سونىمەن، يسلانديانىڭ وسىنداي جەتىستىككە جەتۋ قۇپياسى نە؟

– ءبىز كوماندامىز. بىزدە كوپ جىلدار بويى ءبىر قۇراممەن وينادىق. جاقىن دوستار اتانىپ تا كەتتىك. ءبىز ايانباي تەر توكتىك. وعان قوسا، ءبىز كەز كەلگەن قارسىلاستى جەڭۋگە بولاتىندىعىنا سەندىك. باستىسى سەنىم دۇرىس بولۋى كەرەك.

– ەيدۋر گۋدونسەن – ەۋرو-2016 تۋرنيرىندەگى سىزدەردىڭ ەڭ باستى كوشباسشىلارىڭىز بولدى دەي الاسىز با؟

– ارينە. مۇمكىن، ول ءبىزدىڭ قۇراما تاريحىنداعى ەڭ ۇزدىك ويىنشىلاردىڭ ءبىرى. كوماندامىزداعى كوپ فۋتبولشى ءۇشىن ول – كۋمير. ويتكەنى، كوپشىلىگىمىز ەندى فۋتبولعا كەلىپ جاتقان كەزدە، گۋدونسەن «چەلسي» مەن «بارسەلونا» ساپىندا گول سوعىپ ءجۇردى. ەيدۋرمەن ءبىر قۇرامادا ويناۋ مەن ءۇشىن ۇلكەن ابىروي. ول كىسىدەن ۇيرەنگەنىم كوپ. گۋدونسەن يسلانديا فۋتبولىنىڭ قاھارمانى.

– سىزدە ونىڭ ۇيالى تەلەفونىنىڭ ءنومىرى بار ما؟

– بار.

– ەيدۋرمەن قازاقستاندىق كلۋبقا اۋىساتىندىعىڭ جونىندە سويلەستىڭدەر مە؟

– ءيا، وسى جاقىندا سويلەسكەنبىز. ءبىر-ەكى كۇن بۇرىن شىعار. ول مەنىڭ اگەنتىممەن جاقسى تانىس. ەيدۋر گۋدونسەن ايتتى: «بۇل مانسابىڭ ءۇشىن دۇرىس جول ەكەندىگىڭە كوزىڭ جەتسە، وندا توسىلماي بار. قازاقستانداعى فۋتبول ويناعان ۋاقىتىڭنان ءلاززات ال».  گۋدونسەن قازاقستانمەن جاقسى تانىس. ول، وسى جەردە ۇلتتىق قۇراما ساپىندا گول سوققان. باسقا دا يسلانديا قۇراماسىندا بىرگە ونەر كورسەتەتىن دوستارىم ساتتىلىك تىلەدى.

– ماۋسىمنىڭ ورتاسىندا كومانداعا قوسىلعان كيىن ەمەس پە؟

– بىلمەيمىن. ارينە، ماۋسىمنىڭ باسىندا كەلگەن مەن ماۋسىم ورتاسىندا كەلگەننىڭ ايىرماشىلىعى بار. بىراق، مەن جاڭا كومانداعا تەز ۇيرەنىپ، كلۋبتىڭ جەتىستىككە جەتۋىنە كومەكتەسەتىنىمە سەنەمىن.

– نە ءۇشىن «استاناعا» اۋىسۋعا كەلىسىم بەردىڭىز؟

– «استانا» كوپ ۋاقىت بويى ماعان قىزىعۋشىلىق تانىتتى. بۇل دۇرىس شەشىم بولدى ما، ونى ۋاقىت كورسەتەدى. مەنىڭ جاڭا ماۋسىمنان كۇتەر جاقسى جاڭالىعىم كوپ. «استاناعا» كەلەتىن بولساق، بۇل جاقسى ويىنشىلارى بار كلۋب. ەۋروكۋبوكتە ونەر كورسەتىپ، مىقتىلىعىن دالەلدەپ جۇرگەن كوماندا.  بۇل دا مەنىڭ «استاناعا» اۋىسۋىما باستى سەبەپ بولدى.

– الايدا، شۆەيتسارياعا قاراعاندا قازاقستانداعى جاسىل الاڭ مەن ستاديون ماسەلەسى وتە ناشار ەكەنىن بىلەسىز...

– ءيا، بىلەمىن. قازاقستان چەمپيوناتى ويىندارىن قاراعان كەزدە كورگەنمىن جانە مەن بۇعان دايىنمىن. جالپى، جاڭا ەلگە بارا جاتقاندا بارلىق قيىن جاعدايعا دايىن بولۋىڭ ءتيىس.

– قانداي نومىردە ونەر كورسەتەتىنىڭىزدى شەشتىڭىز بە؟

– 10-شى ءنومىردى الۋدى قالايمىن. جاستار قۇرامالارىندا ونەر كورسەتىپ جۇرگەن كەزدە 10 نومىرمەن وينايتىنمىن. الايدا، كاسىپقوي فۋتبولعا كەلگەلى بەرى 10-شى ءنومىر كوپ ۋاقىتتا بوس بولمايدى.

– «استانا» كومانداسىندا قويعان باستى ماقساتىڭىز؟

– كلۋب قويعان ماقساتتارعا جەتۋگە كومەكتەسۋ.

سوڭعى جاڭالىقتار

تەرمينگە ساۋاتتىلىق كەرەك

قوعام • بۇگىن، 15:33

ەرلىكتى ەل ءبىلۋى ءتيىس!

قوعام • بۇگىن، 08:53

ساپارداعى سىر

رۋحانيات • بۇگىن، 08:51

اعالاردىڭ جاس شاعى

100 • بۇگىن، 08:42

اقاڭنىڭ اماناتى

رۋحانيات • بۇگىن، 08:40

ءجۇز جىل

100 • كەشە

ۇقساس جاڭالىقتار