اقپاراتتىق تۋر كەزىندە تۋريستىك فيرمالاردىڭ وكىلدەرى مۇنداعى دەمالىس ورىندارىنداعى باعا مەن ساپا دەڭگەيىن ءوز كوزدەرىمەن كورىپ, جاعدايمەن جەتە تانىستى. مۇنىڭ ءوزى بولاشاقتا بالقاشقا كەلۋگە نيەت بىلدىرگەن كليەنتتەرگە دەمالىس ايماعىن تاڭداۋدى ۇسىنۋ ءۇشىن كەرەك قادام بولاتىن.
وسىنداي ەكى تاراپقا دا ءتيىمدى ءىس-ارەكەتتەردىڭ ناتيجەسىندە ىسكەرلىك قارىم-قاتىناستار ورناتىلدى. مىسالى, فورۋمنىڭ كەيبىر قوناقتارى ىشكى ءتۋريزمدى بىرلەسىپ دامىتۋ نيەتىمەن ءوزارا بايلانىس ورناتۋ جونىندە شەشىم قابىلدادى. ال ەلوردالىق تۋرفيرمالاردىڭ ءبىرى بالقاش دەمالىس ايماعىمەن ىنتىماقتاستىق تۋرالى كەلىسىمشارتقا قول قويدى.
– ءبىز نۇر-سۇلتان-بالقاش باعىتىندا ىشكى ءتۋريزمدى دامىتۋ ماقساتىندا «باركوۆسكوە» دەمالىس ايماعىمەن كەلىسىمگە قول قويدىق. قاراعاندى وبلىسىنا وسى جەردە تۇراتىنداي ەتىپ تۋرلار ۇيىمداستىرامىز جانە ونى استانامىز بەن اقمولا وبلىسىنىڭ تۇرعىندارىنا ۇسىنباقشىمىز. ءبىزدىڭ كليەنتتەرىمىزگە دەمالىستارىن ۇيىمداستىرۋعا كومەكتەسەمىز جانە بالقاش كۋرورتتىق ايماعىنا تۋريستىك اعىندى مولايتۋعا ۇلەسىمىزدى قوسامىز دەگەن ۇمىتتەمىز, – دەيدى «MED&TOURISM KZ» جشس وكىلى دانيار قاۋسىلوۆ.
دەمالىس ايماعىنىڭ يەسى مارات ءمۇرسالىموۆتىڭ ايتۋىنشا, كەزدەسۋ تۋربيزنەسكە عانا ەمەس, مەملەكەتكە دە پايدالى بولماق. ىنتىماقتاستىق – تاراپتاردىڭ تۇراقتىلىعىن نىعايتادى, ياعني ىشكى ءتۋريزمدى دامىتۋعا, تۋريستىك نىسانداردى كوبەيتۋگە جانە سونىڭ ارقاسىندا جاڭا جۇمىس ورىندارىن اشۋعا ىقپالىن تيگىزەدى, دەگەن پىكىردە كاسىپكەر.
فورۋمعا رەسەيدەن كەلىپ قاتىسقان تۇمەندىكتەر سارىاركانىڭ تىلمەن ايتىپ جەتكىزگىسىز سۇلۋلىعىن كوبەن كورۋگە جانە قازاقستاندىق قوناقجايلىلىقتى سەزىنۋگە مۇمكىندىك تۋدىرعانى ءۇشىن ۇيىمداستىرۋشىلارعا ريزاشىلىق ءبىلدىرىپ, العىس ايتتى.
قاراعاندى وبلىسى
