اتالعان ەكى پاكەتتىڭ ايىرماشىلىعى قانداي؟ كەپىلدەندىرىلگەن تەگىن مەديتسينالىق كومەك پاكەتى مينيمالدى ستاندارتتاردان تۇرادى. مىسالى: شۇعىل كومەككە ءزارۋ ازاماتتارعا مەديتسينالىق كومەك كورسەتۋ, ەپيدەميانىڭ جاپپاي تارالۋىنا جول بەرمەۋ, مەملەكەتتىڭ ارالاسۋىن قاجەت ەتەتىن قيىن جاعدايلارعا دۋشار بولعان ناۋقاستارعا كومەك كورسەتۋ ت.ب. ساقتاندىرۋ پاكەتى پاتسيەنتتەردىڭ ءومىر ساپاسىن جاقسارتىپ, ۇلت بولاشاعىنىڭ نەگىزىن قالاۋعا باعىتتالاتىن وزگە دە كومەك تۇرلەرىن قامتيدى.
حابارلاماعا سۇيەنسەك, تمككك پاكەتىنىڭ جاڭا نۇسقاسىن ازىرلەگەن كەزدە تىزىمگە ەنگەن بارلىق قىزمەت تۇرلەرىن جان-جاقتى ساراپتالىپ, ەكشەلدى. پاكەتتەردىڭ جاڭا ۇلگىسىن دايىنداۋ بارىسىندا مينيسترلىك ءبىر جارىم جىل بويى مەديتسينا سالاسى وكىلدەرىمەن بىرلەسىپ جۇمىس ىستەدى. اتاپ ايتقاندا, قىزمەتتەردى ساتىپ الۋ, اقى تولەۋ, مونيتورينگ پروتسەسىن جۇزەگە اسىرۋ تەتىكتەرى كەڭىنەن تالقىلاندى. بۇل باعىتتاعى جۇمىستار الداعى ۋاقىتتا دا جالعاسىن تابادى. دەگەنمەن ءمامس جۇيەسىن ەنگىزۋگە دايىندىعىمىز جوعارى دەۋگە بولادى. جاڭا پاكەتتەر بيىل كۇزدە ەلىمىزدەگى ايماقتاردىڭ بىرىندە نوبايلى رەجيمدە ىسكە قوسىلماق. جاڭا جۇيە 2020 جىلدان باستاپ قازاقستاننىڭ بارلىق ايماقتارىندا ىسكە قوسىلادى.
«جالپى العاندا, كەلەر جىلعا ارنالعان بيۋدجەت جوباسىندا كەپىلدەندىرىلگەن تەگىن مەديتسينالىق كومەك پەن ساقتاندىرۋ پاكەتتەرى نەگىزىندە كورسەتىلەتىن كومەككە 1 620 ملرد تەڭگەدەن استام قارجى قاراستىرىلعان», - دەدى «الەۋمەتتىك مەديتسينالىق ساقتاندىرۋ قورى» كەاق باسقارما توراعاسى ايباتىر جۇماعۇلوۆ.
ەلىمىزدىڭ بارلىق ازاماتتارى پايدالانا الاتىن كەپىلدەندىرىلگەن تەگىن مەديتسينالىق كومەك پاكەتىنە جەدەل جاردەم مەن سانيتارلىق اۆياتسيا, شۇعىل ستاتسيونارلىق كومەك, پاللياتيۆتىك كومەك ەنگەن. سونىمەن قاتار, الەۋمەتتىك ماڭىزى بار سىرقاتتار مەن سوزىلمالى اۋرۋلاردىڭ نەگىزگى تۇرلەرىمەن اۋىراتىن تۇرعىندار وسى پاكەت شەڭبەرىندە كونسۋلتاتيۆتىك-دياگنوستيكالىق كومەكپەن, جوسپارلى ستاتسيونارلىق جانە ستاتسيوناردى الماستىراتىن كومەكپەن قامتاماسىز ەتىلەدى. امبۋلاتوريا دەڭگەيىندە ءدارى-دارمەكپەن قامتۋ, تۋبەركۋلەزگە شالدىققانداردى وڭالتۋ قىزمەتى دە وسى پاكەتكە كىرەدى.
ءمامس پاكەتى: كونسۋلتاتيۆتىك-دياگنوستيكالىق كومەك, سونىڭ ىشىندە باعاسى قىمبات بولىپ كەلەتىن زەرتحانالىق قىزمەت تۇرلەرىن, تمككك ەنبەگەن سىرقاتتاردى ءدارى-دارمەكپەن قامتاماسىز ەتۋ, تمككك پاكەتىنە جاتپايتىن جاعدايلاردا جوسپارلى ستاتسيونارلىق جانە ستاتسيناردى الماستىراتىن كومەكپەن قامتۋ, مەديتسينالىق وڭالتۋ جانە پاتسيەنت دەنساۋلىعىن قالپىنا كەلتىرۋگە باعىتتالعان ەم-دوم تۇرلەرىن قامتىماق.
ەستەرىڭىزگە سالا كەتسەك, تمككك شەڭبەرىندە حالىققا كورسەتىلەتىن مەديتسينالىق قىزمەتتەردى بيۋدجەت قارجىسى ەسەبىنەن, ءمامس پاكەتىنە ەنەتىن قىزمەتتەر – قوردىڭ اكتيۆتەرى ەسەبىنەن ساتىپ الىنادى. قازىرگى تاڭدا مەديتسينالىق ساقتاندىرۋ قورىنا قازاقستان بويىنشا 176,7 ملرد تەڭگە كولەمىندە جارنا اۋدارىلدى. جيناقتالعان قارجى ۇلتتىق بانكتە ساقتالادى جانە 2020 جىلدان باستاپ ءمامس شەڭبەرىندە كورسەتىلگەن قىزمەتتەر اقىسىن تولەۋگە جۇمسالادى.
