پرەمەر-مينيستر اسقار ءماميننىڭ توراعالىعىمەن وتكەن قر ۇكىمەتىنىڭ وتىرىسىندا تەگىن مەديتسينالىق كومەكتىڭ كەپىلدەندىرىلگەن كولەمىنىڭ تىزىمىنە وزگەرىستەر ەنگىزىلدى جانە 2020 جىلى ىسكە قوسۋ جوسپارلانعان مىندەتتى الەۋمەتتىك مەديتسينالىق ساقتاندىرۋ ء(مامس) جۇيەسىندەگى مەديتسينالىق كومەكتىڭ جاڭا ءتىزىمى بەكىتىلدى.
قر تۇڭعىش پرەزيدەنتى – ەلباسى نۇرسۇلتان نازارباەۆتىڭ ءمامس جۇيەسىنە كوشۋ بويىنشا تاپسىرمالارىن ورىنداۋ بارىسى, تەگىن مەديتسينالىق كومەكتىڭ كەپىلدەندىرىلگەن كولەمى مودەلىن ەنگىزۋ جانە مەملەكەت باسشىسى قاسىم-جومارت توقاەۆتىڭ مەديتسينالىق قزىمەتتەردىڭ ساپاسىن ارتتىرۋ بويىنشا مىندەتتەردىڭ ورىندالۋى تۋرالى قر دەنساۋلىق ساقتاۋ ءمينيسترى ەلجان ءبىرتانوۆ باياندادى. سونىمەن قاتار جەرگىلىكتى ينفراقۇرىلىمنىڭ دايىندىعى ماسەلەسى بويىنشا بىرقاتار وڭىرلەردىڭ اكىمدەرى تىڭدالدى.
«ءبارىمىزدىڭ الدىمىزدا مەديتسينالىق قىزمەتتەردىڭ قولجەتىمدىلىگى مەن ساپاسىن ارتتىرۋ بويىنشا ورتاق مىندەت قويىلعان», — دەدى اسقار مامين.
قازاقستان ۇكىمەتى مەديتسينالىق قىزمەتتەردىڭ قولجەتىمدىلىگى مەن ساپاسىن ارتتىرۋ بويىنشا جۇمىستاردى جالعاستىراتىن بولادى. وسى رەتتە, دەنساۋلىق ساقتاۋدى دامىتۋدىڭ 2025 جىلعا دەيىنگى جاڭا مەملەكەتتىك باعدارلاماسى ازىرلەنۋدە. ماڭىزدى مىندەتتەردىڭ ءبىرى — مىندەتتى الەۋمەتتىك مەديتسينالىق ساقتاندىرۋدى ءتيىمدى ەنگىزۋ. ساقتاندىرۋدى ءتيىمدى ەنگىزۋ ءۇشىن بيىلعى 1 قىركۇيەكتەن باستاپ قاراعاندى وبلىسىندا پيلوتتىق جوبا ىسكە قوسىلادى, وعان وڭىردەگى بارلىق مەديتسينالىق ۇيىمدار تارتىلادى. ا. مامين اتاپ وتكەندەي, بۇل تەتىكتى بارلىق وڭىرلەرگە تاراتۋ جانە 2020 جىلدان باستاپ مەديتسينالىق ساقتاندىرۋ تولىق ىسكە قوسىلعان كەزدە ەسكەرۋ قاجەت.
قر پرەمەر-ءمينيسترى وڭىرلەردىڭ اكىمدەرىنە مەديتسينالىق ۇيىمداردى كومپيۋتەرلەرمەن, ۇزدىكسىز ينتەرنەتپەن جانە اقپاراتتىق جۇيەلەرمەن جاراقتاندىرۋ بويىنشا ماسەلەلەردى شەشۋدى تاپسىردى. بۇل باعىتتا اتىراۋ, ماڭعىستاۋ, پاۆلودار وبلىستارىندا جۇمىس ساپالى تۇردە ۇيىمداستىرىلعان.
ازاماتتاردى مەديتسينالىق ساقتاندىرۋ جۇيەسىمەن قامتۋدى ارتتىرۋعا جەكەلەگەن كوڭىل ءبولۋ تاپسىرىلدى. ول ءۇشىن ءوزىن-ءوزى جۇمىسپەن قامتىعان تۇرعىنداردى فورماليزاتسيالاۋ بويىنشا جۇمىستاردى اياقتاپ, تەگىن مەديتسينالىق كومەكتىڭ كەپىلدەندىرىلگەن كولەمى مەن ءمامس بويىنشا حاباردارلىق دەڭگەيىن كوتەرۋ قاجەت.
«ءاربىر ازامات مەملەكەت تاراپىنان كەپىلدىك رەتىندە قانداي مەديتسينالىق كومەكتىڭ تەگىن كورسەتىلەتىنىن ناقتى ءبىلۋى ءتيىس, — دەدى ا. مامين. — مەديتسينالىق كومەكتىڭ قولجەتىمدىلىگى مەن ساپاسى ماسەلەسى ءبارىمىز ءۇشىن اسا ماڭىزدى».
وتىرىس اياسىندا «قازاقستان رەسپۋبليكاسىنىڭ ۇكىمەتى تۋرالى» كونستيتۋتسيالىق زاڭعا سايكەس ۇكىمەت قۇرامىنا العاش رەت قوسىلعان مينيسترلەر: ءبىلىم جانە عىلىم ءمينيسترى ا. ايماعامبەتوۆتىڭ, مادەنيەت جانە سپورت ءمينيسترى ا. رايىمقۇلوۆانىڭ, ەكولوگيا, گەولوگيا جانە تابيعي رەسۋرستار ءمينيسترى م. مىرزاعاليەۆتىڭ انت بەرۋ ءراسىمى ءوتتى.
