ەل پرەزيدەنتىنىڭ بولاشاقتا اتقارار ءىسى, العا قويىپ وتىرعان ماقسات-مۇراتىن زەيىن قويىپ, وتە مۇقيات تىڭدادىق. قوعامداعى باستى-باستى ماسەلەلەرگە مەيلىنشە نازار اۋدارعاندىعى تىڭداعان قاۋىمنىڭ شىن مانىندە ريزاشىلىعىن تۋدىرعاندىعىنا ەشبىر تالاس جوق.
– مەنىڭ ماقساتىم – قوعامنىڭ بىرلىگىن قامتاماسىز ەتۋ جانە ءاربىر ازاماتتىڭ قۇقىعىن قورعاۋ. قازاقستاننىڭ ۇلتتىق مۇددەسىن ارقاشان جانە بارلىق جەردە قورعايتىن بولامىن, – دەدى قاسىم-جومارت توقاەۆ.
بۇل ءسوز ەلىن سۇيگەن, سۇيىكتى ەلىنە قىزمەت ەتەتىن پاراساتتى ادامنىڭ ءسوزى. ەل پرەزيدەنتى الداعى ۋاقىتتا اتقارىلۋعا ءتيىستى نەگىزگى ون باعىتتى قولمەن قويعانداي ەتىپ بەلگىلەپ بەردى. سول باعىتتاعى شارۋالاردى دەرەۋ جۇزەگە اسىرۋعا ۇمتىلۋ كەرەكتىگىن دە ەكپىن ءتۇسىرىپ ايتىپ ءوتتى. بۇل اسقارالى مىندەتتەردى سانامەن سالماقتاي سارالاعاندا ەلدىڭ كوكەيىندە جۇرگەن كوپ ماسەلەلەردى ءدوپ باسقاندىعى ايقىن.
ءوز باسىما الداعى ۋاقىتتا قوعامدىق سەنىم ۇلتتىق كەڭەسىنىڭ قۇرىلاتىندىعى قاتتى ۇناپ وتىر. ەل ىشىندەگى جاڭالىق جايلى پىكىرلەسكەندە اقساقالدار دا وسى ماسەلەگە رازىلىق تانىتۋدا. شىن مانىندە ەلدىڭ بىرلىگىن, ىنتىماعىن نىعايتۋعا اعا بۋىننىڭ قوسار ۇلەسى از ەمەس قوي جانە ول ادامدار ەل ىشىندەگى تۋىندايتىن كەيبىر ماسەلەلەردى پرەزيدەنتكە ايتا الاتىن, جەتكىزە الاتىن تۇلعالار بولۋى كەرەك. دالىرەك ايتقاندا, ول قاراپايىم حالىق پەن ەل پرەزيدەنتىنىڭ اراسىنداعى ىنتىماق پەن بىرلىكتىڭ التىن كوپىرى بولماق. تامىز ايىندا قۇرىلاتىن وسى كەڭەسكە ەل ىشىندەگى بىرلىككە ىقپال ەتە الاتىن ادامدار سايلانسا دەگەن ءوز پىكىرىمدى ايتا كەتكىم كەلەدى.
شياپ اليەۆ,
كوكشەتاۋ قالالىق ارداگەرلەر كەڭەسىنىڭ توراعاسى
