17 ماۋسىم، 2019

ەكى ايدا 270 شاقىرىمعا شاپقان جۇيرىك

2515 رەت كورسەتىلدى

اتىمنىڭ 150 شاقىرىمعا شىدايتىنىنا دا سەنىمدىمىن.


كەشە تارباعاتاي اۋدانىندا ەل تاريحىندا تۇڭعىش رەت « ۇلى دالا قازاناتى» اتتى 140 شاقىرىمدىق ات بايگەسى ۇيىمداستىرىلعان بولاتىن. قازاقتىڭ ۇزاق جۇرىسكە شىدامدى قازاناتتارىن ءھام الاشتىڭ اتقا مىعىم وتىراتىن، شىمىر جىگىتتەرىن انىقتاۋ ماقساتىندا وتكىزىلگەن جارىسقا ەلىمىزدىڭ تۇكپىر-تۇكپىرىنەن جانە رەسەيدەن 100-دەن استام ات قاتىسقان-دى. تاڭعى ساعات 4-تتە باستالىپ، تۇسكە دەيىن سوزىلعان قىل قۇيرىقتىلار سايىسىندا 1 ورىندى اقسۋات اتىنان قوسىلعان الماتى وبلىسىنىڭ تالدىقورعان قالاسىنىڭ قىز جيرەن ەسىمدى (ات يەسى – رۇستەم دوسجانوۆ) جارتىلاي اسىل تۇقىمدى جۇيرىگى يەلەنگەن-ءدى. ال 2-3 ورىنداردى كەزىندە قازاقتىڭ كورنەكتى جازۋشىسى عابيت مۇسىرەپوۆ «بوشايدىڭ ءۇش قاراسى» دەپ تامسانا اڭگىمە جازعان التايدىڭ ابىز اقساقالى بوشاي كىتاپباەۆتىڭ تۋعان جەرى – كاتونقاراعاي اۋدانىنىڭ اتبەگىلەرى ءوزارا ءبولىستى. ءبىر تاڭعالارلىعى، ەكى اي بۇرىن زايساندا تۇڭعىش رەت ۇيىمداستىرىلعان 130 شاقىرىمدىق بايگەدە 2 ورىن العان پىراق ەسىمدى ات بۇل جولى دا وسى جەتىستىگىن قايتالاپ، ەلدى ەلەڭ ەتكىزدى (ايتپاقشى، سول جارىستا 1 ورىندى وسى اۋداننىڭ اتى يەلەنگەن-ءدى). ءبىز سول اتقا شاپقان تاقىمى تاستاي شاباندوزبەن از-كەم اڭگىمەلەسكەن ەدىك.      

-بۇل – كاتونقاراعايدىڭ ورنەك اۋىلىنىڭ اتى. اتتىڭ يەسى – قايرات سەركەنوۆ. مەنىڭ اكەمنىڭ تۋعان اعاسى. اتتى دايىنداپ، شاپقان – ءوزىم. اتى-ءجونىم - قۋانىش تۇرسىنحانوۆ. زايساندا 130 شاقىرىمدى 6 جارىم ساعاتتا شاۋىپ ءوتتىم. بۇل جولعىسى 7 جارىم ساعات دەپ جاتىر بايگەنى كورگەن كىسىلەر، - دەپ باستادى اڭگىمەسىن قۋانىش.

-بۇل اتتىڭ تۇقىمى قانداي؟

-تازا قازاقى ات دەۋگە بولمايدى. بۇرىنعى دون جىلقىسىنان قالعان تۇقىم عوي. قانى قازاقى جىلقىلارمەن ارالاسقان. تازا، قازاقتىڭ جابى جىلقىسى ەمەس. بۇل - جەرگىلىكتى جىلقى تۇقىمى. قازانات دەۋگە دە بولاتىن شىعار. قازاناتتىڭ دا تۇبىندە تەكتىلىك بولعان عوي. ءبىزدىڭ كاتونقاراعاي اۋدانىنىڭ سولداتوۆا دەگەن اۋىلىندا ورىس ۇلتىنىڭ وكىلدەرى دون تۇقىمىن كوپ ۇستاعان. بۇل - التايدىڭ قىتىمىر قىسىنا دا ءتوزىمدى، جۇرىسكە دە شىدامدى جىلقى. وسىنداي جىلقىلار كاتونقاراعايدا كوپ تاراعان. ياعني قازاقى جىلقى مەن دون جىلقىسىنىڭ تۇقىمى ارالاسقان.


-اتتى بايگەگە قانشا ۋاقىت دايىندادىڭىز؟

-زايسانداعى 130 شاقىرىمدىق جارىسقا 25 كۇن دايىندادىم. بۇل جولعى جارىسقا زايساننان كەيىن ءبىر ايداي تىنىقتىرىپ بارىپ باپتاي باستادىم.

-بۇل بايگەگە قوسىلىپ جۇرگەن ات پا؟ الدە ءمىنىستىڭ اتى ما؟

-ءمىنىستىڭ اتى. مالعا، شارۋاشىلىققا ءمىنىپ جۇرگەن ات. الامانعا قوسىلماعان ات.

-ءۇشىنشى ورىندى دا كاتونقاراعايدىڭ اتى الدى عوي.

-ءيا، ول – ۇلكەن نارىن اۋىلىنىڭ اتى. اتتىڭ باپكەرى – اتاقتى بوشاي كىتاپباەۆ اقساقالدىڭ اۋىلىنان.  

- 140 شاقىرىم اتقا دا، شاباندوزعا دا وڭاي بولمايتىنى انىق. جالپى، جارىس قالاي ءوتتى؟

- تاڭ قىلاڭ بەرە، ساعات تورتتەن 25 مينۋت كەتكەندە جارىس جولىنا شىقتىق قوي. 130 شاقىرىم بويى قاراعاندىدان كەلگەن ات الدىنا قارا سالمادى. مارەگە جاقىنداعاندا باسىپ وزدىق. شارشاپ، شاماسى جەتپەي قالعان سەكىلدى. ال 1 ورىن العان الماتى وبلىسىنىڭ اتىمەن 40 شاقىرىمنان بەرى قاراي قاتارلاسا شاۋىپ وتىردىق. مارەگە شامامەن ءبىر شاقىرىمداي جەر قالعاندا ەكەۋمىز دە تىزگىندى قويا بەردىك. ەكەۋمىز دە مارەدەن شاۋىپ وتتىك. تالدىقورعاننىڭ اتى الامانعا قوسىلىپ جۇرگەن ات ەكەن. الماتى جاقتا تازاقاندى، اسىل تۇقىمدى جىلقىلار كوپ قوي. ايماقتا مۇنداي اتتار از.

-150 شاقىرىم بولعاندا وزىپ كەتەر مە ەدىڭىز؟

-ونى ايتۋ قيىن. بىراق اتىمنىڭ 150 شاقىرىمعا شىدايتىنىنا سەنىمدىمىن.

- بايگەگە بۇرىننان شاۋىپ ءجۇرسىز بە؟

- ءوزىم ورنەك اۋىلىندا تۇرامىن. اكەم دە ات باپتايدى.

- گيننەستىڭ رەكوردتار كىتابىنا ەنگىزۋگە لايىق ات جارىسىنا ءبىر ەمەس، ەكى مارتە قاتىسىپ، جۇلدە الدىڭىز. ەكى جارىستى قوسساق، ەكى اي ىشىندە 270 شاقىرىمدى باعىندىرىپسىز. العان اسەرىڭىز قانداي؟!

-140 شاقىرىمدىق بايگە قازاقستاندا العاش رەت ءوتتى عوي. مۇنداي جارىستا بايگە الۋ ۇلكەن قۋانىش، زور مارتەبە دەپ ويلايمىن.

- كەشە «الدىڭعى ات بايگەگە جولدان قوسىلدى» دەگەن اڭگىمە ايتىلدى. بۇعان نە دەيسىز؟

 -جارىس ءادىل بولدى. كەيبىر ادامدار «وسىنشا شاقىرىمدا نەگە شارشامايدى؟» دەپ ويلاعان بولۋى كەرەك. ءبىرىنشى ورىن العان ات تولىق شاۋىپ شىقتى. وعان ءوزىم كۋامىن. ەشقانداي داۋ جوق.

-140 شاقىرىم شاپقاندا جولدا قانشا رەت ايالدادىڭىزدار؟

- ءوزىم اتىمدى ءۇش رەت توقتاتىپ، ەكى-ءۇش مينۋتتان دەمالتىپ، ازداپ سۋ ۇرتاتىپ وتىردىم. جارىسقا ۇزىن سانى 104 ات قاتىستى. مارەگە جەتكەنى - 12. ءبىز كەلگەننەن ءبىر ساعاتتان كەيىن كەلگەن اتتار دا بولدى.         

- بيىلعى ءساۋىر ايىنىڭ 7-سىندە زايساندا وتكەن 130 شاقىرىمدىق بايگەدە 1 ورىن العان كاتونقاراعايدىڭ اتى ءولىپ قالدى دەپ ەستىدىك. راس پا وسى؟

- بۇل - جالعان اقپارات.

- قۋانىش، قىسقا-نۇسقا سۇحباتىڭىزعا العىس بىلدىرەمىز.


سوڭعى جاڭالىقتار

ۇرلانعان 28 كولىك تابىلدى

وقيعا • بۇگىن، 15:11

اتىراۋدا 23 ادامدى شايان شاققان

ايماقتار • بۇگىن، 13:35

سپورت جاڭالىقتارىنا شولۋ

سپورت • بۇگىن، 09:11

ۇقساس جاڭالىقتار