ايماقتاعى العىر جاستاردىڭ باسىن قوسقان سايىس «قوبىلاندى باتىر» جىرىنىڭ ماراباي نۇسقاسىن جاتتاپ, ايتۋعا ارنالعان بولاتىن. نەگىزگى بايقاۋعا وبلىستىڭ بارلىق اۋدان, قالالارىنان 51 ءجاسوپىرىم قاتىسىپ, ولاردىڭ ىشىندەگى 15 ۇزدىك جىرشى ەكىنشى اينالىمعا ءوتتى.
– اۋىز ادەبيەتىمەن سۋسىنداپ وسپەگەن, ونى جەتە بىلمەگەن ۇرپاق ەرتەڭ تىلىنە جانى اشيتىن, تۋعان جەرىنە قىزمەت ەتەتىن, ءوز ەلىنىڭ ناعىز پاتريوتى بولىپ وسەدى دەپ ايتۋ قيىن. سوندىقتان دا بۇگىنگى بايقاۋىمىز از دا بولسا وڭ سەپتىگىن تيگىزەدى دەگەن ۇمىتپەن, ۇزىن-سونار جىردى جاتتاپ, بايقاۋعا باق سىناۋعا كەلگەن ءاربىر وقۋشى سانالارىنا ساۋلە ۇيالاتىپ, رۋحاني ازىق الدى دەپ سەنەمىز. باتىرلار جىرىنداعى پاتريوتتىق سەزىمدەردى بۇگىنگى ۇرپاقتىڭ ساناسىنا ءسىڭىرىپ, وقۋشىلاردىڭ شىعارماشىلىق جانە زياتكەرلىك قابىلەتىن دامىتىپ, كوركەم ادەبيەتكە دەگەن قىزىعۋشىلىعىن ارتتىراتىن مۇنداي يگى شارا بولاشاق تا دا ءوز جالعاسىن تابۋى كەرەك – دەيدى بايقاۋ جايىندا الماتى وبلىسىنىڭ تىلدەردى دامىتۋ جونىندەگى باسقارماسىنىڭ باسشىسى ايدار باشباەۆ.
بايقاۋ ناتيجەسىندە «قوبىلاندى باتىر» جىرىنىڭ ماراباي جىراۋ نۇسقاسىن مۇدىرمەي جاتقا ايتىپ قارسىلاستارىنان وزا شاپقان ەراسىل تولەگەنوۆ باس جۇلدەنى قانجىعاسىنا بايلادى. اۋىز ادەبيەتىنە جەتىك, سوزگە شەشەن ءارى جىردى تولىق جاتتاعان ءجاسوسپىرىم ىلە اۋدانىنان كەلگەن ەكەن.
الماتى وبلىسى
