التاي كولگىنوۆ ەڭ الدىمەن تەتس-2 جۇمىسى مەن قالانىڭ جارىقتاندىرۋ ساپاسىنا ءمان بەردى. قالانى جىلۋ مەن سۋمەن قامتاماسىز ەتۋدە تەتس-ءتىڭ ماڭىزى ەرەكشە زور. اكىمگە نىساننىڭ قازىرگى جاعدايى مەن الداعى جىلىتۋ ماۋسىمىنا دايىندىعى باياندالدى. التاي كولگىنوۆ جىلىتۋ ماۋسىمىنا دايىندىقتى الدىن-الا جۇرگىزۋ قاجەتتىگىن اتاپ ءوتتى.
بۇگىندە جەو-1, جەو-2 بۇگىندە ەلورداداعى 2513 كوپقاباتتى ءۇيدى جىلۋ ەنەرگو رەسۋرستارمەن قامتاماسسىز ەتەدى. "جىلىتۋ ماۋسىمى كەزىندە تۇرعىن ۇيلەرگە ۇزدىكسىز جىلۋدى قامتاماسىز ەتۋ ءۇشىن الدىن-الا, وسى باستان دايىندالۋىمىز ءتيىس"- دەدى اكىم. التاي كولگىنوۆ نىسانداردى ارالاۋ بارىسىندا قالا كوشەلەرىن جارىقتاندىرۋدى تەكسەردى. ەلوردانى جارىقتاندىرۋ قالا تۇرعىندارىنىڭ تۇنگى ۋاقىتتاعى قاۋىپسىزدىگىنىڭ كەپىلى.
ەلباسىنىڭ تاپسىرماسىنا سايكەس Smart City جوباسى اياسىندا ەلوردا كوشەلەرىن جارىقتاندىرۋدىڭ تيىمدىلىگىن قامتاماسىز ەتۋ جۇمىسى جۇرگىزىلۋدە. وسى ورايدا, اكىم اتالعان باعىتتاعى جۇمىستى كۇشەيتۋ قاجەتتىگىن اتادى. "قالادا شامدار جانباي تۇرعان نەمەسە مۇلدەم جارىعى جوق كوشەلەر بار. ويتكەنى ولار قالا بالانسىنا الىنباعان. بۇعان جول بەرۋگە بولمايدى. بۇل سەبەپتى ءوزى اقتاۋعا كەلمەيدى. ونىڭ ۇستىنە اسىرەسە جاز ۋاقىتىندا بالالار مەن ۇلكەن ادامداردىڭ جۇرۋىنە كەدەرگى كەلتىرەدى. قاۋىپسىزدىك ماسەلەلەرى شۇعىل ارەكەتتى قاجەت ەتەتىنىن ءتۇسىنۋىمىز كەرەك", - دەپ ءوز پىكىرىن ءبىلدىردى التاي كولگىنوۆ. ەلوردا اكىمى نىسانداردى ارالاۋ بارىسىندا "ەسىل" وزەنىنىڭ جاعالاۋىن, "جاستار" شاعىن اۋدانىن جانە "نۇرلى جول" ۆوكزالى اۋماقتارىن اباتتاندىرۋدى تەكسەردى.
