قازاقستان رەسپۋبليكاسى پرەزيدەنتىنىڭ جارلىعىمەن كۇلاش نوعاتايقىزى ءشامشيدينوۆا باسقا جۇمىسقا اۋىسۋىنا بايلانىستى قر ءبىلىم جانە عىلىم ءمينيسترى لاۋازىمىنان بوساتىلدى.
اسقار مامين ك. شامشيدينوۆاعا جەمىستى جۇمىسى ءۇشىن العىس ءبىلدىرىپ, جاڭا ورىندا ساتتىلىك تىلەدى.
«كۇلاش نوعاتايقىزى - تاجىريبەسى مول باسشى. مينيستر قىزمەتىندە قارقىندى جۇمىس ىستەپ, ەلىمىزدىڭ ءبىلىم بەرۋ سالانىڭ دامۋىنا ەلەۋلى ۇلەس قوستى», — دەدى قر پرەمەر-ءمينيسترى.
قر ۇكىمەتىنىڭ باسشىسى قر ءبىلىم جانە عىلىم مينيسترلىگىنىڭ ۇجىمىنا جاڭا ءمينيستردى تانىستىردى. ا. مامين اسحات ايماعامبەتوۆتىڭ ءبىلىم بەرۋ سالاسىندا ءتيىستى ءبىلىمى مەن ۇلكەن تاجىريبەسى بار ەكەنىن اتاپ ءوتتى. اسحات ايماعامبەتوۆ ءتۇرلى جىلدارى قاراعاندى وبلىسىنىڭ ءبىلىم باسقارماسىنىڭ باسشىسى, ءبىلىم جانە عىلىم ۆيتسە-ءمينيسترى قىزمەتتەرىن اتقاردى, قاراعاندى وبلىسى اكىمىنىڭ ورىنباسارى بولدى.
پرەمەر-مينيستر ءبىلىم جانە عىلىم مينيسترلىگىنىڭ الدىندا زور مىندەتتەر تۇرعانىن ايتتى. بۇل – مەكتەپكە دەيىنگى, ورتا, كاسىپتىك-تەحنيكالىق جانە جوعارى ءبىلىمدى جاڭعىرتۋ, سۇرانىسقا يە زاماناۋي ماماندار دايارلاۋ, ءبىلىم جانە عىلىمنىڭ ساپالى جۇيەسىن دامىتۋ.
