بيىلعى ناۋرىز ايىندا قازاقستاننىڭ تۇڭعىش پرەزيدەنتى – ەلباسى, ەلىمىزدىڭ ەگەمەندىگىن قولىمىزعا ۇستاتقان, الەمنىڭ ساياسي كارتاسىندا پايدا بولعان جاس مەملەكەتتى جەر-جاھانعا تانىتقان, ىشكى-سىرتقى ساياساتتا اسقان كورەگەندىكپەن جول تابا بىلگەن, تەك وتانىمىزدا عانا ەمەس, ايماقتىق, حالىقارالىق دەڭگەيدە تاتۋلىق پەن بەيبىتشىلىكتىڭ, تۇراقتىلىقتىڭ جارشىسىنا اينالعان, الەمنىڭ يادرولىق قارۋسىزدانۋىنا سۇبەلى ۇلەس قوسقان, ازعانتاي ۋاقىتتىڭ ىشىندە قازاقستاندى دامىعان 50 مەملەكەتتىڭ قاتارىنا قوسقان نۇرسۇلتان نازارباەۆ ءوز ەركىمەن پرەزيدەنتتىك وكىلەتتىلىگىن توقتاتىپ, ەل تاريحىنىڭ جاڭا كەزەڭىن باستاپ بەرگەن بولاتىن.
ەلباسى ءوزىنىڭ وتىز جىلعا جۋىق ۋاقىتتاعى سارابدال ساياساتىن جالعاستىرۋشى رەتىندە قاسىم-جومارت توقاەۆقا تاڭداۋ جاساپ, حالىقارالىق دەڭگەيدەگى ديپلومات, الەم كوشباسشىلارىنىڭ اراسىندا زور بەدەلگە يە, بۇۇ باس حاتشىسىنىڭ ورىنباسارى لاۋازىمىن ابىرويمەن اتقارعان, سىني ساتتەردە ەل ۇكىمەتىن باسقارىپ, حالقىمىزدىڭ سەنىمىنەن شىققان تۇلعاعا مەملەكەتتىڭ بيلىگىن تاپسىردى. نۇرسۇلتان نازارباەۆتىڭ بۇل تاڭداۋىن قازاقستاندىقتار تولىق قولدادى. بۇل سەنىم 9 ماۋسىم كۇنى وتكەن سايلاۋدا ناقتى تسيفرلارمەن, حالىقتىڭ ىقىلاسىمەن, داۋىس بەرۋشىلەردىڭ بەلسەندىلىگىمەن ناقتى دالەلدەندى. Nur Otan پارتياسىنىڭ اتىنان دوداعا تۇسكەن ق.توقاەۆ 9 ماۋسىم كۇنى قازاقستان پرەزيدەنتىنىڭ كەزەكتەن تىس سايلاۋىندا سايلاۋشىلاردىڭ 70,96 پايىزىنىڭ نەمەسە 6539715 ادامنىڭ داۋىسىن الىپ, ايقىن باسىمدىقپەن جەڭىسكە جەتتى.
ارينە, وتانداستارىمىز پرەزيدەنت سايلاۋىنا العاش رەت ەلباسىنىڭ قاتىسپاۋىنا توسىرقاي قاراپ, ءدۇدامال وي كەشكەنى دە راس. الايدا نۇرسۇلتان نازارباەۆتىڭ سەنىمى مەن قولداۋىنا يە بولعان قاسىم-جومارت توقاەۆتى قازاقستاندىقتار جاتسىنعان جوق جانە تۇڭعىش پرەزيدەنتتىڭ تاڭداۋىنا ءشۇباسىز سەندى. ال كەشەلى-بەرلى قازاقستاننىڭ سايلانعان پرەزيدەنتىنە وزگە مەملەكەتتەردىڭ, حالىقارالىق ۇيىمداردىڭ باسشىلارى اتىنان تولاسسىز كەلىپ جاتقان قۇتتىقتاۋلاردى الەمدىك قوعامداستىقتىڭ دا ەلىمىزدەگى ساياسي, تاريحي وزگەرىستەرگە قولداۋ كورسەتۋىنىڭ بەلگىسى رەتىندە قاراۋعا بولادى.
سونىمەن, كەشە نۇر-سۇلتان ۋاقىتىمەن ساعات 10.30-دا تاۋەلسىزدىك سارايىنىڭ ۇلكەن زالىنا الدىمەن قازاقستاننىڭ مەملەكەتتىك تۋى, قازاقستان پرەزيدەنتىنىڭ شتاندارتى مەن اتا زاڭىمىز – كونستيتۋتسيا اكەلىندى.
مۇنان سوڭ سالتاناتتى شاراعا جينالعان 3 مىڭعا جۋىق ادام قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتى اسقان قوشەمەتپەن قارسى الدى. ارينە, تولاسسىز قوشەمەت وسى جىلدار ىشىندە ەلباسىنىڭ سەنىمىن اقتاپ, ەلدەگى رەفورمالاردى, مەملەكەتتىك ساياساتتى جۇزەگە اسىرۋعا ۇلەس قوسقان سەرىكتەستەرىنىڭ رياسىز ىقىلاسى ەدى.
ەلباسى توردەگى ورىنعا جايعاسقان سوڭ قازاقستاننىڭ جاڭادان سايلانعان پرەزيدەنتى قاسىم-جومارت توقاەۆ مەملەكەتتىك كۇزەت قىزمەتى باستىعىنىڭ راپورتىن قابىلداپ, ىشكە كىردى. بۇل تاريحي ءسات ەلباسى ءسوزىن جازعان «ەلىم مەنىڭ» انىمەن ورنەكتەلدى.
مۇنان سوڭ مىنبەرگە كونستيتۋتسيالىق كەڭەس توراعاسى قايرات ءمامي كوتەرىلدى.
– قۇرمەتتى ۇلىقتاۋ راسىمىنە قاتىسۋشىلار. بۇگىن ەلىمىزدىڭ تاريحىندا تاعى دا ءبىر ەرەكشە كۇن. بۇكىلحالىقتىق سايلاۋدىڭ ناتيجەسىندە قاسىم-جومارت كەمەل ۇلى توقاەۆ قازاقستان رەسپۋبليكاسىنىڭ پرەزيدەنتى بولىپ سايلاندى. مەن كونستيتۋتسيالىق كەڭەستىڭ ءتوراعاسى رەتىندە قازاقستان رەسپۋبليكاسى كونستيتۋتسياسىنىڭ 42-بابىنا سايكەس جاڭا سايلانعان قازاقستان رەسپۋبليكاسىنىڭ پرەزيدەنتى ءوز قىزمەتىنە قازاقستان حالقىنا انت بەرگەن ساتىنەن باستاپ كىرىسەتىنىن حابارلايمىن, – دەدى ق.ءمامي.
بۇل حابارلاۋدان سوڭ قاسىم-جومارت توقاەۆ وڭ قولىن كونستيتۋتسياعا قويىپ: «قازاقستان حالقىنا ادال قىزمەت ەتۋگە, قازاقستان رەسپۋبليكاسىنىڭ كونستيتۋتسياسى مەن زاڭدارىن قاتاڭ ساقتاۋعا, ازاماتتاردىڭ قۇقىقتارى مەن بوستاندىقتارىنا كەپىلدىك بەرۋگە, قازاقستان رەسپۋبليكاسى پرەزيدەنتىنىڭ وزىمە جۇكتەلگەن مارتەبەلى مىندەتىن ادال اتقارۋعا سالتاناتتى تۇردە انت ەتەمىن» دەپ, مەملەكەتتىك تىلدە انت قابىلدادى.
سودان كەيىن قازاقستان پرەزيدەنتى لاۋازىمىنا رەسمي كىرىسكەن قاسىم-جومارت توقاەۆ قازاقستاننىڭ مەملەكەتتىك تۋىن ءسۇيدى. سول ساتتە جاڭا سايلانعان قازاقستان پرەزيدەنتىنىڭ قىزمەتكە كىرىسۋ قۇرمەتىنە مەملەكەتتىك ءانۇران وينالىپ, زالعا جينالعان وتانداستارىمىز وڭ قولدارىن جۇرەك تۇسىنا قويىپ, گيمندى قوسىلا شىرقاپ تۇرعان ۋاقىتتا ەلوردا كوگىن زەڭبىرەكتەردەن 21 رەت اتىلعان وق جاڭعىرتىپ تۇردى. اقوردا رەزيدەنتسياسىنىڭ ۇستىندە قازاقستان رەسپۋبليكاسىنىڭ مەملەكەتتىك تۋى كوتەرىلدى.
ورتاعا شىققان ورتالىق سايلاۋ كوميسسياسىنىڭ توراعاسى بەرىك يماشەۆ وزىنە جۇكتەلگەن تاعى ءبىر سالتاناتتى ءراسىمدى ورىنداۋ ءۇشىن ءسوز الدى.
– قۇرمەتتى قاسىم-جومارت كەمەل ۇلى! 2019 جىلعى 9 ماۋسىمدا وتكەن قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىنىڭ قورىتىندىسى بويىنشا مەملەكەتىمىزدىڭ ءتيىستى زاڭدارىنا سايكەس سىزگە پرەزيدەنت كۋالىگىن تاپسىرۋعا رۇقسات ەتىڭىز, – دەگەن ب.يماشەۆ مەملەكەتتىك ميسسياسىن ورىندادى.
رەسمي راسىمدەردەن سوڭ مەملەكەت باسشىسى قاسىم-جومارت توقاەۆ قازاقستان حالقىنا جۇرەكجاردى ءسوزىن ارنادى.
(پرەزيدەنت قاسىم-جومارت توقاەۆتىڭ ۇلىقتاۋ راسىمىندەگى سويلەگەن ءسوزى گازەتىمىزدە جەكە جاريالانىپ وتىر).
ۇلىقتاۋ راسىمىنە تۇڭعىش پرەزيدەنت – ەلباسى نۇرسۇلتان نازارباەۆتان بولەك, قازاقستان رەسپۋبليكاسىنىڭ پارلامەنتى دەپۋتاتتارى, ۇكىمەت مۇشەلەرى, جوعارعى سوت سۋديالارى, كونستيتۋتسيالىق كەڭەستىڭ مۇشەلەرى, پرەزيدەنت اكىمشىلىگى مەن پرەمەر-مينيستر كەڭسەسىنىڭ وكىلدەرى, ورتالىق مەملەكەتتىك باسقارۋ ورگاندارىنىڭ باسشىلارى, ورتالىق سايلاۋ كوميسسياسى مەن قازاقستان حالقى اسسامبلەياسىنىڭ مۇشەلەرى, ءدىني كونفەسسيا وكىلدەرى, وبلىستار مەن نۇر-سۇلتان, الماتى جانە شىمكەنت قالالارىنىڭ اكىمدەرى, قازاقستانداعى ديپلوماتيالىق وكىلدىكتەردىڭ باسشىلارى, پرەزيدەنتتىككە ۇمىتكەر بولعاندار, Nur Otan پارتياسىنىڭ باسشىلىعى, رەسپۋبليكالىق جانە ايماقتىق قوعامدىق شتابتاردىڭ مۇشەلەرى, قوعامدىق ۇيىمداردىڭ جانە بۇقارالىق اقپارات قۇرالدارىنىڭ وكىلدەرى, ىسكەر توپتار وكىلدەرى, كورنەكتى عالىمدار, مادەنيەت جانە ونەر قايراتكەرلەرى, جاستار ۇيىمدارىنىڭ كوشباسشىلارى قاتىستى.
سوڭىندا قازاقستان رەسپۋبليكاسىنىڭ پرەزيدەنتى – قازاقستان قارۋلى كۇشتەرىنىڭ جوعارعى باس قولباسشىسى تاۋەلسىزدىك سارايىنىڭ الدىنداعى الاڭدا قورعانىس ءمينيسترى نۇرلان ەرمەكباەۆتان راپورت قابىلدادى. مەملەكەت باسشىسىنىڭ الدىنان قازاقستان قارۋلى كۇشتەرىنىڭ اسكەرلەرى سالتاناتتى ساپ تۇزەپ ءوتتى.
سونىمەن, ەلىمىز جاڭا تاريحي ساتكە قادام باستى. ەندى مەملەكەت باسشىسى قاسىم-جومارت توقاەۆ ءوزىنىڭ سوزىندە حالىقتىڭ تابىسىن ارتتىرۋ جانە ءال-اۋقاتىن جاقسارتۋ, سىبايلاس جەمقورلىققا قارسى ءتيىمدى ءىس-قيمىلدار جاساۋ, سوت-قۇقىقتىق رەفورما, ادىلەتتى الەۋمەتتىك ساياسات, تۇرعىن ءۇي ماسەلەسىن شەشۋ, وڭىرلەردى دامىتۋ, تەپە-تەڭدىك جانە كوپۆەكتورلى سىرتقى ساياسات, سونداي-اق, جاستاردى قولداۋ باعىتتارىن ورىنداۋعا بەل شەشە كىرىسەدى.
سەرىك ابدىبەك,
ەركەجان ايتقازى,
سۆەتلانا عالىمجانقىزى,
«Egemen Qazaqstan»
