مەملەكەتتىك تۋ مەن پرەزيدەنت بايراعى, سونداي-اق, قازاقستان رەسپۋبليكاسىنىڭ كونستيتۋتسياسى تاۋەلسىزدىك سارايىنىڭ ۇلكەن زالىنا اكەلىنگەن سوڭ, جاڭادان سايلانعان قازاقستان رەسپۋبليكاسىنىڭ پرەزيدەنتى مەملەكەتتىك كۇزەت قىزمەتى باستىعىنىڭ راپورتىن قابىلداپ, ىشكە كىردى.
كونستيتۋتسيانىڭ 42-بابىنا سايكەس, قاسىم-جومارت توقاەۆ حالىققا انت بەردى.
– قازاقستان حالقىنا ادال قىزمەت ەتۋگە, قازاقستان رەسپۋبليكاسىنىڭ كونستيتۋتسياسى مەن زاڭدارىن قاتاڭ ساقتاۋعا, ازاماتتاردىڭ قۇقىقتارى مەن بوستاندىقتارىنا كەپىلدىك بەرۋگە, قازاقستان رەسپۋبليكاسى پرەزيدەنتىنىڭ وزىمە جۇكتەلگەن مارتەبەلى مىندەتىن ادال اتقارۋعا سالتاناتتى تۇردە انت ەتەمىن.
جاڭا سايلانعان قازاقستان پرەزيدەنتىنىڭ قىزمەتكە كىرىسۋ قۇرمەتىنە مەملەكەتتىك ءانۇران وينالىپ, زەڭبىرەكتەردەن 21 رەت وق اتىلدى, اقوردا رەزيدەنتسياسىنىڭ ۇستىندە قازاقستان رەسپۋبليكاسىنىڭ مەملەكەتتىك تۋى كوتەرىلدى.
ورتالىق سايلاۋ كوميسسياسىنىڭ توراعاسى بەرىك يماشەۆ قاسىم-جومارت توقاەۆقا قازاقستان رەسپۋبليكاسى پرەزيدەنتىنىڭ كۋالىگىن تاپسىردى.
مەملەكەت باسشىسى ۇلىقتاۋ راسىمىندە سويلەگەن سوزىندە زور سەنىم ارتقانى ءۇشىن قازاقستاندىقتاردىڭ بارىنە العىس ايتىپ, قازىرگى قازاق مەملەكەتتىلىگىنىڭ نەگىزىن قالاۋشى قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ ەرەكشە ءرولىن اتاپ ءوتتى.
– مەنىڭ ماقساتىم – قوعامنىڭ بىرلىگىن قامتاماسىز ەتۋ جانە ءاربىر ازاماتتىڭ قۇقىعىن قورعاۋ. قازاقستاننىڭ ۇلتتىق مۇددەسىن ارقاشان جانە بارلىق جەردە قورعايتىن بولامىن, – دەدى قاسىم-جومارت توقاەۆ.
قازاقستان پرەزيدەنتى ون نەگىزگى باعىتتى بەلگىلەپ بەردى جانە ولاردىڭ ءبارىن جۇزەگە اسىرۋعا دەرەۋ كىرىسۋ كەرەكتىگىن ايتتى. اتاپ ايتقاندا, حالىقتىڭ تابىسىن ارتتىرۋ جانە ءال-اۋقاتىن جاقسارتۋ, سىبايلاس-جەمقورلىققا قارسى ءتيىمدى ءىس-قيمىلدار جاساۋ, سوتتىق-قۇقىقتىق رەفورما, ادىلەتتى الەۋمەتتىك ساياسات, تۇرعىن ءۇي ماسەلەسىن شەشۋ, وڭىرلەردى دامىتۋ, تەپە-تەڭدىك جانە كوپۆەكتورلى سىرتقى ساياسات, سونداي-اق, جاستاردى قولداۋ.
سوڭىندا قازاقستان رەسپۋبليكاسىنىڭ پرەزيدەنتى – قر قارۋلى كۇشتەرىنىڭ جوعارعى باس قولباسشىسى تاۋەلسىزدىك سارايىنىڭ الدىنداعى الاڭدا قورعانىس ءمينيسترى نۇرلان ەرمەكباەۆتان راپورت قابىلدادى. مەملەكەت باسشىسىنىڭ الدىنان قر قارۋلى كۇشتەرىنىڭ اسكەر تۇرلەرى سالتاناتتى ساپ تۇزەپ ءوتتى.
ۇلىقتاۋ راسىمىنە تۇڭعىش پرەزيدەنت – ەلباسى نۇرسۇلتان نازارباەۆ, قازاقستان رەسپۋبليكاسىنىڭ پارلامەنتى دەپۋتاتتارى, ۇكىمەت مۇشەلەرى, جوعارعى سوت سۋديالارى, كونستيتۋتسيالىق كەڭەستىڭ مۇشەلەرى, پرەزيدەنت اكىمشىلىگى مەن پرەمەر-مينيستر كەڭسەسىنىڭ وكىلدەرى, ورتالىق مەملەكەتتىك باسقارۋ ورگاندارىنىڭ باسشىلارى, ورتالىق سايلاۋ كوميسسياسى مەن قازاقستان حالقى اسسامبلەياسىنىڭ مۇشەلەرى, ءدىني كونفەسسيا وكىلدەرى, وبلىستار مەن نۇر-سۇلتان, الماتى جانە شىمكەنت قالالارىنىڭ اكىمدەرى, قازاقستانداعى ديپلوماتيالىق وكىلدىكتەردىڭ باسشىلارى, پرەزيدەنتتىككە ۇمىتكەر بولعاندار, «Nur Otan» پارتياسىنىڭ باسشىلىعى, رەسپۋبليكالىق جانە ايماقتىق قوعامدىق شتابتاردىڭ مۇشەلەرى, قوعامدىق ۇيىمداردىڭ جانە بۇقارالىق اقپارات قۇرالدارىنىڭ وكىلدەرى, ىسكەر توپتار وكىلدەرى, كورنەكتى عالىمدار, مادەنيەت جانە ونەر قايراتكەرلەرى, جاستار ۇيىمدارىنىڭ كوشباسشىلارى قاتىستى. راسىمگە بارلىعى 2500 ادام قاتىستى.
