– اڭگىمەنى وبلىس ورتالىعىنداعى ەكى ۇلكەن كلينيكانىڭ بىرىكتىرىلۋ جايىنان باستاساڭىز؟ مۇنىڭ سەبەبى قانداي؟
– ءيا, قاراعاندى وبلىسىنىڭ اكىمى ەرلان قوشانوۆتىڭ قاۋلىسىنا ءسايكەس, «ح.ماقاجانوۆ اتىنداعى وبلىستىق تراۆماتولوگيا جانە ورتوپەديا ورتالىعى» كمك مەن «وبلىستىق مەديتسينالىق ورتالىق» كمك-ءنى بىرىكتىرۋ جۇمىستارى ءجۇرگىزىلدى. دەنساۋلىق ساقتاۋ مەكەمەلەرىن بىرىكتىرىپ, تۇتاس كوپ سالالى ستاتسيونارعا اينالدىرۋ الەمدىك ءتاجىريبەدە بار ءۇردىس. بۇل, البەتتە, حالىققا كورسەتىلەتىن مەديتسينالىق قىزمەتتىڭ ساپاسىن ارتتىرۋ ءۇشىن جانە مەيلىنشە ىڭعايلى ەتۋ, پاتسيەنتتى باعدارلاۋ ءۇشىن جاسالادى. باسقاشا ايتقاندا, پاتسيەنت مەديتسينالىق قىزمەتتىڭ بارلىق تۇرلەرىن, ءتۇرلى مامانداردىڭ كەڭەستەرىن ءبىر عانا ەمدەۋ مەكەمەسىنەن الا الادى. زاماناۋي مەديتسيناعا جاڭا عيمارات قاجەت. ءبىزدىڭ قازىرگى عيماراتتار وتكەن عاسىردىڭ 1940-1960 جىلدارى سالىنعان, ەشقانداي تالاپتارعا جاۋاپ بەرە المايدى. ولاردى قانشا جاماپ-جاسقاپ, كۇردەلى جوندەۋ جاساعانمەن, قازىرگى قاجەتتىلىكتەرگە يكەمدەۋ مۇمكىن ەمەس. ءتىپتى 90-جىلدارى سالىنعان اۋرۋحانالاردىڭ ءوزى مەديتسينا سالاسىنىڭ بۇگىنگى تالاپتارىنا لايىق دەپ ايتۋ قيىن. ەندى ءبىز ەكى كلينيكانى ءبىر جاڭا كەشەندى عيماراتتا بىرىكتىرىپ, ايتالىق, ماسكەۋدەگى سكليفوسوۆسكي اتىنداعى ينستيتۋت ءتارىزدى كەز كەلگەن ناۋقاستى قابىلداپ, ەمدەي الاتىن ۇلكەن ورتالىق قۇرۋعا كىرىسىپ جاتىرمىز. امبەباپ ورتالىقتىڭ الەۋەتى دە مىقتى بولادى. كەلەسى جىلى جاڭا ورتالىق عيماراتىنىڭ جوبالىق-سمەتالىق قۇجاتتاماسىن جاساپ, 2020 جىلى قالانىڭ وڭتۇستىك-شىعىس تۇرعىن اۋدانىنداعى وبلىستىق مەديتسينالىق ورتالىقتىڭ اۋماعىنان قۇرىلىسىن باستاۋ جوسپارلانعان. ەكى مەكەمەنى بىرىكتىرۋ اكىمشىلىك-باسقارۋ شىعىندارىن دا ازايتارى ءسوزسىز. وسىلايشا ۇنەمدەلگەن قاراجات جاس مامانداردىڭ ەڭبەكاقىسىن كوتەرۋگە جۇمسالادى. ياعني, مەديتسينالىق قىزمەت كورسەتۋمەن قاتار قارجى-شارۋاشىلىق قىزمەتى دە وڭتايلانا تۇسپەك.
– ءبىز بىلەتىن حافيز ماقاجانوۆ اتىنداعى اۋرۋحانانىڭ اتاعى الىسقا كەتكەن. ايگىلى كلينيكانىڭ وسى اتاۋمەن بۇگىنگە دەيىن اتقارىپ كەلگەن قىزمەتىنە توقتالا كەتسەڭىز.
– حافيز ماقاجانوۆ اتىنداعى وبلىستىق تراۆماتولوگيا جانە ورتوپەديا ورتالىعى حالىققا قالتقىسىز قىزمەت كورسەتىپ, قازىرگى ۋاقىتتا دا يگى جەتىستىكتەرىمەن تانىمال. ورتالىق تراۆماتولوگيا مەن ورتوپەديا سالالارى بويىنشا ەرەسەكتەرگە دە, بالالارعا دا دياگنوستيكا جاساپ, ەمدەيتىن بىرەگەي مەديتسينالىق مەكەمە. كلينيكادا 14 وتا زالى جۇمىس ىستەيدى. سىرقاتتارعا ارنالعان 248 ورىن بار. تاۋلىك بويى جۇمىس ىستەيتىن ستاتسيونار ءبىر جىل ىشىندە 9 مىڭنان استام ادامعا جوعارى دەڭگەيدە مامانداندىرىلعان مەديتسينالىق جاردەم كورسەتەدى. كۇندىز-ءتۇنى جۇمىس ىستەيتىن جاراقات بەكەتى جىل ىشىندە ورتا ەسەپپەن 18 مىڭداي پاتسيەنت قابىلدايدى.
قازىرگى كلينيكا زاماناۋي تەحنولوگيالارمەن تولىق جابدىقتالعان, حالىققا كورسەتىلەتىن مەديتسينالىق قىزمەتتىڭ دەڭگەيى اسا جوعارى. ايتا كەتۋ كەرەك, قاراعاندى وبلىسىندا ەگدە جاستاعى ادامدارعا جوعارى مامانداندىرىلعان مەديتسينالىق كومەك كورسەتۋدى ورتالىقتاندىرۋ باعدارلاماسى قولعا الىنعان. ءبىزدىڭ كلينيكاعا جەتكىزىلگەن ەگدە جانداردىڭ جامباس بۋىنىن ەندوپروتەزدەۋ, بۇعاتتايتىن ينتومەدۋليارلىق وستەوسينتەزدەۋ وتالارى شۇعىل تۇردە جاسالادى.
كلينيكا قۇرامىندا, سونىمەن قاتار كۇندىزگى ستاتسيونار جۇمىس ءىستەيءدى. مۇندا دارىگەردىڭ تاۋلىك بويى قاداعالاۋىن قاجەت ەتپەيتىن, الايدا, تاعايىندالعان ەم شارالارىن ۇيدە جاساتا المايتىن پاتسيەنتتەر ەمدەلەدى. ولار اۋرۋحاناعا كۇندىزگى ۋاقىتتا كەلىپ, قاجەتتى ەمىن العان سوڭ ۇيلەرىنە قايتىپ وتىرادى.
مامانداندىرىلعان, جوعارى تەحنولوگيالى مەديتسينالىق كومەكتىڭ قولجەتىمدىلىگىن ارتتىرا ءتۇسۋ ماقساتىندا 2016 جىلدىڭ كوكتەمىندە تەمىرتاۋ قالاسىنىڭ ورتالىق اۋرۋحاناسىنان ءبىزدىڭ ورتالىق تراۆماتولوگيا ءوز بولىمشەسىن اشتى. ال بيىلعى ناۋرىز ايىندا وسى بولىمشەنىڭ بازاسىندا نەيروحيرۋرگيالىق كومەككە باسىمدىق بەرىلگەن پوليتراۆما ءبولىمشەسى جۇمىس ىستەي باستادى.
قاراعاندى وبلىسىندا قازىرگى ۋاقىتتا جاراقاتتانۋ, سۋيتسيد جانە ۋلانۋ كەزدەرىندە مەديتسينالىق كومەك كورسەتۋدىڭ بىرىكتىرىلگەن ۇلگىسىن ەنگىزۋ بويىنشا جول كارتاسى جۇزەگە اسىرىلۋدا. وسى باعدارلامانىڭ ۇيلەستىرۋشىسى ءبىزدىڭ ح.ماقاجانوۆ اتىنداعى كلينيكا بولىپ وتىر. وبلىستا تراۆماتولوگيالىق كومەك كورسەتىلۋىنىڭ بارىسىنا باقىلاۋ جاساپ, مونيتورينگ جۇرگىزۋ ءۇشىن قاراعاندى وبلىستىق دەنساۋلىق ساقتاۋ باسقارماسىنىڭ باستاماسىمەن, وبلىستىق تراۆماتولوگيا جانە ورتوپەديا ورتالىعىنىڭ بازاسىندا 2017 جىلدىڭ 1 قىركۇيەگىنەن باستاپ احۋالدىق ورتالىق جۇمىس ىستەي باستادى. ءبىزدىڭ كلينيكا ءوڭىر حالقىنا تراۆماتولوگيالىق جانە ورتوپەديالىق كومەك كورسەتۋ بويىنشا مونوپوليست بولىپ تابىلادى. اۋرۋحانا جەرگىلىكتى حالىققا عانا ەمەس, ەلىمىزدىڭ باسقا وڭىرلەرىنەن كەلەتىن جاندارعا دا قىزمەت كورسەتەدى.
– كلينيكاداعى جۇمىستار بارىسىنىڭ كەلەشەگى قانداي؟ ەكى ەمدەۋ مەكەمەسىنىڭ قوسىلۋى مەديتسينالىق قىزمەتتى دامىتۋعا قانشالىقتى ءتيىمدى؟
– كلينيكالاردى بىرىكتىرۋ ءوڭىرىمىزدە نەيروحيرۋرگيا, نەۆرولوگيا, وفتالمولوگيا جانە تاعى دا باسقا سالالاردى دامىتۋعا مۇمكىندىك بەرەدى. قازىرگى ۋاقىتتا جاس مامانداردى تارتۋدى كوزدەيتىن كادرلىق ساياساتتى جۇزەگە اسىرۋ جۇمىستارى جۇزەگە اسىرىلۋدا.
ءبىر عانا مىسال, بىلتىر ح.ماقاجانوۆ اتىنداعى كلينيكاعا بۇعان دەيىن ەلورداداعى جەتەكشى كلينيكادا ەڭبەك ەتكەن گينەكولوگ دارىگەر جۇمىسقا تۇردى. بۇگىندە ول گينەكولوگيالىق پاتولوگيا كەزىندە قولدانىلاتىن از ينۆازيۆتىك وپەراتسيا ادىستەرىن بەلسەندى تۇردە ەنگىزە باستادى.
كلينيكانى مەديتسينالىق قۇرال-جابدىقتارمەن قامتاماسىز ەتۋ جۇمىستارى دا تولاستاعان ەمەس. ەپيلەپسيا جانە پاركينسون اۋرۋلارىنا وتا جاساۋعا قاجەتتى جابدىقتاردى جەتكىزۋگە كەلىسىمشارت جاساسىپ قويدىق.
الىس-جاقىن شەتەلدەردەن شاقىرىلعان ماماندار وبلىستاعى ءدارىگەرلەر ءۇشىن پاتسيەنتتەردى تاسىمالداۋ, ءبىر مەزەتتە كوپ ادامعا مەديتسينالىق جاردەم كورسەتۋ, قابىلداۋ ءبولىمىنىڭ جۇمىسىن «ترياج» حالىقارالىق ستاندارتىنا سايكەس ۇيىمداستىرۋ جولدارى بويىنشا شەبەرلىك دارىستەرىن وتكىزەدى. سونىمەن قاتار كلينيكانىڭ قۇرىلىمدىق بولىمشەلەرىنىڭ باسشىلارى ءۇشىن ساپا مەنەدجمەنتى جۇيەسىن جاقسارتۋ باعىتىنداعى سەمينارلار ۇيىمداستىرىلادى. بۇل شارالاردىڭ ءبارى, البەتتە, حالىققا كورسەتىلەتىن مەديتسينالىق قىزمەتتەردىڭ ساپاسىن ارتتىرۋعا سەپتىگىن تيگىزەرى ءسوزسىز.
– زامان تالابىنا ساي كلينيكاداعى مامانداردىڭ بىلىكتىلىگىن ارتتىرۋعا كوڭىل ءبولىنىپ وتىراتىن بولار؟
– ارينە. قىزمەتكەرلەردىڭ كاسىبي دەڭگەيىن جوعارىلاتىپ وتىرۋ – كلينيكانىڭ نەگىزگى ماقساتتارىنىڭ ءبىرى. بىزدەگى ءار ماماننىڭ ءوز ەلىمىزدىڭ عانا ەمەس, شەت مەملەكەتتەردىڭ دە ۇزدىك كلينيكالارىندا بىلىكتىلىگىن ارتتىرۋ مۇمكىندىگى بار. قىزمەتكەرلەرىمىز حالىقارالىق كونفەرەنتسيالارعا بەلسەندى اتسالىسادى. كلينيكامىزدىڭ وزىندە دە سەمينار, ترەنينگ, شەبەرلىك دارىستەرىن ۇيىمداستىرىپ, ەلىمىز بەن شەت مەملەكەتتەردەن ماڭدايالدى مامانداردى شاقىرامىز. مۇنىڭ ءبارى عىلىمي-تاجىريبەلىك تۇرعىدان وسۋىنە وڭ ىقپالىن تيگىزىپ كەلەدى. كلينيكا قاراعاندى مەملەكەتتىك مەديتسينا ۋنيۆەرسيتەتىمەن تىعىز قارىم-قاتىناس ورناتقان. اۋرۋحانا بازاسىندا جالپى حيرۋرگيا جانە تراۆماتولوگيا كافەدرالارى جۇمىس ىستەيدى. ولاردا ستۋدەنتتەر, ينتەرندەر مەن رەزيدەنتتەر ءدارىس الادى. قازىرگى ۋاقىتتا, ۇشجاقتى كەلىسىم نەگىزىندە, تراۆماتولوگيا-ورتوپەديا, رەانيماتولوگيا-انەستەزيولوگيا, ساۋلەلى دياگنوستيكا, حيرۋرگيا ماماندىقتارى بويىنشا رەزيدەنتۋرادا 16 ادام وقىپ ءجۇر. ورتالىق, سونىمەن قاتار قاراعاندى وبلىستىق جوعارى مەدبيكەلىك كوللەدجىنىڭ بازاسى بولعاندىقتان, ورتاڭعى مەديتسينالىق قىزمەتكەرلەردى, اسىرەسە تراۆماتولوگيالىق بەيىمدەگى مەدبيكەلەردى دايارلاۋ ىسىنە ۇلەس قوسىپ وتىر.
قاراعاندى وبلىسى بويىنشا تراۆماتولوگيا ماسەلەلەرىندە ادىستەمەلىك ورتالىق بولىپ تابىلاتىن ءبىزدىڭ كلينيكا وبلىستىڭ باسقا كلينيكالارىنا جاڭا تەحنولوگيالار ەنگىزۋ شارالارىمەن دە شۇعىلدانادى. بۇل ىسكە جۇمىلدىرىلعان جوعارى بىلىكتى مامانداردىڭ ەكەۋى مەديتسينا عىلىمدارىنىڭ دوكتورى بولسا, سەگىزى – مەديتسينا عىلىمدارىنىڭ كانديداتى.
– مەديتسينا سالاسىنداعى باسشى, بىلىكتى مامان رەتىندە مەملەكەتتىك تسيفرلاندىرۋ باعدارلاماسىنا دەگەن كوزقاراسىڭىز قانداي؟
– قاراعاندى وبلىسىنىڭ دەنساۋلىق ساقتاۋ باسقارماسى, «تسيفرلى قازاقستان» مەملەكەتتىك باعدارلاماسىنىڭ شەڭبەرىندە, ەلىمىزدە العاش بولىپ ەمدەۋ مەكەمەلەرىندە كەشەندى مەديتسينالىق اقپاراتتىق جۇيەنى قولعا الدى.
وبلىستاعى ستاتسيونارلار اۋرۋلار تاريحى مەن امبۋلاتوريالىق كارتالاردى ەلەكتروندى فورماتتا تولتىرا باستادى. وسى باعدارلاما ارقىلى مەديتسينالىق قىزمەتكەرلەر قاعازباستىلىقتان قۇتىلا باستادى. بۇل قىرۋار ۋاقىتتى ۇنەمدەيدى. پاتسيەنتتەردىڭ اۋرۋ تاريحىن جۇرگىزۋ كوپ جەڭىلدەپ, ولاردى كەرەك كەزىندە جەدەل تاۋىپ الۋعا بولادى. دارىگەرلەر پاتسيەنت تۋرالى مالىمەتتى ەلەكتروندى دەنساۋلىق پاسپورتى ارقىلى بىلە الادى. پاتسيەنتتەر دە دارىگەردىڭ قابىلداۋىنا ەلەكتروندى سەرۆيس ارقىلى ءوز بەتىنشە جازىلىپ, الدىن الا بەلگىلەنگەن ۋاقىتتا كەلىپ, كەزەكسىز كىرە الادى.
تسيفرلاندىرۋ باعدارلاماسىنىڭ اياسىندا «دامۋمەد» موبيلدىك قوسىمشاسى, ياعني, پاتسيەنتتىڭ جەكە كابينەتى جاسالعان. سول ارقىلى قابىلداۋعا الدىن الا جازىلۋعا, ءدارىگەردى ۇيگە شاقىرتۋعا, لابوراتوريالىق زەرتتەۋ ناتيجەلەرىن, رەتسەپتەر, ەڭبەككە جارامسىزدىق پاراعىن الۋعا بولادى. اقپاراتتىق جۇيە مەديتسينالىق كومەك ساپاسىن ارتتىرىپ, مەديتسينالىق قىزمەتكەرلەردىڭ جۇمىس تيىمدىلىگىن ارتتىرۋعا ەداۋىر ىقپال ەتتى.
– حافيز ماقاجانوۆ اتىنداعى ورتالىقتىڭ ارنايى سايتىندا وسى كلينيكادا ەمدەلگەن جانداردىڭ ريزاشىلىعىن ءبىلدىرىپ جازعان حاتتارى مىڭداپ سانالادى ەكەن. حالىقتىڭ ىقىلاسى مەن باتاسىنان ۇلكەن باعا بولماس. ءاردايىم وسى بيىكتەن تۇسپەي, جۇمىستارىڭىز جەمىستى بولا بەرسىن!
اڭگىمەلەسكەن قايرات ءابىلدا,
«Egemen Qazaqstan»
قاراعاندى
