باس باپكەر ميحال بيلەكتىڭ باستاپقى قۇرامىنا قاراپ, الدىن الا بولجام ايتۋ دا قيىن ەدى. اۋەلى اسحات تاعىبەرگەن, اباي ايىمبەتوۆكە مۇمكىندىك بەرىلدى. العاشقى مينۋتتان باستاپ الاڭ يەلەرى تىزگىندى بەرىك قولعا الدى. 11-مينۋتتا يان ۆوروگوۆسكي قاپتالمەن شابۋىلداپ, اتقان وقتاي سوققى جاسادى. بۇل دوپ قاقپاشىنىڭ قولىنا تىكەلەي بارىپ ءتۇستى. ونىڭ ءىزىن الا باۋىرجان يسلامحاننىڭ باعىتتاعان سوققىسى بۇرىشتاما دوبىن سوعۋعا سەبەپكەر بولدى. الايدا قۋاتتى ءۇش سوققى دا دارىماي, ەليا بەنەدەتتيني كومانداسىن قورعاپ قالدى.
تايم ورتاسىندا الاڭ يەلەرىنىڭ شابۋىلى ءباسەڭسىگەنىمەن, بىرقاتار ءمۇمكىندىك بولدى. تايمنىڭ سوڭعى مينۋتىندا عانا يسلامبەك قۋاتتىڭ اشقان ەسەبىمەن كوماندالار ۇزىلىسكە تارادى. ەكىنشى تايم قوناقتاردىڭ شابۋىلىمەن باستالعانىمەن, ودان ەشتەڭە شىقپادى. قازاقستان ويىنشىلارى عافۋرجان سۇيىمباەۆ پەن اسحات تاعىبەرگەننىڭ ءاۋ باستاعى تاماشا سوققىلارى ناتيجە بەرمەگەنىمەن, دميتري شومكونىڭ ماكسيم فەدينگە اسىرعان پاسىنان باستاپ وتانداستارىمىز قارسىلاس كوماندا قاقپاشىسىن بىرنەشە مارتە قاپىدا قالدىردى. باسىمدىقتى تولىعىمەن قولعا العان قازاقستاندىقتار ويىن سوڭىندا ب.يسلامحاننىڭ تاماشا سوققىسىمەن كەزدەسۋدى تۇيىندەدى.
اتالعان جەڭىستەن كەيىن قازاقستان 6 ۇپاي ەنشىلەپ, توپتا ءۇشىنشى ورىنعا كوتەرىلدى. العاشقى ورىندى بەلگيا (9 ۇپاي), ەكىنشى ورىندى رەسەي (6 ۇپاي) ەنشىلەدى. شوتلانديانىڭ دا قورجىنىندا 6 ۇپاي بار. ولار ءتورتىنشى ورىنعا تۇراقتاسا, كيپر بەسىنشى ساتىعا تابان تىرەپ, ءتىزىم سوڭىندا سان-مارينو كومانداسى قالدى.
ەۋرو-2020 ىرىكتەۋ ءتۋرنيرى. 4-تۋر
ءى توپ
قازاقستان – سان-مارينو – 4:0
گولدار: قۋات – 45 (1:0), فەدين – 62 (2:0),
سۇيىمباەۆ – 66 (3:0), يسلامحان – 79 (4:0).
