– ۋاقىت جىلجىعان سايىن مەنتالدى اريفمەتيكانىڭ قولدانىس اياسى كەڭەيىپ كەلەدى. بۇرىن ونىمەن تەك ازيالىق ەلدەردە شۇعىلدانىپ كەلسە, قازىر امەريكا قۇرلىعىندا, ەۋروپانىڭ ءبىراز مەملەكەتتەرىندە تانىمالدىلىعى ارتۋ ۇستىندە. سانكت-پەتەربۋرگتە ويشا ساناۋدان جارىس ءوتىپ, مەنتالدى اريفمەتيكامەن جاقىنىراق تانىسۋدىڭ ءساتى ءتۇستى. جاسىراتىنى جوق, جاقسى اسەر الدىم. ويتكەنى كىشكەنتاي بالدىرعاندار ەش الاڭسىز تۇسىنىكسىز قيمىلداردى ورىنداپ جاتتى. وسىدان باستاپ قىزىعۋشىلىعىم ويانىپ, بۇل جۇيە جايلى زەرتتەي باستادىم. ماقالالار وقىپ, كاسىبي ساراپشىلاردىڭ پىكىرىنە قانىقتىم. سودان تۇيگەنىم, مەنتالدى اريفمەتيكا جالپى ورتا ءبىلىم بەرۋ جۇيەسىندە ءوز ورنىن تابارىنا كۇمانىم جوق. ونى مەكتەپ باعدارلاماسىنا ەنگىزگەن ارتىق ەتپەس دەپ ەسەپتەيمىن. سەبەبى اتالعان ەسەپتەۋ جۇيەسى بالانىڭ كوگنيتيۆتىك مۇمكىندىكتەرىن ەسەلەۋگە سەپتەسەدى. ونىڭ ىشىندە زەيىن, ەستە ساقتاۋ قابىلەتى مەن ەموتسيالىق سەزىم دامي تۇسەدى. نەگە دەسەڭىز, كۇردەلى ەسەپتى شەشكەن بالا ءوز بويىندا قۋاتتى كۇشتىڭ بار ەكەنىن سەزىنەدى. ياعني, جەكە تۇلعانىڭ قالىپتاسۋىنا ايتارلىقتاي ۇلەس تيگىزەدى, – دەيدى نەيروعىلىم جانە پسيحولينگۆيستيكا سالاسىنداعى رەسەيلىك عالىم تاتيانا چەرنيگوۆسكايا.
رەسەيلىك ساراپشى اقش-تاعى سيليكوندى القاپتا نەمەسە «سكولكوۆو» يننوۆاتسيالىق ورتالىعىنداعى جەتەكشى قىزمەتكەرلەردىڭ دەنى وسى مەنتالدى اريفمەتيكانىڭ نەگىزىنە قانىققان ماماندار ەكەنىن ايتادى. سول سەبەپتى جاڭا تەحنولوگيالار كادرلارىن ازىرلەۋدە مەنتالدى ساناۋدىڭ قاۋقارى مىقتى دەيدى. دوڭگەلەك ۇستەلدە ويشا ەسەپتەۋدەن مۇمكىندىگى شەكتەۋلى بالالار دا وزدەرىنىڭ كەم ەمەس ەكەندىكتەرىن كورسەتتى. ال ەۋرازيالىق زياتكەرلىك وليمپياداسىندا قازاقستان, رەسەي جانە وزبەكستاننان جينالعان مىڭنان اسا بالعىن كۇردەلى ماتەماتيكالىق ماتريتسانى نەبارى 6 مينۋتتا شەشىپ, الەمدىك رەكورد تىركەلدى.
جاقسىلىق مۇراتقالي,
«Egemen Qazaqstan»
