ورتالىق كوممۋنيكاتسيالار قىزمەتى الاڭىندا وتكەن ءباسپاسوز ءماسليحاتىندا «قوعامدىق پىكىر» ينستيتۋتىنىڭ كەڭەس ءتورايىمى, الەۋمەتتانۋ ماگيسترى اينۇر ءماجيتوۆا ءمالىم ەتكەنىندەي, ەلىمىز بويىنشا 325 سايلاۋ ۋچاسكەسىنىڭ شىعا بەرىسىندە ازاماتتار اراسىندا جاسىرىن ساۋالداما جۇرگىزىلگەن. ساۋالداما جۇرگىزۋ بارىسىندا وبلىس ورتالىقتارى مەن نۇر-سۇلتان, الماتى جانە شىمكەنت قالالارى قامتىلعان. سونداي-اق شاعىن قالالار مەن اۋىلدىق وكرۋگتەردەگى سايلاۋشىلارعا دا سۇراۋ سالىنعان. سايلاۋشىلار اراسىندا ساۋالداما جۇرگىزۋ حالىقارالىق قاعيدا بويىنشا جۇزەگە اسىرىلىپ, 13 200 سايلاۋشىعا سۇراۋ سالىنعان. ىرىكتەمە قاتەلىگى شامامەن 3%-دى قۇراعان.
سونىمەن «قوعامدىق پىكىر» ينستيتۋتى جۇرگىزگەن Exit-poll قورىتىندىسى مىناداي:
«قازاقستان كوممۋنيستىك حالىق پارتياسى» قوعامدىق ءبىرلەستىگى ۇسىنعان جامبىل احمەتبەكوۆ – 3,86%; «اق جول» قازاقستاننىڭ دەموكراتيالىق پارتياسى» قوعامدىق بىرلەستىگى ۇسىنعان دانيا ەسپاەۆا – 5,32%; «ۇلت تاعدىرى» قوزعالىسى ۇسىنعان ۇمىتكەر ءامىرجان قوسانوۆ – 15,39%; «اۋىل» حالىقتىق-دەموكراتيالىق پاتريوتتىق پارتياسى» قوعامدىق ءبىرلەستىگى ۇسىنعان تولەۋتاي راحىمبەكوۆ – 3,03%; قازاقستان رەسپۋبليكاسىنىڭ كاسىپوداقتار فەدەراتسياسى ۇسىنعان امانگەلدى تاسپيحوۆ – 1,41%; «Nur Otan پارتياسى» قوعامدىق بىرلەستىگى ۇسىنعان قاسىم-جومارت توقاەۆ – 70,13%; « ۇلى دالا قىراندارى» رەسپۋبليكالىق قوزعالىسى ۇسىنعان سادىبەك تۇگەل 0,86% داۋىس جيناعان.
ال «جاستار» عىلىمي-زەرتتەۋ ورتالىعى جۇرگىزگەن ەxit-poll ءناتيجەسى بويىنشا «Nur Otan پارتياسى» قوعامدىق بىرلەستىگى ۇسىنعان قاسىم-جومارت توقاەۆقا ساۋالداماعا قاتىسقان سايلاۋشىلاردىڭ 69,94 پايىزى داۋىس بەرگەن. بۇل جونىندە ورتالىق ديرەكتورى تالعات قاليەۆ حابارلادى.
سونىمەن «جاستار» ورتالىعى جۇرگىزگەن ساۋالداما قورىتىندىسى بويىنشا قازاقستان پرەزيدەنتتىگىنەن ۇمىتكەرلەردىڭ كورسەتكىشتەرى مىناداي: جامبىل احمەتبەكوۆ – 3,06 پايىز, دانيا ەسپاەۆا – 4,78 پايىز, ءامىرجان قوسانوۆ – 14,96 پايىز, تولەۋتاي راحىمبەكوۆ – 2,71 پايىز, امانكەلدى تاسپيحوۆ – 2,63 پايىز, قاسىم-جومارت توقاەۆ – 69,94 پايىز, سادىبەك تۇگەل – 1,92 پايىز.
