كىپ-كىشكەنتاي بالالاردىڭ, ءتىپتى كەيبىرىنىڭ دۇنيە ەسىگىن اشپاي جاتىپ تا اۋىر دەرتكە شالدىعىپ, باسىنا تۇسكەن تاعدىر سىناعىن ۇلكەندەرشە مويىماي كوتەرىپ كەلە جاتقان مىقتىلىعىن ەرلىككە بالاماسقا امالىڭ جوق. ۇلى فيلوسوفتاردىڭ ءبىرى بەرتولد برەحت تە «ونەردىڭ بارلىق ءتۇرى ەڭ ۇلى ونەرگە – جەر بەتىندە ءومىر ءسۇرۋ ونەرىنە قىزمەت ەتەدى» دەپ بەكەر ايتپاسا كەرەك. بىرنەشە رەت حيمياتەراپيادان ءوتىپ, اۋىر ۋكولدار مەن تابلەتكالاردان جۇرەگى ابدەن شايلىقسا دا, ءومىردىڭ ءبىر كۇندىك جارىق ساۋلەسى ءۇشىن شىدامدىلىق تانىتىپ, قابىلداۋعا ءتيىس ەكەنىن تيتتەي زەردەسىمەن تۇيسىنەتىن بالدىرعانداردىڭ ءار كۇنى ءۇمىت پەن سەنىمگە, كۇدىك پەن كۇرەسكە تولى.
م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ساحناسىندا قويىلعان قازاقستاندىق سازگەر يۋليا لەبەدەۆانىڭ «مۋزىكانىڭ ارعى جاعىندا» دەپ اتالاتىن مۋزىكالىق ەرتەگى سپەكتاكلىنىڭ باستى ەرەكشەلىگى – رولدەردە جاس اكتەرلەر وينايدى. بۇل بالالاردىڭ ارقايسىسى دەرلىك ونكولوگيا دەرتىنە شالدىعىپ, ۇزاق ءارى اۋىر كۇرەس جولىن ءجۇرىپ وتكەن. كەيبىر بالالاردىڭ ءالى ەمدەلىپ جۇرگەنىن ەسكەرسەك, بۇل جوبانىڭ قانشالىقتى قىمبات ءارى قاجەت ەكەنىن باعامداۋعا بولادى.
دراما تەاترىنىڭ ساحناسىندا وتكەن سپەكتاكلدەگى باستى رولدەردىڭ ءبىرىن بارشاعا ەسىمى تانىمال جاس ورىنداۋشى دانەليا تولەشوۆا وينادى. ول قايىرىمدىلىق جوباسىنا قاتىسا وتىرىپ, كۇردەلى اۋرۋلارمەن كۇرەسۋگە ءماجبۇر بولعان بالالارعا قولداۋ كورسەتكىسى كەلەتىنىن ايتتى.
«شىعارماشىلىق قاناتىمەن» جوباسىنىڭ اۆتورى, «عىلىمي-مەديتسينالىق قوعام» قوعامدىق بىرلەستىگىنىڭ توراعاسى سۋريا ەسەنتاەۆا:
– ءبىزدىڭ بىرلەستىكتى 2013 جىلدىڭ سوڭىندا تاجىريبەلى ءدارىگەرلەر قۇردى. ءبىلىم بەرۋ جانە عىلىمي-زەرتتەۋ جوبالارىمەن قاتار, ءبىز الەۋمەتتىك جوبالارمەن دە اينالىسامىز. وسى جۇمىستى اتقارا ءجۇرىپ, ءبىز ونكولوگيالىق اۋرۋلارمەن كۇرەسۋ اسا كۇشتى رۋحتى جانە كۇش-قۋاتتى قاجەت ەتەتىنىن, ال وسى اۋرۋعا تاپ بولعان وتباسى مۇشەلەرى پسيحولوگيالىق جانە مورالدىق قولداۋعا ءزارۋ ەكەنىن تۇسىندىك,– دەيدى.
2017 جىلى «عىلىمي-مەديتسينالىق قوعام» بىرلەستىگى «شىعارماشىلىق قاناتىمەن» اتتى جوبانى ىسكە قوسقالى بەرى عىلىمي پەدياتريا جانە بالالار حيرۋرگياسى ورتالىعىنىڭ ناۋقاستارىن اكتەرلىك شەبەرلىككە, دەكوراتسيالار مەن كوستيۋمدەر جاساۋعا, جالپى تەاتر ونەرىنە باۋلىپ كەلەدى. جوبانىڭ ءبىرىنشى جىلىنىڭ قورىتىندىسى بويىنشا م.اۋەزوۆ اتىنداعى قازاق مەملەكەتتىك دراما تەاترىنىڭ ساحناسىندا «ءمولدىر قۇدىق» اتتى مۋزىكالىق ەرتەگى قويىلعان ەدى. ونكولوگيالىق اۋرۋعا شالدىققان بالالار اكتەر رەتىندە ءرول سومداپ, بيلەتتەردى ساتۋدان تۇسكەن بۇكىل قارجى ولاردىڭ ەمىن جالعاستىرۋعا باعىتتالدى. 2018 جىلى استاناداعى ەلشىلەر جۇبايلارى ديپلوماتيالىق كلۋبىنىڭ «ASA» قايىرىمدىلىق كوميتەتىنىڭ قولداۋىمەن الماتى قالاسىنداعى وقۋشىلار سارايىندا «باتىر ۆاكتسينا» اتتى سپەكتاكل قويىلىپ, وندا تاعى دا كىشكەنتاي ناۋقاس بالالار ءرولدەردە ويناعان بولاتىن. ەكى سپەكتاكل دە ناۋقاستاردىڭ تاراپىنان جىلى قابىلدانىپ, وعان قاتىسۋ بالالاردىڭ جالپى حال-احۋالىنا وڭىنان اسەر ەتىپ, ەمدەلۋ ناتيجەسىنىڭ جاقسارا تۇسكەنى بايقالعان-دى.
بالالار ونكولوگياسىندا باستالعان وسى يگى باستاما, ەندى مىنە, يۋليا لەبەدەۆا جازعان «مۋزىكانىڭ ارعى جاعىندا» دەپ اتالاتىن مۋزىكالىق ەرتەگىسىمەن جالعاسىن تاۋىپ وتىر. بۇعان مادەنيەت جانە سپورت مينيسترلىگى دە قولداۋ كورسەتىپ, سپەكتاكلدىڭ تۇساۋكەسەرى ءۇشىن م.اۋەزوۆ اتىنداعى اكادەميالىق دراما تەاترىنىڭ ساحناسىن, ال رەپەتيتسيا جاساۋ ءۇشىن ع.ءمۇسىرەپوۆ اتىنداعى بالالار جانە جاسوسپىرىمدەر تەاترىنىڭ ساحناسىن ۇسىندى. سونىمەن قاتار اقپارات جانە قوعامدىق دامۋ مينيسترلىگى مەن الماتى قالاسى اكىمدىگى دە مۋزىكالىق ەرتەگىنىڭ تۇساۋكەسەرىنە ءوز قولداۋىن ءبىلدىردى.
جوبانىڭ كوركەمدىك جەتەكشىسى نۇريا قوجامۇراتوۆا: «ۇزاق ءارى كۇردەلى ەمنەن وتكەن بالالاردى وڭالتۋ جانە الەۋمەتتەندىرۋ بىرجولعى ءىس ەمەس, ونى تۇراقتى تۇردە جۇرگىزىپ تۇرۋ قاجەت. قازىرگى تاڭدا ءبىز بالالارعا اكتەرلىك شەبەرلىكتى ۇيرەتەتىن «شىعارماشىلىق قاناتىمەن» اتتى شاعىن ارت-تەراپيا ستۋدياسىن اشتىق. تەاتر – كوپقىرلى ونەر, وعان بەينەلەۋ ونەرى, مۋزىكا, مودەلدەۋ, اكتەرلىك شەبەرلىك, بي سىندى ونەر تۇرلەرى كىرەدى. كۇردەلى جانە سيرەك اۋرۋلارعا شالدىققان بالالارعا ارنالعان ارت-تەراپيالىق جوبامىزدى تولىعىمەن جۇزەگە اسىرۋ ءۇشىن ءاربىر بالا مەن ەرەسەككە (بالالاردىڭ اتا-انالارى جانە ونكولوگياعا شالدىققان ەرەسەك ناۋقاستارعا) وزدەرىنىڭ جۇرەگىنە جاقىن شىعارماشىلىق باعىتتى تاڭداۋعا مۇمكىندىك بەرەتىن ارت-تەراپيا ورتالىعىن بارلىق ايماقتا قۇرۋ قاجەت», دەيدى.
سونداي-اق تەاتردا ۇيىمداستىرىلعان بالالاردىڭ سۋرەت كورمەسىنىڭ دە ايتارى مول. قول ۇستاسىپ ك ۇلىمدەگەن اتا-اناسىن, شاتتىققا بولەنگەن باۋىرلارىن, ىنتىماقتى دوستارىن, ادەمى ءارى ەڭسەلى تۋعان ءۇيىن قىزىلدى-جاسىل اشىق تۇسپەن بەينەلەگەن بالالار ءومىردىڭ جارقىن, عاجاپ, قىمبات ەكەنىن بارىمىزدەن گورى جاقسىراق سەزەتىنىن بوياۋ تىلىمەن بارىنشا ۇعىندىرعان.
ونكولوگيانى جەڭگەن بالالار ساحنادا ءرول ويناۋ ارقىلى ءالى ەمدەلىپ جۇرگەن, مورالدىق قانا ەمەس, ماتەريالدىق كومەككە دە مۇقتاج بالالارعا قولۇشىن سوزىپ, ءۇمىت پەن ونەردىڭ اجالدى جەڭىپ شىعار كۇشى بارىنا سەندىرىپ وتىر. ال سەنىم – ەڭ كۇشتى قارۋ.
الماتى
