بيىلعى بايقاۋدى وتباسىلىق قۇندىلىقتار تۋرالى تەرەڭنەن تولعاعان سوزىمەن اشقان وبلىس اكىمى ەرمەك مارجىقپاەۆ ءار وتباسىنىڭ بىرلىگى تۇپتەپ كەلگەندە ەل بايلىعى ەكەنىنە ايرىقشا توقتالدى. ونەگە شاشقان بايقاۋدىڭ ۇلگى-عيبراتى تۋرالى دا سالماقتى ءسوز ساباقتادى. رياسىز لەبىزدەن سوڭ بايقاۋدا ءبىرىنشى ورىن العان وتباسىلارعا سىي-سياپات جاسادى.
شاڭىراقتاعى شاتتىق, سۇتتەي ۇيىعان ىنتىماق-بىرلىگىمەن, تاماشا ءتىرلىگىمەن تالايعا ۇلگى بولا الاتىن وتباسىلار از ەمەس. بايقاۋعا 29 وتباسىنان ءوتىنىم تۇسكەن ەكەن. ارنايى كوميسسيانىڭ ەلەگىنەن وتكەن 7 وتباسى وبلىستىق تۋرعا جولداما العان. بۇل ارادا جالعىز بالا سانى ەمەس, ەڭبەك ءداستۇرى, ءبىلىم-بىلىكتەرى, ەلدىڭ ىقىلاسى مەن قۇرمەتى, ونەرى دە ساراپقا سالىنادى. بۇل جولى بايقاۋدا ءباسى بىردەي بولعان ەكى وتباسىنا ءبىرىنشى ورىن بەرىلدى. ونەگەسى ورايلاس, ءتالىمى تەڭدەس. ماسەلەن, ءبىرىنشى ورىن الىپ, 250 مىڭ تەڭگە اقشالاي سىيلىققا يە بولعان اقكول اۋدانىنداعى ءاۋباكىروۆتەر وتباسى تۋرالى ءسال تاراتىپ ايتا كەتۋگە ابدەن بولادى. وسى وتباسىنىڭ ۇستازدىق ءوتىلى 215 جىلدى قۇرايدى ەكەن. اقان قايىرجان ۇلى مەن قۋانىش شوتانقىزى بەس بالاعا تاماشا تاربيە بەرىپ, 9 نەمەرەسىن قىزىقتاپ وتىرعان اتا مەن اجە. وتاعاسى 45 جىل بويى تابان اۋدارماستان ءبىلىم سالاسىندا قىزمەت ەتكەن. 30 جىل امانگەلدى اۋىلىنداعى مەكتەپتە ديرەكتور بولىپ قىزمەت اتقارىپتى. تۇڭعىشى بەيبىت جەكە كاسىپكەر, قۇرمەتى ادۆوكات, كەنجە ۇلى ناۋاننىڭ مۇعالىمدىك ءوتىلى – 21 جىل. قىزى نازگۇل وتىز جىلدان بەرى ورىس ءتىلى مەن ادەبيەتى پانىنەن ساباق بەرىپ كەلەدى. مەرۋەرتىنىڭ پەداگوگيكالىق ەڭبەك ءوتىلى 24 جىل, ستەپنوگور قالاسىنداعى №9 قازاق ورتا مەكتەبىنىڭ وقۋ ءىسىنىڭ مەڭگەرۋشىسى.
سونداي-اق ءبىرىنشى ورىنعا يە بولعان تسەلينوگراد اۋدانىندا تۇراتىن ىسقاقوۆتار وتباسى دا وزگەگە ونەگە بولا الاتىن قۇتتى شاڭىراق. 45 جىل بىرگە عۇمىر كەشكەن ىسقاقوۆتار وتباسىنان 8 بالا, 24 نەمەرە ءوربىپ وتىر. وتباسىنىڭ نەگىزگى تىرشىلىگى «ىسقاقوۆتار» شارۋا قوجالىعى. شارۋاشىلىق كارتوپ, كوكونىس ءوسىرۋمەن اينالىسادى. تۇڭعىش ۇلدارى ماراتبەك شارۋاشىلىق جەتەكشىسى بولسا, راشيت باس ينجەنەر, دارحان قىرمان مەڭگەرۋشىسى, نۇرسۇلتان ەكونوميست, ازامات اگرونوم, راقىمبەك مەحانيزاتور. قىزدارى دا قول قۋسىرىپ قاراپ وتىرعان جوق. ءمولدىر مەن گۇلزيرا ءبىرى مال دارىگەرى بولسا, ەكىنشىسى كوكونىس ءوسىرۋشى. ال نەمەرەلەرى اتاسى مەن اجەسىن ۇزدىك وقۋلارىمەن, سپورتتاعى جانە ونەردەگى تابىستارىمەن قۋانتۋدا. تالاپتى نەمەرەلەرى جاناتبەك مەكتەپتى التىن بەلگىمەن ءبىتىرىپ, اتا-اجە تىلەگىن اقتاسا, زاميرا ەسىمدى نەمەرەسى بي ونەرىنىڭ حاس شەبەرى.
اقمولا وبلىسىنىڭ قازاقستان حالقى اسسامبلەياسى جانىنداعى انالار كەڭەسىنىڭ ءتورايىمى زەرە قيىقوۆا ەكىنشى ورىنعا يە بولعان ستەپنوگور قالاسىندا تۇراتىن ورالباەۆتار وتباسىنا ديپلومدارىن تابىس ەتتى. بۇل وتباسى مەكتەپكە دەيىنگى تاربيە مەكەمەسىن اشىپ, مەملەكەتتىك-جەكەشەلىك ارىپتەستىگى ورايىندا ەلگە يگىلىگى ءتيىپ وتىرعان شاڭىراق. بەستوبە كەنتىندەگى وتباسى يەلىگىندەگى «اسىل» جانە «التىن» بالالار باقشاسىنا 150 جەتكىنشەك بارادى. ونىڭ 47-ءسى كوپ بالالى جانە الەۋمەتتىك جاعىنان از قامتاماسىز ەتىلگەن وتباسىلاردىڭ بالالارى. ولارعا تەگىن قىزمەت كورسەتىلەدى.
بايقاۋدا تسەلينوگراد اۋدانىندا تۇراتىن كەمەڭگەروۆتەر وتباسى ءۇشىنشى ورىنعا يە بولدى. ءسوز اراسىندا بۇل وتباسى الاشوردا قوزعالىسىنىڭ ىرگەتاسىن قالاۋشىلاردىڭ ءبىرى قوشكە كەمەڭگەروۆتىڭ ۇرپاقتارى ەكەنىن ايتا كەتكەن ءجون. ونەردى ومىرلەرىنە سەرىك ەتكەن وتباسى مۇشەلەرى اۋەلەتە ءان شىرقاپ, قۇيقىلجىتىپ كۇي تارتىپ, جينالعان جۇرتتىڭ كوڭىلىنەن شىقتى.
وزگە وتباسىلار دا سىيلىقتان قۇرالاقان قالعان جوق. ساندىقتاۋ اۋدانىنداعى مۋسحانوۆتار, ەرەيمەنتاۋ اۋدانىنداعى امانتاەۆتار, زەرەندى اۋدانىنداعى شتيرلەر وتباسىلارى ىنتالاندىرۋ سىيلىقتارىنا يە بولدى.
اقمولا وبلىسى
