قازاقستان پرەزيدەنتىنە قىسقا مەرزىمدە جىلدىق قۋاتى 300 مىڭ توننادان 500 مىڭ تونناعا دەيىن مينەرالدى تىڭايتقىش شىعاراتىن تەحنولوگيالىق جۇيەنىڭ جۇمىسى تۋرالى مالىمەت بەرىلدى. سونىمەن قاتار, ءوندىرىس ورنىندا جەرگىلىكتى شيكىزات پايدالانىلاتىنى, قاراتاۋ قالاسىنىڭ فوسفات شيكىزاتتارى وڭدەلەتىنى جونىندە باياندالدى.
– بۇل – حيميا ونەركاسىبىندە, سونىڭ ىشىندە سارى فوسفور وندىرۋگە ماماندانعان حالىقارالىق دەڭگەيدەگى جەتەكشى كاسىپورىن. حالىقارالىق نارىقتارعا ءوز تاۋارلارىڭىزبەن شىعۋعا وسى ارتىقشىلىقتارىڭىز سەپتىگىن تيگىزەدى. باسەكەلەستىككە قابىلەتتىلىكتى ودان ءارى ارتتىرۋ قاجەت, – دەدى قاسىم-جومارت توقاەۆ.
***
1951 جىلى سالىنعان بۇل كاسىپورىننىڭ نەگىزگى قىزمەتى – حيميا ونەركاسىبى. مىڭنان استام ادامدى جۇمىسپەن قامتىپ وتىرعان زاۋىتتا ورتاشا جالاقى مولشەرى – 148 مىڭ تەڭگەدەن اسادى. كاسىپورىننىڭ ونىمدەرى ەۋروپالىق وداق ەلدەرىنە, اقش, قىتاي, جاپونيا جانە بىرىككەن اراب امىرلىكتەرىنە ەكسپورتتالادى.
