– ومىرشەڭ جوبالار ارقىلى ءبىز وسكەلەڭ ۇرپاق جادىنا ۇلتتىق قۇندىلىقتاردى سىڭىرە وتىرىپ, الەمدىك دەڭگەيدە ونەر كورسەتۋگە قابىلەتتى جاستاردى تاربيەلەيمىز. ونەر ادامدارىنا, سونىڭ ىشىندە شىعارماشىل جاستارعا قولداۋ كورسەتۋ ماقساتىندا بۇگىنگى شارا ءوتىپ وتىرعان جاستار سارايى بوي كوتەردى. دەمەۋشىلەر قاراجاتىنا سالىنعان بۇل عيمارات سوڭعى ۇلگىدەگى دىبىس جانە جارىق قۇرالدارىمەن, وركەستر قازاندىعىمەن جابدىقتالعان. ەندى ءبىزدىڭ ونەرپازدارىمىز حالىقارالىق تالاپتارعا سايكەس جابدىقتالعان ساحنادا ونەر كورسەتەتىن بولادى. وتكەن جىلى وبلىستاعى مادەنيەت نىساندارىنىڭ جوندەۋ جۇمىستارىنا وبلىستىق جانە جەرگىلىكتى بيۋدجەتتەردەن 545 ميلليون تەڭگە جۇمسالدى. ال جالپى مادەنيەت وشاقتارىنىڭ ماتەريالدىق بازاسىن نىعايتۋ ءۇشىن 1,3 ميلليارد تەڭگە باعىتتالدى, بۇل بۇرناعى جىلدارمەن سالىستىرعاندا 3 ەسە كوپ, – دەدى وبلىس اكىمى ارحيمەد مۇحامبەتوۆ.
وسىعان سايكەس مادەنيەت ورىندارى «رۋحاني جاڭعىرۋ» باعدارلاماسى قويعان تاپسىرمالار ۇدەسىنەن شىعۋ ءۇشىن ىزدەنىسپەن جۇمىس ىستەيدى. جاقىندا نۇر-سۇلتان قالاسىندا وتكەن II رەسپۋبليكالىق «رۋحاني قازىنا» فورۋمىندا ليساكوۆ قالالىق تاريحي جانە جوعارى توبىل مادەنيەتى مۋزەيى قالالىق مۋزەيلەر اراسىندا ۇزدىك اتاندى.
جىل بويى جۇرگىزىلگەن جۇمىستاردى سارالاي كەلگەندە, ءاۋليەكول اۋدانىنىڭ مادەني وشاقتارى مەن شىعارماشىلىق ۇيىمدارى حححIII فەستيۆالدىڭ گران-پري جۇلدەسىن الدى. ءبىرىنشى ورىنعا رۋدنىي قالاسى مەن قوستاناي اۋدانى, ەكىنشى ورىنعا ارقالىق قالاسى مەن جىتىقارا اۋدانى, ءۇشىنشى ورىنعا فەدوروۆ جانە قارابالىق اۋداندارى لايىق دەپ تابىلدى.
– ءبىز اۋداندا كلۋبتار مەن كىتاپحانا جۇمىسىنا ەرەكشە كوڭىل بولەمىز. بۇل ورايدا اۋىل شارۋاشىلىعى سالاسىنداعى كاسىپكەرلەر – ءبىزدىڭ ارقا سۇيەرىمىز. مىسالى, موسكالەۆ اۋىلىنداعى كلۋبقا وسى اتتاس شارۋاشىلىقتىڭ باسشىسى زەينوللا جاڭبىرشينوۆ اعامىز بارلىق جاعدايدى جاسايدى, كومەك بەرەدى. وسى اۋىلداعى «اديەلتا» بي ءانسامبلى اۋداندىق بي بايقاۋىنان ءبىرىنشى ورىن الدى. وتكەن جىلى «ەڭ ۇزدىك كلۋب» وبلىستىق بايقاۋىندا قۇسمۇرىن پوسەلكەسىندەگى كلۋب ەكىنشى ورىندى العان ەدى. ەندى بايقاۋعا موسكالەۆتىكتەر قاتىسقىسى كەلىپ وتىر, – دەيدى اۋليەكول اۋداندىق مادەنيەت جانە تىلدەردى دامىتۋ ءبولىمىنىڭ باسشىسى جىبەك توقاەۆا.
– اۋىل بالالارى, جاستارى ءۇشىن كلۋب, كىتاپحانا ناعىز تاربيە وشاعى. وندا بالالارعا ارنالعان ءتۇرلى ۇيىرمەلەر جۇمىس ىستەيدى. كانىگى مۋزىكا, بي ماماندارى بار. مەنىڭ ءبىر بايقاعانىم, اۋىل بالالارى تەلەديدارعا, كومپيۋتەرگە تاڭىلماي كلۋبقا جۇگىرەدى. ۇيىرمەلەردە جان-جاقتى جۇمىستار جۇرەدى, قالانىڭ بالاسى, جاستارى شىققان دەڭگەيدەن اۋىلداعىلار دا قالىسپايدى, سوعان قۋانامىز, – دەيدى موسكالەۆ اۋىلىنىڭ تۇرعىنى كۇنسۇلۋ قۇدايبەرگەنوۆا.
وبلىستىق حححIII حالىق شىعارماشىلىعى فەستيۆالى ءوڭىردىڭ جىل تاۋلىگىندەگى مادەنيەت پەن ونەر ءورىسىن وسىلاي باعامداپ, باعالادى. ە.ءومىرزاقوۆ اتىنداعى وبلىستىق فيلارمونيانىڭ ءداستۇرلى ءانشىسى ماناپبەك قادىروۆ پەن وبلىستىق تاريحي جانە ولكەتانۋ مۋزەيىنىڭ عىلىمي قىزمەتكەرى گالينا ساتالكينا مادەنيەت جانە سپورت مينيسترلىگىنىڭ
«ءمادەنيەت سالاسىنىڭ ۇزدىگى» توسبەلگىسىمەن ماراپاتتالدى. سونداي-اق وبلىس اكىمى ارحيمەد مۇحامبەتوۆ سالاعا ەڭبەگى سىڭگەن قىزمەتكەرلەر مەن ونەرپازدارعا, ۇجىمدارعا مينيستردىڭ, وبلىس اكىمىنىڭ ماقتاۋ قاعازدارىن, سىيلىقتار تاپسىردى. مەرەكە ءان مەن كۇيگە بولەندى.
