كونكۋرس جىل سايىن ءۇش دەڭگەيدە (اۋداندىق, وبلىستىق جانە رەسپۋبليكالىق) وتەدى. بيىل بايقاۋدىڭ شارتى بويىنشا ءساۋىر ايىندا نۇر-سۇلتان قالاسى تۇرعىندارى اراسىندا وتىنىشتەر قابىلدانعان. ناتيجەسىندە 70-كە جۋىق وتباسى باق سىناۋعا نيەت ءبىلدىرىپ, ءتيىستى قۇجاتتارىن تاپسىردى.
– ولاردىڭ اراسىندا شىعارماشىلىق سالاسىنىڭ ماماندارى, اسكەري قىزمەتكەرلەر, ءدارىگەرلەر, مۇعالىمدەر, قۇرىلىسشىلار, كوپ بالالى وتباسىلار, سونداي-اق قوعامنىڭ وزگە دە ءتۇرلى سالالارىندا قىزمەت ەتىپ جۇرگەن تۇلعالار بولدى, – دەدى جەڭىمپازداردى قۇتتىقتاۋعا كەلگەن نۇر-سۇلتان قالاسى اكىمىنىڭ ورىنباسارى ەرلان قاناليموۆ.
مىنە, بۇل تالاپتارعا تۇگەل سايكەس كەلىپ, قاتارلاستارىنان وق بويى وزا شىققان سەيىتجان قويباقوۆتار اۋلەتى بيىل قالالىق كەزەڭنىڭ باس جۇلدەسىن يەلەندى. بۇل – ۇلى وتان سوعىسىنىڭ باتىرى مەن تىل ارداگەرى, باتىر انادان تاراعان اۋلەت. قازىر اۋلەتتىڭ وتاناسى باكيرا نىسانبايقىزى – 91 جاستا. قوساعىمەن 10 بالا تۋىپ, ءوسىرىپ, ولاردان 32 نەمەرە, 31 شوبەرە, 5 شوپشەك ءسۇيىپ وتىر. وعان قوسا بۇل وتباسىنان 3 عىلىم دوكتورى, 2 عىلىم كانديداتى, 2 زاڭ قىزمەتكەرى, 3 مەديتسينا مامانى شىققان. ال 7 ادامى اسكەري قىزمەت سالاسىندا ەڭبەك ەتۋدە. ولاردىڭ سول كۇنگى ساحناعا سىيعان وكىلدەرىنىڭ قۇشاقتارى گۇلگە تولىپ, سىي-قۇرمەتكە بولەندى.
ال بايقاۋدىڭ I ورنى ءدۇيسەنعازى قاسىم ۇلىنان تاراعان اۋلەتكە بەرىلدى. بۇل اقىندار اۋلەتىنىڭ ەڭ تانىمالى – ايتىسكەر سەرىكزات دۇيسەنعازى باستاعان توپ قىزىلدى-جاسىلدى بۇرمەلى كويلەك كيگەن قىزدارىمەن-اق اينالانى گۇلدەندىرىپ جىبەردى. ال تانىمال اقىن قۇتتىقتاۋ راسىمىنەن سوڭ قولىنا ميكروفون الىپ, ىشكى قۋانىشتى بۇلقىنىسىن اسەرلى شۋماققا اينالدىرىپ, توگىپ-توگىپ جىبەردى.
كونكۋرس قورىتىندىسى بويىنشا جۇلدەلى ەكىنشى ورىن ەكى وتباسىنا – ۇستازدىعىمەن ەڭبەگى سىڭگەن كوپ بالالى ەركىن داۋەشوۆ پەن رۋحاني تاربيە ناسيحاتشىسى ازامات ءمالجانباي اۋلەتىنە, ال ەكى ءۇشىنشى ورىن ەلوردالىق كوپ بالالى وتباسىلار ەرجان وسپانقۇلوۆتار مەن ءبايدىلدا قادىرباەۆتار اۋلەتىنە بۇيىردى.
بۇدان بولەك, «تالانتتى وتباسى», «الەۋمەتتىك بەلسەندى وتباسى» جانە «سپورتشى وتباسى» اتالىمدارىنىڭ جەڭىمپازدارى ماراپاتتالدى.
ۇلتتى ۇيىستىرىپ, شاڭىراقتارعا شاتتىق سىيلايتىن «مەرەيلى وتباسىنا» قاتىسۋعا نيەتتى جانە لايىقتىلار سانى جىل سايىن ارتىپ كەلە جاتقانى دا بايقالدى. مۇنىڭ ءوزى ەلباسى باستاماسىنىڭ ۇلت ۇدەسىنەن شىققاندىعىنىڭ كورىنىسى بولسا كەرەك.
ال «قازمەديا حولل» كينوكونتسەرت زالىندا وسى جانداردىڭ قۇرمەتىنە ەلىمىزدىڭ بەلگىلى ءانشىلەرى ونەر كورسەتتى.
