الدىمەن بۇل سۇراقتى وبلىستىق دەنە شىنىقتىرۋ جانە سپورت باسقارماسىنىڭ باسشىسى دميتري كارپوۆقا قويدىق. «ۇلتتىق سپورت ءتۇرلەرىن, ونىڭ ىشىندە قازاق كۇرەسى دە بار, دارىپتەۋ ءۇشىن ءبىز وبلىستىق دەڭگەيدەگى تۋرنيرلەردى, چەمپيوناتتار مەن بىرىنشىلىكتەردى ءجانە باسقالارىن وبلىستىڭ قالالارى مەن اۋداندارىندا وتكىزەمىز», دەگەن جاۋاپ الدىق ارقا سپورتىنىڭ باسشىسىنان. ءبىر قاراعاندا, دميتري كارپوۆتىڭ بۇل ءسوزىنىڭ جانى بار: ۇلتتىق سپورتتى جانداندىرىپ, ونىڭ كوكجيەگىن كەڭەيتۋ ءۇشىن قولداعى بار ءمۇمكىندىكتى بارىنشا ءتيىمدى پايدالانعان ءجون-اق. الايدا, وبلىس ورتالىعىنان 600 شاقىرىمنان اساتىن قاشىقتىقتا ورنالاسقان ۇلىتاۋعا اپارىپ جارىس وتكىزگەننەن ۇلتتىق سپورتتىڭ, ونىڭ ءىشىندە قازاق كۇرەسىنىڭ كوسەگەسى كوگەرە قويار ما ەكەن..؟
بۇل تۋراسىندا ايگىلى باپكەر, قازاق كۇرەسىنىڭ باستاۋىندا تۇرعان ماماننىڭ ءبىرى ديقانباي بيتكوزوۆ مىناداي پىكىر ايتتى.
اتالعان تۋرنير شالعايدا وتكەن سوڭ, رەسپۋبليكالىق جانە وبلىستىق باق-تىڭ باسىم كوپشىلىگىنىڭ نازارىنان تىس قالدى. ونىڭ ۇستىنە جارىس جارناماسىنىڭ جوققا ءتان بولعانى دا راس ەدى. ءبىر سوزبەن ايتقاندا, «سارىارقا بارىسى» سىندى ۇلتتىق سپورت جوباسىنىڭ اياسىن وسىنشا تارىلتىپ جانە ونى قازاق كۇرەسىن دارىپتەۋ دەگەن ۋاجبەن اقتاپ الۋعا تىرىسۋ – اقىلعا قونىڭقىرامايتىن-اق شارۋا. سونان كەيىن, ءار نارسەنىڭ پارقى سالىستىرعاندا بىلىنەدى عوي. ماسەلەن, قازاق كۇرەسىنە شىن جانى اشيتىن وڭىرلەردە ءدال وسىنداي تۋرنيرلەردە توپ جارعان جانە جۇلدەگەر بولعان بالۋاندارعا كەلگەندە, سىياقىدان تارىلعان ەمەس. ءتىپتى كەي وبلىستاردا جاۋىرىنى جەرگە تيمەگەن جامپوزدارعا تەمىر تۇلپار دا مىنىگىزىپ ءجۇر. مىنە, كۇرەستى سوزبەن ەمەس, ىسپەن دارىپتەۋ دەگەن وسى! ال «سارىارقا بارىسى» تۋرنيرىنە كەلسەك, ۇلىتاۋ اۋدانىنىڭ اكىمدىگى ابسوليۋتتى سالماقتا جەڭىسكە جەتكەن باس بالۋانعا 150 مىڭ تەڭگەگە ءجۇلدە تىگىپتى. مۇنىڭ وزىنە شۇكىر...
ۇلىتاۋداعى «سارىارقا بارىسى» تۋرنيرىنە كەلسەك, بۇل سايىستا وبلىستىڭ 185 بالۋانى باق سىنادى. فينالدىق بەلدەسۋدە نۇرا اۋدانىنىڭ وكىلى بەكزات احمەتبەكوۆ پەن قارقارالى قالاسىنان كەلگەن ەرسىن مۇحامەتجانوۆ ابسوليۋتتىك سالماقتاعى باس ءجۇلدەنى ساراپقا سالعان بولاتىن. بۇل سىندا نۇرالىق بالۋاننىڭ كۇشى مەن ايلاسى باسىم ءتۇستى. ەندى بۇل ەكى بالۋان 8 ماۋسىم كۇنى نۇر-سۇلتان قالاسىندا وتەتىن «قازاقستان بارىسى-2019» دوداسىندا قاراعاندى وبلىسىنىڭ نامىسىن قورعايتىن بولادى.
ال جالپىكوماندالىق ەسەپتە ءبىرىنشى ورىندى وساكاروۆ اۋدانىنىڭ بالۋاندارى يەمدەنسە, جۇلدەلى ەكىنشى ورىن بيىگىنەن قاراعاندى قالاسىنىڭ كومانداسى كورىندى. جاڭاارقا اۋدانىنىڭ بالۋاندارى قولا جۇلدەنى قاناعات ەتتى.
جوعارىداعى اڭگىمەگە قايىرا سوعاتىن بولساق, «سارىارقا بارىسى» ءتۋرنيرى ۇلت ۇياسى ۇلىتاۋدا وتە مە, قاسيەتتى قارقارالى جەرىندە ۇيىمداستىرىلا ما, بولماسا, قالىڭ جانكۇيەر قالاعانداي قاراعاندىعا تۋ تىگە مە, ماسەلە تەك وسىعان عانا تىرەلىپ قالمايتىن سياقتى. ماسەلەنىڭ ءمانىسى مىنادا دەگەن ويدامىز: اتام زاماننان كەلە جاتقان اسىل مۇرامىزعا وبلىستاعى اكىم-قارالار قامقورلىق تانىتسا ەكەن دەيسىڭ. باسقاسىن بىلاي قويعاندا, ەڭ بولماعاندا, جارىستىڭ اشىلۋ سالتاناتىنا بارىپ, ءبىر-ەكى اۋىز قۇتتىقتاۋ ايتقاندارىنىڭ ءوزى وڭ قاباق, جىلى سوزگە ءزارۋ قازاق كۇرەسىنە قاجەت بولىپ تۇر-اۋ...
