كەلىسسوز بارىسىندا مەملەكەت باسشىسى ەۋروپالىق كەڭەس توراعاسىنىڭ ساپارى قازاقستان مەن ەۋروپالىق وداق اراسىنداعى بايلانىستاردىڭ دامۋىنا تىڭ سەرپىن بەرەتىنىن ايتتى.
– ءسىزدىڭ بۇل ساپارىڭىزدىڭ ءمانى زور. ءبىزدىڭ ءوزارا ءتيىمدى ىنتىماقتاستىعىمىز تەك كەڭەيە بەرەتىنىنە سەنىمدىمىن. ەكى تاراپ تا كوزدەگەن ماقساتقا جەتۋگە مۇددەلى بولعاندىقتان, ءبىزدىڭ قارىم-قاتىناسىمىزدىڭ بولاشاعى جارقىن, – دەدى قاسىم-جومارت توقاەۆ.
دونالد تۋسك قازاقستانعا ساپارمەن كەلۋگە شاقىرعانى ءۇشىن مەملەكەت باسشىسىنا ريزاشىلىق ءبىلدىردى.
– قوناقجايلىق تانىتقاندارىڭىز ءۇشىن كوپ راحمەت. ءبىزدىڭ سىزدەرمەن ءتاجىريبەمىز بەن ءوزارا قارىم-قاتىناستارىمىزدىڭ تاريحى ورتاق. گەوگرافيالىق اراقاشىقتىقتىڭ ۇلكەن بولعانىنا قاراماستان, قازاقستان ءبىز ءۇشىن وڭىرلىك تۇرعىدان عانا ەمەس, سونداي-اق جاھاندىق دەڭگەيدە دە ماڭىزدى ءارى تۇراقتى سەرىكتەس سانالادى, – دەدى ەۋروپالىق كەڭەس باسشىسى.
كەدەرگىسىز كەلىسسوزدەر
الەمگە بەلگىلى ساياساتكەر د.تۋسكتىڭ ءومىربايانىندا ونىڭ ءۇش ءتىلدى – اعىلشىن, ورىس جانە پولياك تىلدەرىن ەركىن بىلەتىندىگى كورسەتىلگەن. ال قازاقستان پرەزيدەنتىنىڭ كەمى بەس ءتىلدى بىلەتىندىگى انىق. سوندىقتان دا تۋمىسىنان ديپلومات ق.توقاەۆتىڭ ءاربىر كەلىسسوزى ۇستەلدىڭ ارعى بەتىندەگى قوناعىمەن وڭاي ءوربيتىنى راس. مىنە, كەزەكتى تابىستى كەلىسسوزدەردەن كەيىن مەملەكەت باسشىسى مەن ەۋروپالىق كەڭەس توراعاسى ەكەۋارا ايتىلعان اڭگىمەلەردىڭ ءمان-مازمۇنىنا بايلانىستى بۇقارالىق اقپارات قۇرالدارى وكىلدەرى الدىنا شىعىپ مالىمدەمە دە جاسادى.
قاسىم-جومارت توقاەۆ ءمالىمدەمەسىن تولىق مەملەكەتتىك تىلدە جاساپ, سوڭعى تۇجىرىمدارىن اعىلشىنشا قورىتتى.
مەملەكەت باسشىسى اۋەلى قازاقستانعا رەسمي ساپارمەن كەلگەنى ءۇشىن ەۋروپالىق كەڭەس توراعاسىنا ريزاشىلىق ءبىلدىرىپ, ساپاردىڭ ساياسي قۋعىن-ءسۇرگىن جانە اشارشىلىق قۇرباندارىن ەسكە الۋ كۇنىمەن تۇسپا-تۇس كەلگەنىنىڭ سيمۆولدىق ءمانى بارىن ايتتى.
– ەۋروپالىق كەڭەستىڭ قابىلداعان جاڭا ستراتەگياسى مەن ءسىزدىڭ ساپارىڭىز ورتالىق ازيا ەلدەرىنىڭ ساياسي-ەكونوميكالىق ورنىقتى جانە قاۋىپسىز دامۋى ءۇشىن ەۋروپالىق تاراپتىڭ مۇددەلى ەكەنىنىڭ دالەلى, – دەدى قازاقستان پرەزيدەنتى.
قاسىم-جومارت توقاەۆ دونالد تۋسكتىڭ ساپارى نۇر-سۇلتان مەن بريۋسسەل اراسىنداعى ديالوگقا تىڭ سەرپىن بەرەتىنىن اتاپ ءوتتى.
– قازاقستان ورتالىق ازيا ەلدەرىنىڭ ىشىندە ەۋروپالىق وداقپەن «ەكىنشى بۋىن» كەلىسىمىنە قول قويعان ءبىرىنشى ەل بولدى. بۇل ءبىزدىڭ بايلانىستارىمىزدىڭ بەرىك ەكەنىن كورسەتەدى. ءبىز ەۋروپا ەلدەرىنىڭ بارىمەن ستراتەگيالىق, سەرىكتەستىك قاتىناستارىمىزدى نىعايتۋعا بەلسەندى اتسالىسامىز. قازاقستاننىڭ «ەۋروپاعا جول» باعدارلاماسى مەن ەۋروپالىق وداقتىڭ ورتالىق ازياعا ارنالعان ستراتەگياسى ءارتۇرلى سالاداعى تابىستى ءىس-قيمىلدارىمىزدىڭ ۇلگىسى بولىپ تابىلادى. وسى جەتىستىكتەردى ەسكەرە وتىرىپ, ەۋروپالىق وداقپەن ىنتىماقتاستىعىمىزدىڭ كەلەشەگى جاقسى بولاتىنىنا سەنىمدىمىز, – دەدى مەملەكەت باسشىسى.
ءداستۇرلى ديپلوماتياعا ءتان ۇدەرىس بويىنشا دونالد تۋسك تە قازاقستان پرەزيدەنتىنە قوناقجايلىقپەن قابىلداعانى جانە نۇر-سۇلتانعا رەسمي ساپارمەن العاش كەلۋگە ءمۇمكىندىك تۋعىزعانى ءۇشىن تاعى دا ريزاشىلىق ءبىلدىردى.
– ەۋروپالىق وداق ورتالىق ازيامەن سەرىكتەستىكتى تەرەڭدەتۋ ءۇشىن ءوز ستراتەگياسىن ايقىندادى. قازاقستان – وڭىردەگى ەۋروپالىق وداقتىڭ نەگىزگى سەرىكتەسى. ەلدەرىڭىز باتىس پەن شىعىستىڭ, رەسەي مەن وڭتۇستىك ازيانىڭ اراسىنداعى كوپىر بولىپ سانالادى. ەۋروپالىق وداق – قازاقستاننىڭ نەگىزگى ساۋدا جانە ينۆەستيتسيالىق سەرىكتەسى, – دەدى د.تۋسك.
مارتەبەلى مەيمان ەڭ باستىسى, ەۋروپالىق وداق ەلدەرى قازاقستانمەن سەرىكتەستىكتى جانە ىنتىماقتاستىقتى كەڭەيتۋ تۋرالى كەلىسىمدى جۋىردا راتيفيكاتسيالايتىنىن جەتكىزدى.
بريفينگ بارىسىندا قاسىم-جومارت توقاەۆ پەن دونالد تۋسك جۋرناليستەرگە كەلىسسوز بارىسىندا جاھاندىق جانە وڭىرلىك ماسەلەلەر جونىندە, سونداي-اق ەنەرگەتيكا, كولىك جانە تسيفرلى كوممۋنيكاتسيا سالالارى بويىنشا ەكىجاقتى ىنتىماقتاستىقتى تەرەڭدەتۋ تۋرالى كەڭ كولەمدە جەمىستى پىكىر الماسقاندارىن ايتتى.
جالپى, بۇل ساپاردىڭ ماڭىزدىلىعى ەۋروپالىق وداقتىڭ الەۋەتىمەن دە انىقتالاتىنى راس جانە ول الەمدەگى ەڭ ءىرى ەكونوميكاسى بار الەمنىڭ 80 ەل ءۇشىن باستى ساۋدا سەرىكتەسى ەكەنى دە بەلگىلى. ايتالىق, بىلتىر تاۋار اينالىمى 37 ملرد اقش دوللارىن, سونىڭ ىشىندە قازاقستاننان ەكسپورت كولەمى 31 ملرد دوللاردى قۇراسا, يمپورت 6,7 ملرد دوللارعا جەتكەن. بۇل 2017 جىلعى دەڭگەيدەن 23 پايىزعا جوعارى جانە ەلىمىزدىڭ سىرتقى ساۋداسىنىڭ جالپى كولەمىنىڭ 40,3 پايىزىنا سايكەس كەلەدى.
قازاقستان پرەزيدەنتى قاسىم-جومارت توقاەۆ پەن ەۋروپالىق كەڭەستىڭ توراعاسى دونالد تۋسك, سونداي-اق «الجير» مەموريالدى-مۋزەي كەشەنىنە باردى. مەملەكەت باسشىسى قاسىم-جومارت توقاەۆ پەن ەۋروپالىق كەڭەستىڭ توراعاسى دونالد تۋسك قاسىرەت قاقپاسىنىڭ الدىندا باس ءيىپ, ساياسي قۋعىن-سۇرگىن قۇرباندارىنىڭ رۋحىنا تاعزىم ەتتى.
قازاقستان پرەزيدەنتى مەن ەۋروپالىق كەڭەس باسشىسى «الجير» مەموريالدى-مۋزەي كەشەنىندەگى ەسكەرتكىش تاقتاعا گۇل شوعىن قويىپ, ساياسي قۇربانداردىڭ ءومىرى جايلى مالىمەتتەر جيناقتالعان مۋزەي كەشەنىن ارالاپ كوردى.
