قالا اكىمى نۇرلىبەك ءماشبەك ۇلى قالاداعى كوپقاباتتى ۇيلەردىڭ سىرتقى تۇرپاتىن ساۋلەتتىك جانە ەستەتيكالىق تالاپتارعا ساي سايكەستەندىرۋگە كومەكتەسۋ ءۇشىن جەرگىلىكتى قۇرىلىس كومپانيالارى باسشىلىعىنا ءوتىنىش بىلدىرگەن بولاتىن.
قالا كاسىپكەرلەرى بۇل ۇسىنىستى قابىل الىپ, تۋعان ولكەسىن اباتتاندىرۋعا كىرىسىپ كەتتى. قايىرىمدى ازاماتتاردىڭ كومەگىمەن بىلتىر دا 100-گە جۋىق كوپقاباتتى ءۇي تولىق جوندەۋدەن وتكەن ەدى.
ءاسىلىندە, «تۇرعىن ءۇي قاتىناستارى تۋرالى» زاڭنىڭ 35-بابىنىڭ 2-تارماعىنا, 50-بابىنىڭ 1-تارماعىنا سايكەس «تۇرعىن ءۇيدى قالىپتى جاعدايدا كۇتىپ-ۇستاۋعا كەتەتىن شىعىنىن ءوزىنىڭ ورتاق مەنشىكتەگى ۇلەسىنىڭ كولەمىنە قاراي وتەيدى جانە پاتەر يەلەرى ورتاق ءمۇلىكتى وزدەرىنىڭ ۇلەستەرىنە تەڭ مولشەردە كۇتىپ-ۇستاۋ مەن پايدالانۋ بويىنشا جالپى شىعىستارعا قاتىسۋعا ءمىندەتتى» دەلىنگەن. ياعني, ورتاق مەنشىگى بولىپ تابىلاتىن تۇرعىن ءۇيدى كۇتىپ-ۇستاۋ جانە جوندەۋ جۇمىستارىن جۇرگىزۋ تىكەلەي تۇرعىنداردىڭ ءوز ءمىندەتى سانالادى.
زاڭ وسىلاي دەگەنىمەن وزدەرى تۇرىپ جاتقان ءۇيدىڭ ارلەۋ جۇمىستارىن جۇرگىزۋگە تۇرعىنداردىڭ ءبارى بىردەي ىقىلاستى ەمەس. بەلسەندىلەرى بولعانىمەن كوپشىلىكتىڭ قالتاسى كوتەرە بەرمەيتىن جاعدايلار دا بولادى. ءوز ءۇيىنىڭ ماشاقاتىن ۇكىمەتتىڭ موينىنا ءىلىپ قويعىسى كەلەتىن, تۇيمەدەي ءنارسەدەن تۇيەدەي داۋ تۋعىزىپ, اقپارات قۇرالدارى ارقىلى ەلدى ۋلىعان دا شۋلىعان قىلىپ جاتقاندار دا بار. بۇل جايت رەسپۋبليكامىزدىڭ ءار تۇكپىرىندە كەزدەسەدى. انىقتاي كەلگەندە بەلگىلى بولاتىنى, اكىمدىك تاراپىنان ءۇي يەلەرىنە كوندومينيمۋم ارقىلى جوندەۋگە كەلىسىمشارت ۇسىنىلعان. بىراق كۇردەلى جوندەۋدەن وتەتىن ۇيگە اي سايىن بەلگىلەنگەن نەسيە سومانى تولەۋگە تۇرعىنداردىڭ ىقىلاسى از. ال اكىمدىكتە جەكەمەنشىك ۇيلەردى تەگىن ءجوندەپ بەرەتىن قارجى جوق. ءۇي سىرتىن ارلەۋ, ماڭايىن اباتتاندىرۋ ماسەلەسى دە وسىلاي تىعىرىققا تىرەلە بەرەدى. سوندىقتان قالا اكىمى قايىرىمدى ازاماتتاردىڭ كومەگىنە دىلگىر. وسىلايشا بيۋدجەتكە سالماق تۇسىرمەي كوپقاباتتى ۇيلەردى ارلەۋ, شاتىرلارىن جوندەۋ جۇمىستارى اتقارىلىپ كەلەدى.
