ەلىمىزدىڭ سۋ ايدىندارىندا قاۋىپسىزدىكتى قامتاماسىز ەتۋ ماقساتىندا تجك ءبولىمشەلەرى پوليتسيا دەپارتامەنتىمەن جانە جەرگىلىكتى اتقارۋشى ورگاندارمەن ءبىرلەسىپ پراكتيكالىق جانە پروفيلاكتيكالىق ءىس-شارالار كەشەنىن جۇرگىزۋدە. «بۇگىنگى تاڭدا ەلىمىزدە 107 قالالىق جانە 500 جەكە جاعاجاي سۋعا شومىلۋ ءۇشىن بەلگىلەنگەن. مىڭنان استام ورىندا سۋعا شومىلۋعا تىيىم سالىنعان. ول جەرلەردە 1510 ەسكەرتۋ بەلگىسى جانە ادامداردىڭ قازا بولۋ فاكتىلەرى, سەبەپتەرى مەن وعان ىقپال ەتكەن جاعدايلار جازىلعان 378 كورنەكى ستەند ورناتىلعان», دەدى يۋ.يلين.
ۆيتسە-مينيستر جەكە جاعاجايلاردا كەزەكشىلىك ەتۋ ءۇشىن تجك بولىمشەلەرىندە ارنايى دايارلىقتان وتكەن قوعامدىق قۇتقارۋشى-جاساقشىلار ەسەبىنەن 114 وبەكتىلىك قۇتقارۋ بەكەتى قۇرىلعانىن جەتكىزدى. «سۋ ايدىندارىنىڭ قاۋىپتى جانە قورعالمايتىن ۋچاسكەلەرىندە جەدەل-قۇتقارۋ جاساقتارى قوسىمشا 53 ءموبيلدى قۇتقارۋ بەكەتتەرىنىڭ كەزەكشىلىگىن ۇيىمداستىردى. سۋعا كەتىپ قايتىس بولۋدىڭ الدىن الۋدىڭ نەگىزگى قۇرالدارىنىڭ ءبىرى – حالىقپەن اقپاراتتىق جۇمىس. جىل باسىنان بەرى وڭىرلەردە 28 بريفينگ وتكىزىلدى, حالىق اراسىندا 65 مىڭنان استام ۇگىت-ناسيحات ونىمدەرى (پاراقشالار, جادىنامالار, بروشيۋرالار) تاراتىلدى, تەلە-راديولاردا 556 ءسوز سويلەۋ ۇيىمداستىرىلدى», دەدى ول.
سونداي-اق ىشكى ىستەر مينيسترىنىڭ ورىنباسارى بالالاردىڭ سۋعا باتۋىنىڭ الدىن الۋ ماسەلەلەرىنە ەرەكشە كوڭىل بولىنەتىنىن اتاپ ءوتتى. «ەلىمىزدىڭ وقۋ ورىندارىندا جوسپاردان تىس اتا-انالار جينالىسى وتكىزىلىپ, ولارعا سۋ ايدىندارىنداعى قاۋىپسىزدىك شارالارى ايتىلدى. سۋدا قاۋىپسىزدىك بويىنشا 152-دەن استام ينتەراكتيۆتى ساباق ۇيىمداستىرىلدى. وعان 140 مىڭنان اسا وقۋشى قامتىلدى», دەدى يۋ.يلين.
سۋ قويمالارىنا جاقىن ورنالاسقان 45 بالالار لاگەرىندە قۇتقارۋشىلار جاعاجايدىڭ ءتۇبىن, قۇتقارۋ جابدىقتارىن تەكسەرىپ, اقپاراتتىق ستەندتەر ورناتقان. «سۋعا شومىلۋ ماۋسىمىنىڭ قىزعان ۋاقىتى ماۋسىم-شىلدە ايلارى. بۇل حالىقتىڭ باسىم ءبولىگى ەڭبەك دەمالىسىنا, بالالار جازعى دەمالىسقا شىققان ۋاقىت. ول كەزدە ادامدار جاپپاي سۋ ايدىندارىنا بارادى» دەگەن ۆيتسە-مينيستر جىل سايىن قايتالاناتىن سۋدا جازاتايىم جاعدايعا تاپ بولۋدىڭ سەبەبىن ادامداردىڭ قاراپايىم قاۋىپسىزدىك ەرەجەلەرىن ساقتاماۋمەن بايلانىستىردى. سوندىقتان دا توتەنشە جاعدايلار كوميتەتى جۇرتشىلىقتى سۋداعى قاۋىپسىزدىك ەرەجەلەرىن قاتاڭ ساقتاۋعا شاقىردى.
