كاتاردىڭ جۇلدىزى ناسسەر سالەح ءال-اتتيا (Nasser Al Attiya Team) وسى كەزەڭدە بىردەن اعارىپ العا شىقتى دا, جارىس اياقتالعانعا دەيىن ەشكىمگە دەس بەرمەدى. ەسەسىنە ەكىنشى ورىن ءۇشىن تالاس وتە شيەلەنىستى ءوتىپ, ناتيجەسىندە بەرنحارد تەن برينكەنىڭ (Overdrive Racing) باعى جاندى. ال قازاقستاننىڭ مىقتىلارى – اندرەي چەرەدنيكوۆ پەن يگنات فالكوۆ مارە سىزىعىن سەگىزىنشى بولىپ قيىپ ءوتتى. ەكى كۇننىڭ قورىتىندىسى بويىنشا جەرلەستەرىمىز ازىرگە توعىزىنشى ورىنعا تۇراقتادى.
جول تالعامايتىن كولىكتەردىڭ T2 باسەكەسىندە قازاقستاندىق «Aktau Motorsport» كومانداسىنىڭ مۇشەسى, «جىبەك جولى 2017» جارىسىنىڭ جەڭىمپازى كيريلل چەرنەنكوۆ ەكىنشى كەزەڭدە الدىنا جان سالمادى. ونىڭ ۋاقىتى – 5 ساعات 29 مينۋت 7 سەكۋند. العاشقى كۇنى جەڭىمپاز اتانعان كاتاردىڭ تاعى ءبىر وكىلى مۇححامەد ءال-مير (Mohhamed Nasser Almeer) وسى جولى جەرلەسىمىزدەن باقانداي 16 مينۋت قالىپ قويىپ, ەكىنشى ورىندى قاناعات تۇتتى.
ت3 كولىكتەرى دوداسىندا برازيليادان كەلگەن رەينالدو ۆارەلەنىڭ (MONSTER Energy سan-Am) باعى جاندى. جۇك كولىكتەرى سايىسىندا «كاماز-ماستەر» كومانداسىنىڭ بەتكەۇستارى دميتري سوتنيكوۆقا تاعى دا تەڭ كەلەر ەشكىم تابىلمادى. ونىڭ ەكيپاجى بەلگىلەنگەن قاشىقتىقتى 4 ساعات 17 مينۋت 52 سەكۋندتا ءجۇرىپ ءوتتى.
«راللي قازاقستان 2019» دوداسىنىڭ كەلەسى كەزەڭىندەگى قاشىقتىعى 450 شاقىرىمدى قۇرايدى. ونىڭ 327-ءسى ءتۇرلى كەدەرگىلەرگە تولى ارنايى ۋچاستكىلەر.
