ايماقتار • 29 مامىر، 2019

شىمكەنتتە تۇرعىن ءۇي ماسەلەسى تۋرالى زاڭ جوباسى تالقىلاندى

672 رەت كورسەتىلدى

قالا اكىمى ع.ءابدىراحىموۆ، پارلامەنت ءماجىلىسىنىڭ دەپۋتتارى، ۇكىمەت مۇشەلەرى، پيك توراعالارى مەن باسقا دا ۇيىم باسشىلارىنىڭ قاتىسۋىمەن تۇرعىن ءۇي ماسەلەسى جونىندە جيىن ءوتتى. كەزدەسۋدە پاتەر يەلەرىنىڭ كووپەراتيۆ توراعالارىمەن تۇرعىن ءۇي-كوممۋنالدىق شارۋاشىلىق تۋرالى زاڭ جوباسى تالقىلاندى.

القالى جيىندا قالا باسشىسى بۇل زاڭ قىزمەت كورسەتۋ مەن حالىقتىڭ ءومىر ءسۇرۋ ساپاسىن جاقسارتۋعا ۇلكەن سەپتىگىن تيگىزەتىنىن اتاپ ءوتتى.

بۇگىنگى تاڭدا شىمكەنت قالاسى بويىنشا 23 باسقارۋشى كومپانيا 1409 كوپقاباتتى تۇرعىن ۇيگە قىزمەت كورسەتسە، 1491 ۇيدە باسقارۋشىلارى بار. ال جاڭعىرتۋ باعدارلاماسى اياسىندا 947 كوپقاباتتى تۇرعىن ءۇي كۇردەلى جوندەۋدەن وتكىزىلۋى ءتيىس بولسا، ونىڭ – 152 كۇردەلى جوندەۋدەن وتكەن. سونداي-اق، قالا بويىنشا كوپقاباتتى تۇرعىن ۇيلەردە ورناتىلعان ليفتىلەر سانى – 266 بولسا، 2013 جىلدان باستاپ بۇگىنگى تاڭعا دەيىن - 29 ءليفتى اۋىستىرىلعان. قازىرگى ۋاقىتتا جەدەل اۋىستىرۋدى قاجەت ەتەتىن 12 ليفت قوندىرعىلارىن دەمەۋشىلەر ەسەبىنەن اۋىستىرۋ جۇمىستارى جۇرگىزىلىپ جاتىر. زاڭ جوباسىندا «ءبىر ءۇي - ءبىر قاۋىمداستىق - ءبىر ەسەپ» قاعيداسى بويىنشا مەنشىك يەلەرى ميق بىرىگۋىنىڭ جاڭا فورماسى قاراستىرىلعان.

دەپۋتاتتاردىڭ ايتۋىنشا، زاڭ جوباسىنىڭ نەگىزگى مىندەتى – ءجۇز پايىزدىق كوندومينيۋمداردى قۇرۋ. زاڭعا ەنگىزىلگەن جاڭا تۇزەتۋلەر كوپتەگەن راسىمدەردى تۇبەگەيلى جەڭىلدەتەدى. اتالعان زاڭدا اكىمدىكتەرگە نىساننىڭ قاسبەتىن، شاتىرىن جوندەۋگە، سۋ دەڭگەيىنىڭ كوتەرىلۋ قاۋىپى بار ايماقتارداعى تۇرعىن ۇيلەردىڭ بەرىكتىگىن ارتتىرۋعا، ليفتىلەردى جوندەۋ مەن اۋىستىرۋعا، گاز سالاسىندا باقىلاۋ ورناتۋعا قاتىستى قوسىمشا وكىلەتتىك بەرىلەدى.

ايتا كەتەيىك، 2019 جىلدىڭ ءساۋىر ايىندا پارلامەنت ءماجىلىسىنىڭ توراعاسى نۇرلان نىعماتۋليننىڭ توراعالىعىمەن وتكەن جالپى وتىرىستا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇرعىن ءۇي-كوممۋنالدىق شارۋاشىلىق ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى قارالعان بولاتىن.
سوڭعى جاڭالىقتار

15169 ادام كوروناۆيرۋس جۇقتىردى

كوروناۆيرۋس • بۇگىن، 09:17

ۇقساس جاڭالىقتار