ايماقتار • 29 مامىر، 2019

شىمكەنتتە اشىق كونكۋرس ارقىلى 5 مەكتەپ ديرەكتورى تاعايىندالدى

703 رەت كورسەتىلدى

شىمكەنت قالاسىنىڭ اكىمى ع.ءابدىراحىموۆتىڭ جەتەكشىلىگىمەن ارنايى كوميسسيالىق توپ قالاداعى 10 مەكتەپكە ۇمىتكەرلەردى سىناقتان وتكىزدى.

كونكۋرس جاريالانعان 10 مەكتەپ ديرەكتورى لاۋازىمىنا جالپى سانى 38 ۇمىتكەر قۇجات تاپسىرعان بولاتىن. كونكۋرستىڭ العاشقى ەكى كەزەڭىنەن وتكەن 19 ۇمىتكەر اڭگىمەلەسۋگە جىبەرىلدى.

«مەكتەپ ديرەكتورلارىن تاعايىنداۋ بويىنشا ارنايى كوميسسيانىڭ العاشقى وتىرىسى ءوتتى. مەكتەپ ديرەكتورلارى مەملەكەتتىك ماڭىزى جوعارى مىندەتتەردى اتقاراتىندىقتان وسىنداي ارنايى كوميسسيا قۇرىپ، ونىڭ قۇرامىنا جەتەكشى سالالىق ماماندار مەن قوعام بەلسەندىلەرىن قوستىق. 
كوميسسيانىڭ وتىرىسىندا قالانىڭ 9 مەكتەبىنە 19 ۇمىتكەر قاراستىرىلدى. ءار ۇمىتكەرمەن جەكە اڭگىمەلەسۋ بولدى. ناتيجەسىندە، № 5، 1، 16، 76، 77 جانە 96 ءبىلىم ۇيالارىنىڭ ديرەكتورلارى تاعايىندالدى. قالعان  4 مەكتەپ بويىنشا ۇمىتكەرلەردىڭ سايكەس كەلمەۋىنە بايلانىستى جاڭا كونكۋرس ۇيىمداستىرىلاتىن بولادى. بۇدان بىلاي، تانىس-تامىر ارقىلى مەكتەپ ديرەكتورى بولىپ بىردە-ءبىر ادام تاعايىندالا المايدى. سوندىقتان، كەز-كەلگەن ادام اشىق ءارى ءادىل وتەتىن كونكۋرسقا قاتىسا الادى»، دەدى عابيدوللا ءابدىراحىموۆ.

اڭگىمەلەسۋگە كەلگەن ۇمىتكەرلەردىڭ ىشىنەن ي.اسانوۆ - №1 كەشكى مەكتەپكە، م.دۇيسەنبەكوۆا - №16 مەكتەپكە، ت.ابدىحالىق - ر.مىرزاشەۆ اتىنداعى №76 مەكتەپكە، ا.ايۋباەۆا - ا.اسقاروۆ اتىنداعى №77 مەكتەپكە، ا.قاراباەۆا - م.اۋەزوۆ اتىنداعى №96 مەكتەپ ديرەكتورلىعى لاۋازىمىنا لايىق دەپ تانىلدى. ال، قالعان №№11، 24، 26، 131 مەكتەپتەرگە قايتا كونكۋرس جاريالاناتىن بولادى.

سوڭعى جاڭالىقتار

15169 ادام كوروناۆيرۋس جۇقتىردى

كوروناۆيرۋس • بۇگىن، 09:17

ۇقساس جاڭالىقتار