اۆياكومپانيانىڭ كوممەرتسيالىق ديرەكتورى نيكولاي بۋرياكوۆتىڭ ايتۋىنشا, نۇر-سۇلتان - ۇلان-باتىر باعىتىنداعى العاشقى رەيس 2 ماۋسىمدا جۇزەگە اسادى.
«مەنىڭ ويىمشا, بۇل شىن مانىندە تاريحي وقيعا. قازاقستان مەن موڭعوليا استانالارى العاش رەت تىكەلەي رەيسپەن قوسىلادى. رەيستەر ءار بەيسەنبى جانە جەكسەنبى كۇندەرى Boeing 7ز7 اۋە كەمەسىمەن جۇزەگە اسىرىلادى. ءبىر باعىتقا ۇشۋ ۋاقىتى ءۇش ساعات ون مينۋتتى قۇرايدى», - دەدى نيكولاي بۋرياكوۆ.
ول جاڭا باعىتتىڭ ارتىقشىلىقتارىن اتاپ كورسەتتى. ونىڭ ايتۋىنشا, نۇر-سۇلتان - ۇلان-باتىر رەيسى الماتى, شىمكەنت, تاراز جانە وسكەمەن قالالارىمەن جالعاسقان. سونىمەن قاتار, رەيسپەن اۋەكومپانيانىڭ جاڭا حالىقارالىق باعىتتارى: وتكەن جىلدىڭ جەلتوقسانىندا اشىلعان دۋشانبە رەيسى جانە 2 ماۋسىمدا اشىلاتىن نۇر-سۇلتان - پراگا تۇراقتى جاڭا رەيسى تۇيىسەدى.
سونداي-اق اۋە كومپانياسى جاڭا رەيستىڭ تاعى ءبىر ارتىقشىلىعى تۋرالى حابارلادى. نيكولاي بۋرياكوۆتىڭ ايتۋىنشا, جاڭا باعىتتاعى جولاۋشىلاردىڭ ۇلان-باتىردان جاپونياعا, كورەياعا جانە قىتايعا ارنايى تاريف بويىنشا ۇشۋعا مۇمكىندىگى بولادى.
«ءبىر باعىتقا ۇشاتىن رەيس قۇنى 240 دوللاردان باستالادى جانە وندا بارىپ-كەلۋ كەلۋ قۇنى 470 دوللاردان باستالادى. ءبىزدىڭ ەلىمىزدىڭ ازاماتتارىنا شىڭعىسحاننىڭ وتانىن كورۋ, ەكوتۋرلار جاساۋ قىزىقتى بولادى دەپ ويلايمىن جانە موڭعوليا تۇرعىندارىنا قازاقستاندى كورسەتۋ وتە ماڭىزدى», دەپ تولىقتىردى نيكولاي بۋرياكوۆ.
