• 29 مامىر، 2019

اسكەري كافەدراعا قابانباي باتىر ەسىمى بەرىلەدى

بۇل – وڭىردەگى ۋنيۆەرسيتەتتەردىڭ ىشىندە اشىلىپ وتىرعان ءۇشىنشى اسكەري كافەدرا.

جاستار جىلى اياسىندا كەشە، 28 مامىردا وسكەمەندەگى سارسەن امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىندە اسكەري كافەدرا سالتاناتتى تۇردە اشىلدى. ەرەكشە اتاپ وتەرلىگى، بۇل – وڭىردەگى ۋنيۆەرسيتەتتەردىڭ ىشىندە اشىلىپ وتىرعان ءۇشىنشى اسكەري كافەدرا. وقۋ ورنىنىڭ ءباسپاسوز قىزمەتىنىڭ حابارلاۋىنشا، اسكەري كافەدراعا ستۋدەنتتەردى قابىلداۋ باستالىپ تا كەتىپتى. بۇل ماقساتتا ۋنيۆەرسيتەت تاراپىنان 2019-2020 وقۋ جىلىنا ءۇش ماماندىق بويىنشا 45 گرانت ءبولىنىپتى.

شقمۋ رەكتورى مۇحتار تولەگەن اسكەري كافەدرا قورعانىس ءمينيسترى، گەنەرال-مايور نۇرلان ەرمەكباەۆتىڭ بيىلعى 11 مامىرداعى №328 بۇيرىعى نەگىزىندە اشىلعانىن، الداعى ۋاقىتتا گرانت سانىن ۇلعايتۋ جوسپارلانىپ وتىرعانىن ايتادى. «اسكەري كافەدرانى بىتىرگەن ستۋدەنتتەر جوعارى وقۋ ورنىن اياقتاعاندارى تۋرالى ديپلوممەن قاتار زاپاستاعى وفيتسەر كۋالىگىن الادى. ولار قورعانىس مينيسترلىگىندە، اسكەري بولىمدەردە، اسكەري پوليتسيادا جانە باسقا دا مەكەمەلەردە جۇمىس ىستەيتىن بولادى» دەگەن ۋنيۆەرسيتەت باسشىسى جاقىندا وقۋ ورنىنىڭ عىلىمي كەڭەسىندە كافەدراعا قابانباي باتىر ەسىمىن بەرۋ تۋرالى ۇسىنىس تۇسكەنىن جەتكىزدى.

اسكەري كافەدرانىڭ اشىلۋ راسىمىنە وسكەمەن قالاسىنىڭ اكىمى جاقسىلىق ومار، پولكوۆنيك، 27943 اسكەري ءبولىمى گارنيزونىنىڭ باستىعى ا. مىرزىقانوۆ، پولكوۆنيك، وبلىستىق قورعانىس ىستەرى دەپارتامەنتىنىڭ باستىعى ك.قايىرقانوۆ، 27943 اسكەري ءبولىمىنىڭ كومانديرى، پودپولكوۆنيك ب.تاجىباەۆ قاتىستى. «بۇگىن – ەرەكشە كۇن. ۋنيۆەرسيتەت وسى باستامانى ىسكە اسىرۋ ءۇشىن كوپ جىلداردى سارپ ەتتى. مىنە، بۇگىن قورعانىس ءمينيسترىنىڭ قولداۋىمەن رەكتور اسكەري كافەدرانى اشىپ وتىر. ونىڭ تاريحي عيماراتتا – وقۋ ورنىنىڭ تۇڭعىش كورپۋسىندا ورنالاسۋى دا ماڭىزدى»، – دەدى ءوزىنىڭ قۇتتىقتاۋ سوزىندە ج.ومار.

اسكەري كافەدرانىڭ اشىلعانىنا اسىرەسە ستۋدەنتتەر ەرەكشە قۋانىپ جاتىر. «بۇل – وقۋ وردامىزدىڭ 67 جىلدىق تاريحىندا بولماعان دۇنيە. وسى ءۇشىن ۋنيۆەرسيتەت باسشىلىعىنا وسىنداعى بارشا ستۋدەنتتەردىڭ اتىنان العىسىمدى بىلدىرەمىز»، – دەيدى ۋنيۆەرسيتەت ستۋدەنتى مارلەن ابۋباكىر.

وسكەمەن

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز