كونستانتين پەتروۆ «سايلاۋ تۋرالى» كونستيتۋتسيالىق زاڭعا ەنگىزىلگەن وزگەرىستەر مەن تولىقتىرۋلاردى تانىستىردى.
– بۇل جاڭالىق بيلىكتىڭ وكىلدىك ورگاندارىن قالىپتاستىرۋعا قاتىستى, – دەدى كونستانتين پەتروۆ. – ەلىمىزدىڭ وڭىرلەرىندەگى ءماسليحاتتاردىڭ قۇرامى سايلاۋشىلار داۋىستارىنىڭ پروپورتسيونالدى ۇلەسىنە سايكەس ساياسي پارتيالار ۇسىنعان ءتىزىمدەر بويىنشا قۇرىلادى. ال پروپورتسيونالدى جۇيە نورۆەگيا, فينليانديا, دانيا, بولگاريا جانە ليتۆا سەكىلدى ەلدەردەگى سايلاۋ كەزىندە قولدانىلۋدا.
بۇل كۇندەرى سايلاۋشىلاردىڭ ءتىزىمىن ناقتىلاۋ ءىسى جۇيەلەنۋدە. ەلىمىزدە 2020 جىلدىڭ سوڭىنا دەيىن سايلاۋشىلار ءتىزىمى بىرىڭعاي اقپاراتتىق ءجۇيەگە كەلتىرىلمەك. زاڭناماعا ەنگىزىلگەن وزگەرىستەرگە سايكەس اۋماقتىق سايلاۋ كوميسسيالارىنىڭ دا قۇزىرەتى ارتۋدا.
كونستانتين پەتروۆ كەزەكتەن تىس پرەزيدەنتتىك سايلاۋدىڭ وتكىزىلۋ ءتارتىبىنە دە توقتالدى. كەزەكتەن تىس سايلاۋ دا زاڭناماعا سايكەس كەزەكتى سايلاۋ سياقتى وتكىزىلەدى, تەك ونىڭ مەرزىمىن ورتالىق سايلاۋ كوميسسياسى بەلگىلەۋگە قۇقىلى, دەي كەلىپ, ول سايلاۋ كوميسسيالارىن اشىق جۇمىس ىستەۋگە شاقىردى.
سونىمەن قاتار وبلىس اكىمىنىڭ اپپارات باسشىسى اعىباي ءامىرين ءوڭىرىمىزدىڭ سايلاۋعا دايىندىعى تۋرالى باياندادى. بۇل كۇندەرى وڭىردە 543 ۋچاسكەلىك سايلاۋ كوميسسياسى جۇمىس ءىستەۋدە. شاعىن اۋىلداردى وڭتايلاندىرۋعا وراي 33 ۋچاسكە قىسقارتىلعان. سايلاۋ كوميسسياسى جۇمىسىنا 3567 ادام قاتىسۋدا. ءار ۋچاسكە ماتەريالدىق-تەحنيكالىق تۇرعىدان تولىق قامتىلىپتى.
سونداي-اق ۋچاسكەگە بارا المايتىن ازاماتتاردىڭ كونستيتۋتسيالىق تاڭداۋ جاساۋىن قامتاماسىز ەتۋ ءۇشىن كوشپەلى جاشىكتەر سايلاۋشىلاردىڭ ۇيلەرىنە جەتكىزىلمەك. ءمۇمكىندىگى شەكتەۋلى جاندارعا كومەكشىلەر قاراستىرىلادى. ينۆاتاكسيلەر مەملەكەتتىك تاپسىرىس نەگىزىندە قىزمەت كورسەتە الادى.
وبلىستىق اۋماقتىق سايلاۋ كوميسسياسىنىڭ ءتورايىمى گۇلنار امانجولوۆانىڭ ايتۋىنشا, وڭىردەگى بارلىق سايلاۋ ۋچاسكەسى پاندۋستارمەن قامتىلعان. ارنايى كابينالار دا جابدىقتالعان. ال سايلاۋشىلار ءتىزىمى سايلاۋ ۋچاسكەلەرىنە بەرىلگەن. جالپى ءتىزىم بويىنشا 551 مىڭ وبلىس تۇرعىنى داۋىس بەرۋگە قۇقىلى. قازىر سايلاۋدىڭ ءار كەزەڭىنە بايقاۋ جۇرگىزەتىن ەقىۇ-دان ۇزاق مەرزىمگە كەلگەن ەكى وكىل وڭىرىمىزدە جۇمىس ىستەۋدە.
پاۆلودار وبلىسىندا ساياسي ناۋقانعا دايىندىق بارىسى بەلسەندى جۇرگىزىلۋدە, ءار كانديدات ۇگىت-ناسيحات جۇمىستارىن جالعاستىرىپ, اۋماقتىق سايلاۋ كوميسسيالارى ءازىرلىكتەرىن پىسىقتاۋدا.
سۋرەتتى تۇسىرگەن ۆالەري بۋگاەۆ
پاۆلودار وبلىسى
