تاراپتار ەكىجاقتى جانە كوپجاقتى ىنتىماقتاستىق ماسەلەلەرىن تالقىلاپ, پارلامەنتارالىق ۇنقاتىسۋدىڭ ماڭىزدى ءرولىن اتاپ ءوتتى.
د.نازارباەۆا ەكى ەل دەپۋتاتتارىنىڭ ناتيجەلى قىزمەتىن, اتاپ ايتقاندا, يننوۆاتسيا سالاسىنداعى ىنتىماقتاستىقتى دامىتۋ جونىندەگى كىشى كوميسسيانىڭ جۇمىسىن اتاپ ءوتتى. «ءساۋىر ايىندا ءبىزدىڭ سەناتورلار مينسكىدە بولىپ, كىشى كوميسسيانىڭ ءبىرىنشى وتىرىسىن وتكىزدى جانە اقپاراتتىق تەحنولوگيالار پاركىندە كورسەتىلگەن جەتىستىكتەردى تاماشالادى. وسى سالاداعى ىنتىماقتاستىقتى نۇر-سۇلتانداعى ەكسپو الاڭىندا تەرەڭدەتۋ قاجەت», - دەدى سەنات باسشىسى.
پارلامەنتتىڭ جوعارعى پالاتاسىنىڭ توراعاسى سونداي-اق تاۋار اينالىمى مەن تەحنولوگيالار ترانسفەرتىن ارتتىرۋعا باعىتتالعان بىرلەسكەن ءىس-قيمىل جوسپارى اياسىنداعى جۇمىسقا قارقىن بەرۋدى ۇسىندى. د.نازارباەۆانىڭ پىكىرىنشە, «ازىرگە بۇل باعىتتاعى جۇمىس تەك قاعاز جۇزىندە جۇرگىزىلىپ كەلەدى».
كەزدەسۋ بارىسىندا 29 مامىر كۇنى نۇر-سۇلتاندا وتەتىن ەاەو مەرەيتويلىق ءسامميتىنىڭ ماڭىزى اتاپ ءوتىلدى. سامميت ەۋرازيالىق ىقپالداستىقتى دامىتۋدا جانە ەلدەر اراسىنداعى ەكونوميكالىق ءوزارا ءىس-قيمىلدى كەڭەيتۋدە ماڭىزدى شارا بولادى. «قىسقا ۋاقىت ىشىندە اۋقىمدى جۇمىستار جاسالدى, ءىس-قيمىل اياسى بەلگىلەندى, ال ەڭ باستىسى – ىنتىماقتاستىقتى دامىتۋ مەن نىعايتۋ جونىندەگى ساياسي ەرىك-جىگەر بار. ەكونوميكالىق مۇددەلەر ىقپالداستىق ۇدەرىستەردىڭ باستى قوزعاۋشى كۇشى بولۋى ءتيىس», - دەدى سەنات توراعاسى. ول ەكونوميكالىق ىنتىماقتاستىقتىڭ كەلەشەگى زور باعىتتارىن, ونىڭ ىشىندە كولىك-لوگيستيكا سالاسىن اتاپ ءوتتى.
«ءبىز قازاقستاندىق ينۆەستورلاردى كۇتەمىز», - دەدى بەلارۋس ەلشىسى. مادەني-گۋمانيتارلىق ىنتىماقتاستىق تۋرالى ايتا كەلىپ ا. نيچكاسوۆ حالىقارالىق «سلاۆيانسكي بازار» ونەر فەستيۆالىنە دايىندىق تۋرالى حاباردار ەتىپ, د.نازارباەۆانى ونەر مەرەكەسىنە قۇرمەتتى قوناق رەتىندە شاقىردى.
