الەم ەلدەرى سپورتشىلارىنىڭ باسى قوسىلعان جارىستىڭ اشىلۋ سالتاناتىنا قالا اكىمى عابيدوللا ءابدىراحىموۆ قاتىسىپ, سپورتشىلارعا ساتتىلىك تىلەدى.
«ەڭ الدىمەن قازاقستان ترياتلون فەدەراتسياسىنىڭ پرەزيدەنتى كارىم ءماسىموۆتىڭ قۇتتىقتاۋىن جەتكىزۋگە رۇقسات ەتىڭىزدەر. شىرايلى شاھارىمىزعا قوش كەلدىڭىزدەر. سپورتشىلارىمىز جاقسى ناتيجەگە قول جەتكىزەدى دەپ سەنىم بىلدىرەمىن. ناعىز مىقتى جەڭىسكە جەتسىن», - دەدى عابيدوللا راحماتوللا ۇلى.
ازيا كۋبوگىن قۇرامىندا 35 ەل بار ازيا ترياتلون كونفەدەراتسياسى ۇيىمداستىرىپ وتىر. ترياتلون سپورتى مەن سالاۋاتتى ءومىر سالتىن دامىتۋ ماقساتىندا وتەتىن ازيا كۋبوگىن ۇلتتىق وليمپيادالىق كوميتەت, «سامرۇق-قازىنا» ۇلتتىق ءال-اۋقات قورى» اق, شىمكەنت قالاسىنىڭ ترياتلون فەدەراتسياسى, قازاقستان ترياتلون فەدەراتسياسى ۇيىمداستىرىپ, شىمكەنت قالاسىنىڭ اكىمدىگى جانە «شىمكەنت» اكك اق قولداۋ كورسەتتى.
وسىلايشا جارتى كۇنگە سوزىلعان اۋقىمدى سپورتتىق سايىس ءوز مارەسىنە جەتتى. 34 ەر مەن 11 ايەل ءوزارا كىل مىقتىنى انىقتاعان ازيا كۋبوگىندە سپورتشىلار 2 ساعاتقا جۋىق ۋاقىتتا 1500 مەتر قاشىقتىقتى ءجۇزىپ ءوتىپ, 40 شاقىرىمدى ۆەلوسيپەدپەن ارتقا تاستادى, مۇنىمەن قوسا 10 شاقىرىم جولدى جۇگىرىپ ءوتتى.
اتالعان سىندا ەرلەردەن العاشقى بولىپ مارەگە سەربيالىق وگنجەن ستويانوۆيچ جەتىپ چەمپيون اتاندى. ەكىنشى ورىن وتانداسىمىز ايان بەيسەنباەۆتىڭ ەنشىسىندە. ال اۆستريالىق سپورتشى لۋكاس گستالتنەر بايراقتى دودادا ءۇشىنشى ورىنعا يە بولدى.
قىزدار دا بۇل سىندا كەرەمەت ويىن كورسەتتى. مارەگە رۋمىنيالىق ماناك انتونەللا جەتىپ, جەڭىس تۇعىرىنان كورىندى. ال ەكىنشى ورىن وڭتۇستىك كورەيالىق سپورتشى يۋن دجەن چانعا بۇيىردى. ءۇشىنشى بولىپ مارەگە سىزىعىن باسقان حالىقارالىق ترياتلون وداعىنىڭ سپورتشىسى ارينا شۋلگينا بولدى.
سونداي-اق, 26 مامىر كۇنى اۋەسقويلار اراسىندا ترياتلوننان Temiradam ەل چەمپيوناتى دا وتپەك. وندا 77 اتلەت پەن 2 كوماندا باق سىناستى.
