– ۋاقىت وتكەن سايىن الەۋمەتتىك سالاعا ارنالعان قاراجات ۇلعايۋدا. ەلباسى نۇرسۇلتان نازارباەۆ جولداۋىندا تۇرمىس دەڭگەيىن ءوسىرۋ, تابىس كولەمىن كوبەيتۋدەن كەيىنگى ماڭىزدى ماسەلە ەكەندىگىن اتاپ ءوتتى. بۇل تۇرعىدان العاندا مەملەكەتتىڭ الدىنا جاڭا مىندەتتەر قويىلىپ وتىر. جولداۋدا ستراتەگيالىق ناقتى ماقسات بەلگىلەنگەن. بەس جىلدىڭ ىشىندە بارلىق قارجى كوزدەرىنەن ءبىلىم, عىلىم جانە دەنساۋلىق ساقتاۋ سالاسىنا باعىتتالعان سومانى ىشكى جالپى ءونىمنىڭ 10%-نا ارتتىرۋ جوسپارلانعان. دەمەك, 2018 جىلداعى ىشكى جالپى ءونىمدى ەسەپكە الساق, بۇل شامامەن 5,9 ترلن تەڭگە (17 ملرد اقش دوللارى). ۇزاق مەرزىمدى ەكونوميكالىق اسەردى قاراپايىم قازاقستاندىقتار دا سەزىپ, ءومىر ءسۇرۋ ساپاسىنىڭ ءوسكەنىن بايقايتىن بولادى. جاڭا ءمۇمكىندىكتەر اشىلىپ, ساپالى مەديتسينا ارزانداي تۇسەدى, – دەدى ول.
«قوعامدىق اۋديت» سەرىكتەستىك پلاتفورماسىنىڭ, سول سەكىلدى «سەرپىن» ۇلتتىق ءبىلىم بەرۋ جانە يننوۆاتسيا پالاتالارىنىڭ توراعاسى مۇرات ابەنوۆتىڭ سوزىنشە, تەحنولوگيالىق ۇدەرىستەر ورلەگەن سايىن ادامزاتتىڭ دا سۇرانىستارى كۇن ساناپ كوبەيىپ كەلەدى.
– الەم ۇلكەن جاڭعىرتۋ كەزەڭىنىڭ الدىندا تۇر. اقپاندا دۋباي شاھارىندا وتكەن ۇكىمەت وكىلدەرىنىڭ دۇنيەجۇزىلىك سامميتىنە قاتىستىم. سوندا نەمىس ەكونوميسى, «ءتورتىنشى ونەركاسىپتىك رەۆوليۋتسيا» كىتابىنىڭ اۆتورى كلاۋس شۆاب ايتقان ءسوز ەسىمدە جاتتالىپ قالدى. «قازىر مەملەكەتتىك باسقارۋ مودەلى جاڭارۋ ۇستىندە. جىلما-جىل مەملەكەت باسشىلارىنا, بيلىك وكىلدەرىنە ەلدى باسقارۋ وڭاي بولماي كەلەدى. سەبەبى ينتەرنەت كەڭىستىگى جاھان جۇرتىن ءبىر ارنادا توعىستىردى. سوعان بايلانىستى ادامداردىڭ دا قاجەتتىلىكتەرى ارتىپ, ۇكىمەتكە قويىلعان تالاپ كۇشەيدى» دەگەن ەدى ول. جۋىردا «امانات» ازاماتتىق پلاتفورماسىن قۇردىق. مۇنداعى ماقسات – الداعى كەزەكتەن تىس پرەزيدەنتتىك سايلاۋدى باقىلاۋ. ءبىز حالىقتىڭ ەلدەگى ساياسي پروتسەستەر جايلى پىكىرىن سۇراستىردىق. انىقتالعانداي, كوبىسى تەڭ قۇقىقتاردىڭ بولعانىن قالايدى. قازاقستاندىقتار الەۋمەتتىك تەپە-تەڭدىك ساقتالسا, بيلىكپەن ديالوگ قۇرۋعا ءازىر ەكەندەرىن ءبىلدىردى, – دەدى ول.
پلەنارلىق وتىرىستا كورشىلەس مەملەكەتتەر اراسىنداعى ينتەگراتسيالىق ۇدەرىس تۋراسىندا دا ءبىراز پىكىرلەر ايتىلدى. ماسەلەن, قازاقستان حالقى اسسامبلەياسى توراعاسىنىڭ ورىنباسارى شەرزود پۋلاتوۆ 2019 جىل قازاقستاننىڭ وزبەكستانداعى جىلى اتالىپ, قوس مەملەكەتتىڭ اراسىنداعى ساۋدا-ەكونوميكالىق بايلانىستىڭ ءورىسى كەڭەيگەنىن ءتىزىپ شىقتى.
